میرزا ئۆلقاڎر، سەبرو دووریش نەمەنەن، قاروو قین هەر موددێ وەشەن، دڵ سەردی و عەداوەت سنوورش هەن، هیچ کەس بە توڼی و تاڵی و دەماخ بەرزی، دنیاش نەویاران، قازانجش نەکەردەن. میرزا سەردی مەیلو یارەکېش وېناکەرۊن بە سەردی زمسانی، داواکەرۊن ئەو یارەکېش پېسە وەنەوشەو ئەوەڵ وەهارانی، تازە کەرەوە مەیلەکەو جارانی، با سەردی و سڕی مېیانیما پېسە سەردی زمسانی ۋیەرۊن، ئەچی وەهارەنە گەرمی بەخشمێ بە مەیلەکەیما، پېسە جارانی.
تۊر و قار
قیبلەم قار وەسېن، قیبلەم قار وەسېن
عەجز و مەڵامەت قین و قار وەسېن
سزای سیاسەت گیرودار وەسېن
ئیستغنای دەماخ تۊر و قار وەسېن
دڵ‌سەردی تاکەی، عەداوەت وەسېن
سەودای سەربەخۊ، شەقاوەت وەسېن
توڼی و تاڵی و تۊر سەرکەشی وەسېن
عەن عەنە و عینوان ناوەشی وەسېن
بېمەیلی و جەفای ناغافڵ وەسېن
دەغدەغەی دەروون جەرگەی دڵ‌وەسېن
خەیاڵات شەو تا بە ڕۊ وەسېن
چەنی بەخت شەڕ گفت و گۊ وەسېن
توخوڎا گۊش وە قەوڵ بەڎکاران وەسېن
توخوڎا هۊش وە ڕاز ئەغیاران وەسېن
توخوڎا مەیل سەرد ئاهی کاڵ وەسېن
توخوڎا ئیش سەخت حەرف تاڵ وەسین
تووخوڎا یاڎ جەنگ دەمبازی وەسېن
توخوڎا بېشەرتی و ناسازی وەسېن
توخوڎا توغیان مەغرووری تا چەند
یانەی سەبر سەفت سەبووری تا چەند
عوقدەی پېچاوپېچ تۊی دەروون تا چەند
ئینتزار چەم ئەسر هوون تا چەند
وەسوەسەی عەبەس فکر خام تا چەند
ئەجزای شۊر عەشق ناتەمام تا چەند
ئەوگار هیجران ڕەنگ زەرد تا چەند
نادم جە واتەی حەرف سەرد تا چەند
دیڎەی نابینای شەو بۍ نوور تا چەند
نیگای بېسەمەر دووراودوور تا چەند
چوون خەڵوەت کېشان ڕیازەت تا چەند
قین و قار تاکەی نیقازەت تا چەند
قیبلەم نادم بەر جە نەزان‌حاڵی
کافیەن بوویەر جە توند و تاڵی
ئەر خەتای من بۍ، وەر تاوان تۊ
هەرچی بی ۋیەرد، نەونەمامی نۊ
تەریقەی مەوبەت ڕای سەبر و جەختەن
هەوای ئاڎەمی تەقازای وەختەن
دەمەی هەناسەی زمسانان سەرد
گەرمی شوور عەشق وەی تەور بڎەی گەرد
جەودما واڎەی ئامای وەهاران
هەرکەسی پەی یاری وېش ئینتزارەن
وېنەی وەنەوشەی ئەوەڵ وەهاران
تۊیچ تازە کەرە مەیلەکەی جاران
دەلیلەی تەتار شای مودەڕیسان
سەردار سەر عېل خان خاڵ خاسان
سەردی کۊچش کەرد چەنی هەوای سەرد
واڎەی گەرمیەن عەداوەت ۋیەرد
کۍ گرتەن نە ڕووی دنیای دوون ڕاحەت
با ببۊ نە بەین سڵح و سەڵاحەت.[1]