داستانۊ گوڵ و بولبولی
بەشۍ دەهەمە
ئەڎاو بەچە بولبولی، هەر خەریکەنە عەیب و عارەکا گوڵی، پەی بەچەکەیش باسکەرۊن، واتش: گوڵ بەقاش نېیەن، دەمێ گوڵزاری نەخشنۊ، دەمێتەر مەگنۊ بازار و مەورەشاش:
ڕاستەن گوڵڕەنگین، عەنبەرین بارەن
بەڵ چڼین عەیبێ، گوڵیش وە بارەن
ئەوەڵ ئېڎ حوسنش بە قەرار نېیەن
دەوامی عومرش، پایەدار نېیەن
چوونکە بۍ میهرەن، چەنی عاشقان
وەی سەبەب، ڕشتەی میهرش بۍ وەفان
دوەم هەرزەکار، لاقەید جە تانە
سەروەش، هەم چەنی خوېش و بېگانە
ساعەتێ مەڎۊ، ڕەونەق بە گوڵزار
لەحزەیێ هانە شەهر، نە کووچە و بازار
هەر لاڎێ، کەسێ، مەگېرۊش وە دەس
بۊ مەنیۊ، نە بۊش، پەیاپەی پەیوەس
یارێ ڕەفیق بۊ، چەنی هەر دەخەڵ
هەرکەس پەرێ وېش، بنیۊش وە باخەڵ
سا هەنی ئەو یار، زینەتش کامەن
وەڵڵا عەشقبازیی چەنیش حەرامەن
پېسەشان واتەن: جە ڕای فام و هۊش
تف ئەو ڕووی گوڵێ، دوو کەس کەرۊ بۊش
باز بە هەر جیهەت، یە گشت بەر کەنار
چن ڕەفیق دارۊ، گشت عاشق ئازار
یەکێ چەنەش خارەن، جەرگی دڵدۊزەن
پەی کوشتەی عاشق، دایېم، بە سۊزەن
تا مەحز، کە نیگات کەردەن بە ڕووی گوڵ
تیرش حازرەن، نە ڕووی جەرگ و دڵ
یەکێ باغەبان، پیری کۊنە ساڵ
جەلادی خوێنڕێژ، بۍ خەبەر جە حاڵ
عەنکەبووت ئاسا، تەندەن، چند تارێ
پەنهانش کەردەن، نە هەر گوڵزارێ
چوار ئەترافی گوڵ، پیری باغەبان
چەو جاگە چن دام، کەردەنش پەنهان
ئاشقی مسکین، بۍ چارەی سەرسام
ئەر ببۊ، بگنۊ، نەو تەزویر و دام
پیری باغەبان، گومڕای حەقنەتەرس
زیندانێ ساختەن، نامشەن، قەفەس
پەڕ و باڵ کەندە، دڵ پەڕ ئاخ و داخ
ئەو کونجی قەفەس، مەکەرۊش دەستاخ
حەسرەتمەندەی یار، مەحبووسی قەفەس
عیلاجش نېیەن، تاکو دما نەفەس
سا، یارێ بەی تەور، فەرزەندەی دڵبەند
کەسێ عاقڵ بۊ، مەگنۊش نە بەند
فیکری سەودای عەشق، نە دەروون بەرکەر
مەرحەلەی دەروون، پەڕ خۊف و خەتەر.[1]