$کێڵگە نەوتییەکانی هەرێم یان کێڵگە نەوتییەکانی حیزبە کوردییەکان؟$
نووسینی: #ئیدریس مستەفا#
ئەوەی وا خەریکە تەشەنە دەستێنێ گوایە حکومەتی ئێڕاقی دەیەوێ پەلاماری کێڵگە نەوتی و گازیەکانی کوردستان بدات ڕووداوێکی ئێجگار خراپ و ترسناکە بەڵام لەو هەرێمەدا شتێک نەماوەتەوە بە پاوە ڕاوەستابێ تاکو خەمی لێ بخۆی وەک خاک و نیشتمان و وڵات. لە مێژە ئەو هەرێمە داماڵراوە لەهەر بەهایەکی نیشتمانی و نەتەوەیی کوردستانی. هێرش بۆ سەر کێڵە نەوتییەکان دوور و نزیک پەیوەندی بە نیشتمان و کوردستان و مەسەلەی نەتەوەییەوە نییە لەو هەرێمەدا. ئەوەی دەگوزەرێ کێشەی یەک دوو خێزانی دەسەڵاتداری نەوت فرۆشە لەگەڵ حکومەتێکی مەرکەزی لە بەغدا سەبارەت بە خەمی سەروەت و سامانی خۆیان و هیجی تر!
هەموان دەزانین لە هەرێم شتێک نەماوە بە ناوی نیشتمان و نەتەوە و خاک. لە ماوەی سێ دەیەی ڕابردوودا ئەوەی لە باربراوە و قێزەوەن کراوە مەسەلەی نیشتمان و نەتەوە و خاک بووە. دەسەڵاتداران و کاربەدەستانی ئەو هەرێمە جگە لە کۆمەڵێ چاوچنۆکی پارە و سامان هیچی تر نەبوون و نین. ئەمانە خاوەن هیچ وتار و بەرنامە و جیهانبینی و ئایدیا و مۆراڵێکی نیشتمانی و نەتەوەیی و مرۆڤدۆستی نین و کارنامەی سیاسی سێ دەیەی ڕابردوویان ئەمەی وەک ڕۆژی ڕووناک سەلماندووە بۆیە کاتێک کێشەیەکی وەک ئەمەی ئیستا دێتە پێشێ جا چەندە هاوار بکەن و بیانەوێ بیگۆڕن بە قەزیەی نیشتمان و خاک ئەوا عانەیەک ناهێنێ لای خەڵکی کوردستان، دیارە مەبەستم لە زوڕنا ژەنەکانی خۆیان نیە. تاکو ئێستا نەک دڵۆپە نەوتێک قازانجی نەبووە بۆ هیچ هاووڵاتیەکی سادە و خاوەن ویژدانی ئەو وڵاتە بەڵکوو بووە بە مڵۆزم بۆیان کە بەهۆی نەوتەوە هەم لە لایەن دەسەلاتی ناوخۆوە بێ بەش دەکرێن و زەق زەق بەبەرجاویانەوە ئاڵتونی ڕەش دەفرۆشرێ و هێچیان پێ ڕەوا نابینرێ، لە لایەکی تریشەوە هیزی دەرەکی پەلاماریان دەدات بەهۆیەوە؛ لەو لاشەوە خەڵکانێک گلەیی لە کوردستانی باشوور دەکەن گوایە نیشتمانی نین و هەقیان نییە بەسەر پەلاماری بەغداەوە بۆ سەر کێڵگە نەوتییەکان و هێرشەکانیان پیخۆشە. ئەو کێڵگە نەوتیانە هی هەرێم نین بەڵکوو کێڵگەی نەوتی پارتی و یەکێتی و دەست و پیوەندەکانیانن و دیاریشە چەندان سالە پارەی فرۆستنەکەی دەچێتە گیرفانی کێوە. نەوت هەندێ شا و ژیانی شانهەنشایی درووست کرد و هەزاران گەدە و بێ خانە و لانە و پەرتەواوزەشی بە دوای خۆیدا هێناوە ئەمە جگە لە هەلاکەتی بەردەوامی ژیانی هاووڵاتیان لە هەرێم. ئە وهەرێمە گەر سوک بیت سەر ئاو دەکەوی و گەر قورسیش بی ژێر ئاو دەکەوی.
