داستانۊ حەیدەری و سنۊبەرۍ
بەشۍ چل و ششەمە
هامشیرەکەو پیرەژەنەکۍ وات: ئانە کارێ ئاسانەن، بە پەنهانی جابەجاش کەروون، ئیتر پیرەژەنەکۍ یەک کیسە تومەنەکەش پەنە دا و واتش: بەڵام مەشۊم ئی کارە فرە پەنهانی بۊن:
دایە شنەفتش، جە پیری کۊهەن
نېیاش بە حوزوور، کیسەی سەڎ تۊمەن
زاڵ وات: ئەد‌ی دایە، ئی کیسە چېشەن
مەعلوومەن عەزیم موشکیلێ پېشەن
مەزانوو، کارت خەیلێ موشکلەن
ئەرسەد موشکیل بۊ، جە لای من حەلەن
دایە وات: عەرزم نەو جەوانێوەن
جە زەید دوورکەفتە، ناتەوانێوەن
ڕەنگ زەرد و زایېف، هېجران بارێوەن
جە داخی دولبەر، بېقەرارێوەن
توجارێ پەڕ ماڵ، فېکر خارێوەن
دڵگەش خەت و خاڵ، خۊش گوتارێوەن
عومری شەریفش، وە بیست نەیاوان
گوڵێن جە گوڵزار، جەڼەتولماوان
ئینە چڼ وەختەن، غەریبی شارەن
دایېم هەر کارش، گریان و زارەن
وەختێ مەکېشۊ، ئاهی ئاتەشناک
دوودش مەنیشۊ، بە چەرخی ئەفلاک
دېیەنش نە خاو، باڵای سنۊبەر
سەرسامەن، جە عېشق ماهی مونەووەر
ئەوەڵ، بە حاجەت، بارگەی خوڎاوەند
دوەم بە خاتر، بەندەی حاجەتمەند
کارم درەنگەن، جای نەفەس نېیەن
عەیش و نیشاتەن، کەس وە کەس نېیەن
ڕەخنە کەی بەری، نە تۊی گەنجینە
بوینۊ، باڵای ئەو بېقەرینە
خەیلێ بېتاوەن عېشقش ها نە سەر
بەرابەر مەبۊ، بە حەجی ئەکبەر
زات وات: ئی کارە نەدارۊ قسوور
هەی (سەلی عەلا، نوورەن عەلا نوور)
هەم ئەو مەیاوۊ، بە وەسڵی دوڵبەر
هەم من شاڎ مەوون، چەنی کیسەی زەڕ
واتش بە دایە: سەرم ها نە ڕا
هەردوو کۊنە ساڵ، هۊرېزان وە پا
کەندەن، دەریچە، بە کوشکی دولبەر
درۊست ڕوو بە ڕووی یاگەی سنۊبەر
[1]