داستانۊ گوڵ و بولبولی
بەشۍ ششەمە
نەسیمی بۊن وەش، بەردەوامەن جە تاریفدای وېش پەی بەچە بولبولی، دماتەر مەگنۊ تاریفدای گوڵی، کە دلۍ گوڵزارینە، تەمامو ئاگەی کەرۊ موعەتەر:
ئەم شەو مەنزڵم شاری گوڵزار بۍ
نەسیمم چوون بۊی، عەنبەرین بار بۍ
شەهری ڕەنگینەن، مەکانی دڵخوەش
جایێ، با سەفا، ئاب و هەوا وەش
فەرشی ئەخزەری، وستەن نە زەمین
گومان لېش مدران، چن خەیمە ڕەنگین
پادشای گوڵان، گوڵێ مومتازەن
پېچیدەی پەردە، ئەعزاز و نازەن
هەر وەقت من نەوشار مەکەروون گوزەر
جە ڕای ئیلتیفات ئەو شاری دوڵبەر
تا نەسیمی من پەرێش، مەیاوۊ
لەب پەڕ تەبەسسوم، تۊ تۊ مەشکاوۊ
جە پەردەی حیجاب، سەر مادەرۊ بەر
تەمامی گوڵزار، مەبۊ موعەتتەر
جە عەتر و عەنبەر، چە شا، چە دەروېش
قسمەت و نەسیب، وېش مەیاوۊ پېش
عەترش مەگېران، عەتارانی شار
پەرێ دەفعی ڕەفع، نەوەشیی و بیمار
جەرگەی عاشقان، مینای مەی بە کەفف
مەیان، مەنیشان، نە پاش سەف بە سەف
بە تای عەرەقچین، بادەی خۊش گەوار
مەنۊشان، بە یاڎ، عشووقی نازار
مەست و دەماخ چاخ، دڵ خاڵی جە خەم
دەستە دەستەی گوڵ، مەوینان وە هەم
مەپېچان بە تای خەیاتەی تاب دار
سەوقات مەکیانان، پەی یار و دڵدار
مەعشووقیچ، جە ڕای شوخ و تەننازیی
مەرهەم عاشق کوش، عاشق نەوازیی
پەی ئېد کە عاشق، بەڎتەر بۊ لېوە
تایێ زوڵفی وېش، مەپېچۊ پېوە
ڕەزاش بۊ ئەڵتاف، بەیار بنمانۊ
دەستەیێ جەو گوڵ، پەرێش مەکیانۊ
بەهبەهجە بۊی زوڵف، وەهوەههجە بۊی گوڵ
بیسمیللاﮪ، تاکو سوبح، سەبر و تەحەمموڵ
بۊی گوڵ چەنی بۊی، زوڵفی دېز فام
بیللاﮪ، ئەر سوفی مەگنۊن نە مەشام
دەر سەعات دەیری دېوانە مەبۊ
جە سوفیگەری، بېگانە مەبۊ
ئەر دەیری نەبۊ، ئانە نەفامەن
نە پوختەو بۍ دەرد، خەر سوفیش نامەن
وەلحاسڵ، شەماڵ، جە تەعریفی گوڵ
شەمێ ئەدا کەرد، پەی بەچە بوڵبوڵ.[1]