باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و نوڼزەهەمە
کاروانو بازرگانی کۆت ڕا، دمای مودەتێ قافڵەکە لاشدا، تەرسای گاور، جە دوورۆ نوور و ڕوخسارو محەمەدیش ئاوەرد وە نەزەر، پەوکەی بە سەرسامیۆ لوانە خزمەتو محەمەدی و ماچۊ:
تا، یاوان، وە جای تەرسا مەزاهیب
وە لای سەومەعەی نەستۊرای ڕاهیب
حەزرەت، تەشریفش وە پای سەنگ بەرد
مەیسەرە، ناقەی حەزرەت تاقەت کەرد
ئەهلی قافیلە ساکین بین یەکسەر
جە لای بارخانەی پاکی پېغەمەر
نەستورای ڕاهیب، ئاما بۍ خەبەر
نووری حەزرەتش، ئاوەرد ئەو نەزەر
پەلەپەل خېزا، جە شوعلەی نوورش
سەر وە قەدەم ساخت شیی وە حوزوورش
عەرز کەرد، خاترم، پەڕ جە ئەندېشەن
تۊ لات و عەززا، تۊ نامت چېشەن
حەزرەت جواب دا، شۊخی پەسەند بۊ
فەرماتۊ دایت هەر بۍ فەرزەند بۊ
من لات و عەززا، وە سەگ مەزانۊم
وېتان هەم وە سەگ دوزەخ مەوانۊم
ئاخېز کەر جە لام، دوور گیر وە تەعجیل
تۊ بە غەیر جە بت، نەداری دەلیل
نەستورا، ئیحتیاتی نووری حەزرەت کەرد
پەی پەی وە زاهېر، کېشا ئاهی سەرد
وات: سەوگەند بەو کەس بەسیرەن بۍچەم
ئینجیلش کېیاست، پەی عیسای مەریەم
ئینە پېخامبەر، ئاخر زەمانەن
خولاسە، مەخلووق گرد ئینس و جانەن
ئیتاعەی ئەمرش، ڕستگارییەن
بۍ ئەمریش دایېم گرفتارییەن
دنیا، گرد مەبۊ، عەبدی زەڕ سەندش
سەرکەشان تەمام، مەبان وە بەندش
حەد هیچ کەس نېیەن، جە غەلغەلەی ئەو
کەرۊ، جە مەساف، مەقابەلەی ئەو.[1]