$#داعش# نەخۆشییە؟$
#هێمن عەبدوڵڵا#
#24-11-2014#
هەفتەی ڕابردوو لەگەڵ داعشێکی کورد گفتوگۆیەکی دوو کاژێریم هەبوو. دوو کاژێری پڕ لە پرسیار و بێدەنگیی درێژ و دیسان تێهەڵچوونەوە. گفتوگۆیەک لەنێوان دوو گەنجدا بە دوو جیهانبینیی سەد و هەشتا پلە لەیەکدی جیاواز، بەڵام پڕ لە بەزەیی بۆ یەکدی. داعشە کوردەکە دەیوت حەزناکات کەس لە دنیاکەی دیکەدا بسووتێت و خەمی سووتانی منی بوو. ئەو بە چاوی بەزەییەوە تەماشای دەکردم.
منیش کە گوێم لە قسەکانی دەگرت، خەمم لەوە دەخوارد کە چۆن هاوزمانێکم بەو تێگەیشتنە سەرەتاییەوە لە ئایین لەخشتە دەبردرێت و دەکەوێتە پشت میلەکانی زیندان. بۆیە ئەو پرسیارەم بۆ درووست بوو کە: چۆن دەتوانین وابکەین گەنجەکانمان لەدەستماننەچن و نەبنە داعش؟
لە تۆڕە کۆمەڵایەتییەکاندا پوختەی گفتوگۆکەم لەگەڵ داعشە کوردەکە دەنگیداوەتەوە، بەڵام کاردانەوەکان شۆکهێنەرن. قسەی هەمووان لەوەدا کوورتدەبێتەوە کە پێویستە ئەو گەنجە بکوژرێت.
کاریگەریی سایکۆلۆژیی دڵرەقییەکانی داعش بەئاسانی بە کاردانەوەی زۆربەی ئەوانەوە دیارە کە دوایین بەرنامەی تۆپ ستۆرییان لە تەلەڤزیۆنی ڕووداو بینیوە. تەنانەت زۆرکەس لە من نیگەران بوون یان ڕەخنەیان لێگرتم کە چۆن لە کۆتایی بەرنامەکەدا گوتوومە بەدرێژایی گفتوگۆکەمان بیرم لە چارەنووسی ئەو گەنجە کوردە دەکردەوە.
ئەو داعشە کوردەی ڕووبەڕوو لە ژوورێکی زینداندا قسەم لەگەڵ دەکرد، مرۆڤێکی لاوازی تێکشکاوی هەرزەکار بوو. لە منداڵییەوە لەگەڵ باوکی ببووە کرێکار و ئەو دەستانەی کەلەپچەیان پێوە بوو جەوری ڕۆژگار زبری کردبوون. ئەو لە ناوچەیەکی پشتگوێخراوی کوردستان، کە هەمیشە شەڕی لێبووە و براکان بەردەوام بەرانبەر یەکدی دەستیان لەسەر ماشەی تفەنگەکانیان بووە، تەمەنی هەرزەکاریی بە کۆڵەمەرگی تێپەڕاندبوو. بەدرێژایی ئەو ساڵانەش تەنیا گوللەیەکیشی نەتەقاندبوو و وەک خۆی بۆی باسکردم یەکەم فیشەکی لە ژیانیدا بە تفەنگی داعش لە سەعدییە تەقاندبوو.
ئەو گەنجە کوردەی بەرانبەرم دانیشتبوو جگە لە زمانی کوردی هیچ زمانێکی دیکەی دنیای نەدەزانی. هەرچی فێری ببوو و ڕادیکاڵیزەی کردبوو لە پەڕتووکی چاپکراو و فرۆشراو لە پەڕتووکخانەکانی کوردستاندا، لە مزگەوتەکان و لە شاشەی تەلەڤزیۆنە کوردییەکانەوە فێری ببوو. بە درێژایی گفتوگۆکەمان داعشە کوردەکە نموونەی بە خوتبە و لێکدانەوە ئایینییەکانی مەلایەکی دانیشتووی #هەولێر# دەهێنایەوە و زۆر پێی سەرسام بوو. مەلایەک کە هەندێک شەو لە شەقامی ئیسکان دادەنیشێت و بەپێکەنینەوە دەمەتەقێ دەکات، کەچی گەنجێکی وەکوو ئەوەی من بینیم بەهۆی قسە ئاگرینەکانی ئەوەوە دەچێتە ناو داعش و دەبێتە قوربانی!
خۆزگە بڵاوبوونەوەی گفتوگۆکەی من و ئەو داعشە کوردە، کە لەم ژمارەیەی (رووداو) دا دەقە درێژەکەی بڵاوکراوەتەوە، دەرگا بەڕووی دیبەیتێکی ڕاشکاودا لەسەر هۆکارەکانی ڕادیکاڵیزەبوونی گەنجان لە کوردستان بکاتەوە. چونکە ناکرێ چیدیکە ئەم مەسەلەیە بە شەرم و بەدزییەوە قسەی لەسەر بکرێت. لە ناوچەکانی #هەڵەبجە# و بیتوێن و پشدەر و #گەرمیان#، بەدواشیدا لە هەولێر، زۆرترین ژمارەی گەنجان چوونەتە ناو داعش. خەڵکی ئەو ناوچانە هەڵە دەکەن ئەگەر خۆیان دەستپێشخەری نەکەن و گەنگەشەکە دانەمەزرێنن. بۆ هیچ ناوچەیەک شەرم نییە کە هەندێک لە گەنجەکانی چووبنە ناو داعش، بەڵام نابێ خەڵکی هیچ ناوچەیەک ئەو هەستەوەرییەیان بمێنێ کە ئێستا هەیانە بۆ گەنگەشەکردن لەسەر ئەو نەخۆشییە جڤاکییە. چونکە هیچ نەخۆشێک بە حاشاییکردن لە نەخۆشییەکەی چاک نەبووەتەوە. [1]
Kurdipedia is niet verantwoordelijk voor de inhoud van deze opname en de eigenaar is daarvoor verantwoordelijk. Kurdipedia nam het op voor archiefdoeleinden.
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 436 keer bekeken
Schrijf uw commentaar over dit item!