ناونیشان: #نێچیرڤان بارزانی# بە کێ دەوێرێ؟
نووسەر: #هێمن عەبدوڵڵا 2#
ڕۆژی دەرچوون: #10-06-2019#
بە و دۆخەوە کە لە ناوچەکەدا هەیە، چاوەڕوانیی گەورە لە سەرۆکی نوێی هەرێمی کوردستان، پێویستی بە کەمێک وردی و وریاییە. بە و تەجروبەیەی لە ساڵانی ڕابردوودا لە حوکمڕانیدا کۆیکردووەتەوە، نێچیرڤان بارزانی دەتوانێ سەرۆکێکی کاریگەر و گۆڕانکار بێت بۆ هەرێمەکەی، بەڵام ساڵان و مانگانی داهاتووش زۆر بای بەهێز لە ناوچەکەدا هەڵدەکەن، کە دەبێ وەک سەرۆک شان بداتە بەر بەرگەگرتنیان.
ئەو بەوە ناسراوە کە پیاوی شیعار و هەڕەشە نییە و ئەوە دەڵێت کە دەیکات و پێیدەکرێت. دەشزانێت هێزی خۆی و هەرێمەکەشی لەکوێدایە. بۆ نموونە هێندەی بایەخ بە بواری ئابووری و دیپلۆماسی دەدات، هێندە نایبینین بایەخی بۆ بواری سەربازی هەبێت. کەچی لەو پۆستە نوێیەیدا یەکێک لە ئیشەکانی دەبێ کارکردن بێت بۆ ڕێکخستنەوە و یەکخستنەوەی پێشمەرگە. هەرواش دەبێ ئەزموونی ساڵانی ڕابردوو ئەوەی سەلماندبێ کە ئەگەر پێشمەرگەش یەکبخرێتەوە و بەهێزیش بکرێت، هەر هێندە بەهێز نابێت کە شەڕی سوپاکانی ناوچەکەی پێ بکەیت و بە زەبری هێز بەرانبەریان ڕابوەستی. ڕاستییەکەی لەگەڵ هێزە ئێراقییەکانیش بەمنزیکانە لەڕووی پڕچەکی و ژمارە و زۆر بواری دیکە هێندە بەهێزتر نابێ، کە بتوانێت شەڕی درێژخایەنیان لەگەڵ بکات. بۆیە هەرێمی کوردستان هەمیشە پێویستی بە هێزێک یان هێزگەلێکی دەرەکی هەیە بۆ ئەوەی بیپارێزێت. ئەمەش عەیب نییە و زۆر دەوڵەتی خاوەن سەروەریی دنیاش هەن کە دەپارێزرێن.
لەڕووی دیپلۆماسییەوە ساڵانی داهاتوو ساڵانی قوورس، بەڵام پڕ دەرفەت دەبن. ڕاستە ئەمریکا هەوڵدەدات وێنەی تاکە زلهێزەکەی پاش ڕووخانی سۆڤیەت لە ناوچەکەی ئێمەدا بۆخۆی بپارێزێت، بەڵامە هەموومان دەزانین ئەو سەردەمە بەسەرچووە و هەرچەندە ئەمریکا بەهێزە، بەڵام هێزی نوێی دیکەش هەن. لە چەند دەیەی ڕابردوودا جیهان دوو بەرە بوو: بەرەی دۆستی ئەمریکا و ئەوەی دژی ئەمریکایە. ئێستا جیهان سێ بەرەی سەرەکی و چەندین هێزی نێوەڕاستیدان تێدا هەڵکەوتووە کە وادەکەن چیدیکە واشنتن قیبلەی سیاسیی عالەم نەبێت. بیر لە بەرەی ڕووسی بە ئەجێندای ئۆرۆئاسیایی و بەرەی چینی (کە زۆرتر پشتی بە سۆفت پاوەر بەستووە و سەریشکەوتووە) بکەوە. هاوکات بیر لە هێزی وەک ئێران و تورکیا و هاوپەیمانێتییەکەی فەرەنسا و ئەڵمانیا بکەوە کە هەریەکەیان شتێکیان هەیە لەنێوانی ئەو سێ بەرەیەدایە. بۆیە بەریەککەوتنی ئەو بەرانە چەندە ڕیسک بێت بۆ هەرێمەکەی سەرۆک نێچیرڤان، هێندەش دەرفەتە بۆ ئەوەی هەرێمی کوردستان بکرێتە نێوەندێکی سەرنجڕاکێش و گەشەکردوو لەو گەمانەدا. ئەمەش بە و مەرجە دەکرێ کە وەک گوتم کوردستان بیر لە هەڕەشە و ڕێگەی سەربازی لەگەڵ کەس نەکاتەوە و بزانێت لە قۆناخی نوێدا دەبێ هەموو هێزی خۆی لە بواری بەهێزبوونی سۆفت پاوەرەکەیدا خەرج بکات. جا لەمەشدا، وەک #سلێمانی# دەڵێن، کاک نێچیرڤان مەعلانە و باش پێیدەوێرێ! [1]
Dit item werd in het (کوردیی ناوەڕاست - Central Kurdish) geschreven, klik op het pictogram
![](https://www.kurdipedia.org/images/flags/ku.png)
om het item te openen in de originele taal!
ئەم بابەتە بەزمانی (کوردیی ناوەڕاست - Central Kurdish) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Dit item is 409 keer bekeken
Schrijf uw commentaar over dit item!