هانای هامسەران هۊشم مەدهۊشەن
کوورەی دەروونم وەی تەور وە جۊشەن
کوورەی حەدادان وەلاش خامۊشەن
وەلەد غەزالی زوڵفان ئەشەد بوو
ژە نەسڵ تورکان توندخوو مەلەک خوو
سابق وەلەد بی نەیاوای نیمڕەس
شەمیمەی شیرش ماما ژە نەفەس
ناشیی نابالغ بێخەبەر ژە عەشق
دەرس نە مەدرەسە عەشق نەکەردە مەشق
هېمان کۊرپەی تۊکنەرم خام نەوی
ژە خامی و نەرمی هېمان دام نەوی
ئەبرۆش وە کەمان کیانی نەوی
تووڕەش مەعلووم بی، کەمانی نەوی
دیدەش سیا بی، خوماری نەوی
شەهباز بی هېمای شکاری نەوی
لێوانش وە لال، بەدەخشان نەوی
دوڕ تێی مەعلووم بی، درەخشان نەوی
گۆناش ڕەنگ عشق پێش نەوشتە بی
چوون سێف خانسار خاس نە ڕشتە بی
باغچەش بی، میېوە کەم ڕەنگ و بۊ بی
چوون فەسڵ خەزان بێ ئابڕوو بی
من مەچیام وەلاش سەیرش مەکەردم
گیان نەیرباڵا وەجەیرش مەکەردم
گا نە دۊشم بی، گاگا نە ئاغووش
هەر ساتۍ سەدجار بووسە مەدام ڕووش
نە قەدەقەن کەرد، نە موستەحفز بی
نە تەڵایەدار پەی ڕەفع دز بی
ئیسا بۊ سەنعەت کارساز کاران
نۊسوەیل چتەور مەڕژۆ داران
هەروەی دەمە دا نوور پێش ئاغشتە
سورخیی ڕەنگ دڵ دەروونان چەشتە
نە پا تاکو وە سەر نوور پەیدا وەشتە
سەرتاپای باڵاش ئی لاهی ڕەشتە
کۊرپە، پەڕتوکەی کەزایی خامش
پەخش بییەن وەبان جەمین جامش
وە سەردا خەم، خەم بییەن وە سەد چین
هەر چینۍ نەلای کەردەن وە پەڕچین
چینیی عەترئاسا، چینیی عەنبەری
چینیی قەیچی پاچ، چینیی چەنبەری
چینی چوون سەحاب سیای دەیجووری
جا کەردەن وە فەوق سێف سەیفووردی
چینی وێنەی مار مەغز مەردان نۊش
موستەقڵ کەردەن چوون زەهاک وە دۊش
چینی وە نەی دا، چینی وە بەی دا
هەر چینۍ چەن کەس وەستەن وە وەی دا
کەمان خانەکی، ئەبرۆ کەزاییش
نەپای چەتر چین تاکو بەرزاییش
بییەن وە دوو تاق، دوو میحراب بەستەن
پەی ئەمر تەقدیر زاهد شکەستەن
چوون کەمانێوەن جە ڕۊستەم مەنەن
تیرش ڕیشەی جەرگ ئەشکبوس ڕەنەن
نە چوون دیدەکەی بێ بادە مەستش
مەخموور وە سەودای بادەی ئەلەستش
بییەن وە دوو باز شەیدای شۆخ و شەنگ
هەزار مورغ دڵ ئاوەردەن وە چەنگ
گایی نگایێ کۍ وە نازەوە
بەند بەند ڕیشەی جەرگ دێ وە گازەوە
نە چوون گۆناکەی شەوق شەم بیمش
سیمای سیم ئاسای ساختەی قەدیمش
زەردیی ڕەنگ عشق نوور پەیدا وەشتە
سورخیی ڕەنگ دڵ دەروونان چەشتە
چوون باغچە، بەهەشت بییەن نموونە
میېوە وە گوڵ، دار وەو هەزار گوونە
لو بییەن، لولو وە لال کانی
دوڕ بییەن وە دوڕ دەریای عومانی
ونەوشە و بادام، بەرزا، سونبوڵ
عود و یاسەمەن، نەرگس، زەمەق گوڵ
گوڵ سورخ و بادام، عناب و پستە
نار و نارنگی، ڕەستە و نەڕەستە
سەوڵ سایە دا کاج وە نەیشەکەر
عود و یاسەمەن، شمشاد و عەرعەر
دوو شاخەی بلۊر دە شاخە گەشتەن
هەریەک مەرجانۍ وە سەرش ڕەشتەن
باغچەش وەیتەورە ئی لاهی ڕەشتە
عەینییەن مواچی باغچەی بەهەشتە
دوو تورک بەدخوو تیرکەمان و پێڵ
باغبانش ها نە گشت گێڵ
هەر ڕەهگوزەرێ کەچ نیزارەش کێ
خەدەنگ تورکان پارەپارەش کێ
نە کە بواچم شوتور دیم، نەدیم
کەفتم وەتەمای گوستاخیی قەدیم
دەس درێژ کەردم پەی شاخەی بلۊر
بەڵکەم مەرجانۍ باوەرم وە زۊر
هەر ئۊسا زانام کەماندارانش
وەسەردا سپای زەنگی مارانش
چەنی دوو عەقرەب ئێڵ جاری کەردەن
هەریەک وەیە لا هجووم ئاوەردەن
شەماران و گاز، شەهبازان و چەنگ
عەقرەبان و نێش، تورکان و خەدەنگ
هەر هەشت پەی قەڵەم، هەشت بەنا هێشتەن
سەرتاپام وەی خوون، ڕیشەی دڵ ڕەشتەن
وات ئەی سەی یاقۆی ئەبلەهتەری
لېوەی خاڵ خام، لە گیان بێوەری
یە چ خەیاڵێ وە دڵ کەردەنی
ئەڵبەت تۊ وە گیان وێت ویەردەنی
وە تیر تورکان زەهراڵوو وەردە
بیم وە مەردەی دەورد قیانووس مەردە
هانای هامسەران ئەمانەت فەرزەن
وە خاک پاتان ئیستدعام عەرزەن
ئەر وە جوانی یانان گەشتەنی
شوکرێ وەو لەب تفڵان چەشتەنی
هەر وەخت ئەو تفڵە وە بلووغ یاوا
باڵاش بی وە تووڵ جەنەتومەوا
ئەڵبەت ئەو چەشتەی ناوەرین وە یاد
سەی یاقۆ ئاسا سەر مەدەین وە باد
من فەریوخوردەی چەشتەی جاران بیم
کوشتەی زەهر شەست زەنگی ماران بیم
#سەید یاقۆی ماییدەشت# [1]