بۆیە ئەوەی پێی وایە ئەو پەلامار و هێرشانە بۆ سەر خاکی کوردستانە و کۆمەڵێ هەڵای تر ئەوا با بیریان بێتەوە ئەوەی خاکی کوردستانی کرد بە شاڕی بۆ هێنانی سوپای بێگانە بۆ سەر کوردستان ئەوە هەر ئەم هێز و دەسەلاتدارانەی ئیستا بوون. ئایا هەر ئەوان نەبوون 66 و 84-85 و 96 و 2017 و چەندان ڕووداوی تری ئاوهایان درووست کرد؟ ئایا هەر ئەوان نین خاکی هەرێمیان کردووە بە بنکەی سەربازی تورکی و ئێرانی. ئایا لە کوردستان کەس دەتوانێ بە نووسین و بە ڕەسمی نەک ڕەخنە لە سەرکردە حزبیە کوردەکان بگرێ بەڵکوو ڕەخنە لە سەرۆکی وڵاتەکانی تورکیا و ئێرانیش بگرێ؟ ئایا بە ڕاستی هەرێمێک هەیە لەسەر بنەما نەتەوەییە کوردی و نیشتمانیە کوردستانی و فەرهەنگی و کەلتورە کوردەواریەکان سیاسەت و ئیدارە و حوکمی ئەو هەرێمە بکات؟
هەر وەک چۆن قەتەر و کوێت و ئیمارات کۆمەڵێ میر وگزیرن بە دیار هەندێ بیرە نەوتەوە لێی دانیشتوون و ئەوەی لە مەزەب و فکریاندا نەبێ وەتەنیاتە ئاوهاش هەرێمەکەی ئێمە بووە بە بەنزینخانیەک و کۆمەڵی دەسەڵاتدار کاری تێدا دەکەن بە خاوەندارێتی دوو بنەماڵەی گەورە و بنەماڵەیەکی بچوک و هەندێ مشەخۆری تر کە لە سێ حزبی سیاسیدا جێگە و پێگەی خۆیان قایم کردووە و ئەوەی لە هزر و کرداریاندا نەبێ مەسەلەی نێشتمان و خاکی کوردستانە.
ئەوەی سێ دەیە لەو وڵاتە ژیا بێت دەزانێ ئەمانە جگە لە کۆمەڵی بازرگانی نەوتفرۆش هیچی تر نین و ئەوەی کە ئەو هەرێمە بەر پەلامار بدرێ و کەس دەنگی لێوە نەیات ئەوا خەڵکی بە کێشەی خۆیان و نیشتمانەکەیانی نابینین بە ومانایەیە کە خەڵک هیچ هێزێکی لە دەستدا نەماوە بۆ هیچ بڕیارێک و کردەوەیەکیش حسابی بۆ نەکراوە و ئەوەی لەسەر دەستی ئەو دەسەلاتە کوردییە تووشی بوون لە نادادی و گەندەڵی و لێدان و کوشتن و بێ ڕێزی کردن و پەرەسەندنی کۆنەپەرستی بە درێژایی مێژووی حوکمی ڕژێمە داگیرکاریەکانی کورد پێیان نەکراوە. گەر ئەنفال و هەڵەبجە دوو سەد هەزاری لێ فەوتاندین ئەوا ئەمانە جگە لە کوشتن و بڕی چەندان ساڵەی شەڕەکانی نیوان خۆیان کە بە هەزاران دەژمێردڕێ و تاکو ئیستاش تەرمی سەدان دیار نیە، ملیۆنان مرۆڤی کوردیشیان بە زیندوویی مراندووە هەر لە هەڵاتن بۆ جێ هێشتنی وڵات و هەندەرانەوە تاکو دەگات بە هەژارکردنیان و بێ هیوا کردن و خەساندنیان لەهەر بەها و ڕێز ونەریتێکی مرۆیی. [1]
Kurdipedia is niet verantwoordelijk voor de inhoud van deze opname en de eigenaar is daarvoor verantwoordelijk. Kurdipedia nam het op voor archiefdoeleinden.
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 610 keer bekeken
Schrijf uw commentaar over dit item!