داستانۊ (گوڵ و بولبول)ی
بەشۍ حەڤڎەهەمە
وەختێ بەچە بولبول، هۊشش ئاماوە، بە سەماکەردەی لوانە خزمەتو پاشاو گوڵانی، پەی نیشاندای عەشقێ پاکی، وەرانوەرو گوڵیۆ، سەر کەرد وە قەدەم، قەدەم کەرد بە سەر.
وەلحاسڵ، جەو دەم چوون بەچە بوڵبوڵ
نە شەهری گوڵزار، دیش جەماڵی گوڵ
نیمە گیانێ داشت بە دیڎە و بە دڵ
گرتش نە ڕووی دەست پەی نساری گوڵ
مەستی عیشقی دۊس، وە بۍ ئەختیار
وېش وست، وە پای تەخت مەعشووقی نازار
پەی عەزمی پابۊس، مەعشووقی دوڵبەر
سەر کەرد وە قەدەم، قەدەم کەرد بە سەر
چوون، نیمەسەما، بۍ چارەی خەمبار
مەخېزاو مەکەفت نە پای تەختی یار
مەست و لایەعقەل، بۍ خەبەر جە وېش
جە قەزا، چن جار، سینەش خار کەرد ڕېش
سینەش مەجرووح بی، پاڵووش کەرد پەڕ
پەهلووش، هەم کەرد ڕېش خاری ستەمگەر
بەڵۍ، چوون عاشق عیشق ئاوەرد وە جۊش
جە گیانی شیرین، وېش، نەرارۊ هۊش
سا، عەلەلخسووس، جەو ساعەت، جەو دەم
چن هیجرانی دۊس، دییەبۊ، بە چەم
مەستی لایەعقەل مەحووی یار مەبۊ
کەی جە گیان و تەن، خەوەردار مەبۊ
بۍ باکەن، جە وېش، نېیەن، با خەبەر
مەجنوونەن بۍ هۊش، جە عەشقی دوڵبەر
بەهبەه، بەو کەسەی هەقق دادە بۊ پېش
شاڎ بۊ، بە دیڎار، ئاوات واستەی وېش
جە بەعدی چن وەخت جەفای ڕوزگار
شاڎ بۊ دیڎارش، بە دیڎاری یار
خۊشا، جەو ساعەت، هەقق کەرۊ کەرەم
ئاشق وەسڵی یار، بوینۊ بە چەم.[1]