داستانۊ حەیدەری و سنۊبەرۍ
بەشۍ پەنجاو پەنجەمە
ئەڎاو زەمای (قەزەنفەر)ی زېیارە، بە ژەنە پیرەکۍ (دایە)ی واتش، ئانە من مۊچیاری قەزەنفەریم کەرد، تۊیچ لوە چوەر مۊچیاری سنۊبەرۍ کەرە، ئاڎېچە لوا خزمەتو سنۊبەرۍ و واتش:
بەعزێ پەندش دا، هەم ئاما وە بەر
واتش بە دایە، ماهی مونەوەر
من ئامام، وە بەر ئەم جار، نۊبەی تۊن
بکەر سەرزەنشت، بانووی زەڕ ئەستوون
دایە ئېد ئەژنی، لوا بە تەعجیل
لوا بە خزمەت، نازاری کشمیر
وات بە سنۊبەر: ئەی ماهی تابان
ئینە چە فېکرەن، بە خاتر یاوان
من کانی نامووس، هیندوستانم
ئەسڵ و نەسەب خاس، بانووی جەهانم
ئینە چە شېوەن، گرتەنت وە یاد
مەبۊ، نامووسم، بدەری وە باد
ئەگەر بزانۊ، پادشای کشمیر
پارەت مەکەرۊ، بە زەربی شمشېر
پەیچېش، ئاموزات، بېیەن موکەددەر
پەی چی، نمەشی، بە لای قەزەنفەر
ئاڎ ناما وە لات، تۊ بشۊ وە لاش
پەی وېت، بسانە، بۊسە جە گۊناش
بکەر چەنی شووت، قەدرێ دەسبازیی
جوانەن، بەکام، زوو مەبۊ ڕازیی
عېجز و لاڵەکەر، هەتا مەتاویی
بەڵکم چەنی شووت، بە کام بیاوی
بواچە پەنەش، شازادەی کشمیر
ناهاڵیم کەردەن، ببەخشەم تەقسیر
واچە، هەرتۊنی یاری عەزیزم
منیچ هەر کەنیز، کەمتەر کەنیزم
دەسش بگېرە، پشتان کەر بە وېت
بکېشەش، بە ناز، تا بە یاگەی وېت
دوو شاخەی نازش، بېوزە، بە گەردەن
با هەر پێوە بۊ، تا وە ڕووی مەردەن
[1]