بنەچەو بەگزاڎەکا هۆرامانی
بەشۊ نۊهەمۍ
قاسم سان:
دمای کوچی دمایینو (بارام سان) ی ساڵەو (1103ک/ 1691ز) بە فەرمانو (شا ئیسماعیلی سەفەوی) ، قاسم بەگ کوڕو بارام سانی کریان بە سانو هۆرامانی، نامبریا خوڼەوارێ بە ئاوەز و دەسێ باڵاش بېیەن جە ۋەشنویسینە و هەم دەسو شېعراچش بییەن، فرە حەزش بە ئاوەڎانکەردەیۆ قەڵەمڕەوەکەیش کەردەن، کناچۍ والی کوردەسانیش داواکەردېنە، ئانەیچ مەلامەتێ بېیەن پەی پتەوبېیەی پېوەڼیی مېیانیشا، دمای کوچی دمایینو هامسەرەکېش، کناچۍ (عەلیقولی خان) ی گۆرە کېشکچی شاو ئێرانیش داواکەردېنە، چا ژەنۍ کوڕێش بییەن.
سەردەمو حوکومڕانی قاسم سانینە، جورە پەشېوییێ کۆتەن دلۍ بنەماڵەو حوکومڕانو هۊرامانی، برێکېش کە ژمارەشان (9) کەسۍ بیېنۍ هەریۊشان حەڼاو وېشۆ داواو سانیەتیش کەردەن، دەسەڵاتدارە عوسمانییەکېچ، پېسە ڕەویەو هەمیشەیی وېشان خەریکۍ گەرمکەردەیۆ ئایېرو دوەبەرەیی و پېسە واتەنشا (ئایېرو چېرو سمەرا) دێنېشا گژۍ یۊترینیرە، ئانەیچ کاریگەریێ خرابش بېیەن پەی سەرو ناوچەکەی.
ساڵەو (1110ک/ 1698ز) قاسم سان دلۍ جەنگێنە جە مەریوان بە دەسو لەشکەرو کرمانجی کۊشیان، کېشمەکېشو مېیانو کوڕەکایچش زیاتەر گەرم بییەن، دەسەڵاتدارۍ (عوسمانی، بابانی، ئەردەلانی) یچ لاو وېشاوە ئایېرو ناکوکیەکاشا هۊرخېزنان.
(گەنجعەلی سان) کە دمای (قاسم سان) ی حوکمش گېرتەنەن دەس، تەنیا یەرۍ ساڵۍ حوکمڎاریش کەردەن، ساڵەو (1113ک/ 1701ز) کوچی دمایینش کەردەن، دمای ئاڎییچی (عەباس سان کوڕو گەنجعەلی سان) ی تاکو ساڵەو (1116ک/ 1704ز) حوکومڕانیش کەردەن، دمای ئاڎییچی (عیسا سان کوڕو بارام سان) ی دەسەڵاتش وەرگېرتەن، ساڵەو (1128ک/ 1715ز) بە دەسو دوۍ جە برایەکاش بەنامۍ (حسێن بەگ و جەمشید بەگ) ی کوشیان، چېرو سایەو (جەمشید بەگ) ینە ئیسماعیل بەگ کوڕو قاسم سانی کە جە دەگاو (دزڵیۍ) نیشتەجا بییەن، کریان بە سانو هۆرامانی، تاکو ساڵەو (1138ک/ 1725ز) حوکمش کەردەن، دمای ئاڎیی (جەمشیڎ بەگ) ماوەو شش ساڵا حوکمداریش کەردەنو نازنامو سانیش دریان پەنە، جەمشیڎ سان بە دەسو (یوسف بەگ) ی کوشیان، (مەنوچەر بەگ) ی کوڕش حوکمش گېرتەن دەس، بېیەن بە سانو هۆرامانی، بەڵام تەمەنو دەسەڵاتەکەیش فرە کەم بییەن، دمای دوۍ مانگا (حەمە یوسف بەگ) کوڕو ئیسماعیل سانی کوڕەزاو قاسم سانی کریان بە سانو هۆرامانی، نامبریا پیێوە ئازاو چەنەئاما بییەن، بەڵام کورتەباڵا بییەن، پەوکەی (نادرشا) نازنامو (سانە گولانە) یش دان پەنە، ساڵەو (1165ک/ 1751ز) جە تەمەنو (99) ساڵینە کوچی دمایینش کەردەن.[1]
Kurdipedia is niet verantwoordelijk voor de inhoud van deze opname en de eigenaar is daarvoor verantwoordelijk. Kurdipedia nam het op voor archiefdoeleinden.
Dit item werd in het (هەورامی) geschreven, klik op het pictogram
om het item te openen in de originele taal!
ئی بابەتۍ بە زۋانی (هەورامی) نۋیسیێنە، پەی ئەۋەکەرڎەی بابەتەکۍ بە زۋانېۋ کە نۋیسێنە، سەرو ئایکۆنو
ی کلیک کەرە!
Dit item is 660 keer bekeken
Schrijf uw commentaar over dit item!