بابەتە: هەژمونی دەسەڵاتوو دروا و سەمفۆنی مەرگو ژیوای ئینسانەکا
نویستەی: ساڵح ڕەسووڵی
بە داخەوە جە کۊمەڵگاو ئېمەنە، کوشتەی ئینسانەکا، تەنیا بە ڕواڵەتی فیزیکیۆ سەلەمیۊ و دیاری کریۊ و تەنیا کەسېوە بەرگنۊ، مەردەن کە ڕۊحش جە بەڎەنیش جیا بیەبۊوە.
جە کۊمەڵگاو ئېمەنە ڕۊ نېیا خەڵکی بە واتێ نە کۊشمۍ یان لانی کەمۆ بە سەختی زامڎارېشا نەکەرمۍ .
ڕۊ نېیا بە هەرمانۍ سەقەتۍ و وۍ پەرسی خەڵکی نەکەرمۍ قوربانی زیاڎە واستەی وېما.
نەوەشیۍ جامېعەو ئېمە فرېنی، هەر پا جۊریچە کۊشتەی ئینسانەکا بە شېوازۍ جۊربەجۊری فاڕیا.
بەداخەو جە چەمو ئېمەنە، حەتم مشۊم لاشێو گنۊ، ۋنێ مجیۊ، زاڕۊڵېوە هەتیم گنۊ، قەبرێ هۊرکنیۊ، جا نامېش منیا مەرڎەی.
ماچا ئاااخ بېگوناحێ مەرد، تازە شېعرۍ چنمۍ باڵاشەرە و بەرمېش یاگۍ هەسارا.
گرڎ ڕوێ دەسی ئەنقەز بە قسەکاما، بە هەرمانەکاما، هەزاران خەڵکۍ بۍ تاوانۍکەرمۍ قوربانی.
هەزاران ۋنی مجمۍ دلۍ دڵو ئینسانەکا.
هەست و ئیحساسشا نابووڎ ڪەرمۍ، بەڵام لاماوە موهیم نېیا، چی؟؟؟
چوونکای نەبېیەن جەنازە گنۊ سەردخانە و نە کەوتەن سەرو دەساما پېسە تەرمی بەرمېش پەی زیارەت تەڵانی و ئەسپەرڎەش ڪەرمۍ.
داخوم ئەر پزشکی دادوەری بېیایی و دام و دەزگای وجودش بیێ، تاوېش جە ڕۊح و دڵ و بەسەرهاتوو ئینسانەکا ساکن گېرۊ, چېش نیشانە دۍ؟؟
چە جەنایەت و مەرگهای خامۊش گنېنۍ سارا, جە سی تی ئێسکەنو (CT scan) ئینسانەکا.
بە ڕاسی مایۍ داخېنە کە ئېمە هیشتای فەرقو مەردەی و زینڎەی مەزانمۍ.
ئەجۊما مەردەی تەنیا پەی جەسەو ئینسانەکا ئیتفاق گنۊ، جە حاڵێوەنە خەڵکانۍ فرۍ هەنۍ بەقسۍ و بڕیار و ئېمە، ڕوح و ئیحساسشا کوشېیان و پېسە مەردېوە بە ڕوحێوە سەرگەردان ڕوێ تاکو ۋېرەگا خولیاوە دەورو وېشارە و شەوېنە وەرم و ئیسراحەتشا نېیا و واردەیچشا پېسەن کانۆلای (سرۆم) وەسڵ کریابۊ پەیشاو ئیتر جە هیچ واردېوە لەزەت نمەبەرا.
قاتڵ حەر ئانە نېیا ۋنەو ئینسانی مجۊ.
جەنایەت حەر ئانە نېیا کەسېوە کۊشی.
نان بڕیەی، دڵ ماڕای، دروۍ، گەمە بە هەستوو ئینسانەکا، حەق بە ناحەق کەردەی و هەزاران دیاردۍ تەرۍ هەنۍ گەورەتەرین جەنایەت و تاوانېنۍ، بەڵام تاوانبارەکۍ، جە من و تۊ خاستەر جە کۊمەڵگانە ژیواو بە داخەوە پاسە گنا وەروو چەمی کە تووشو هیچ هەڵێوە نەبېنی و هیچ هەرمانێ خرابەشا نەڪەردېنە، تازە وەختێ دونیچشا، پەو پەڕوو بۍ شەرمیۆ بار و تاوانباریچت ڪەرا.
چانەینە دوسیەیچت پەی وەش ڪەرا.
فرێوە جە ئینسانەکا وەختێ بەڵاێوە مارمۍ سەرشا، بۍ دەنگۍ با نەوەک جرعەتو واتەی و کردەوەیەشا نەبۊ، بەڵکوو حورمەت زانا، ئینسانیەت زانا و حەیا و حورمەت هەرمانېشا پەنە کەرۊ، جیاتی تۊڵەڪەردەیۆ، گۊشە گیری و بۍ دەنگۍ و ڕەنگا مەرگی خامۊش تاکو دما هەناسەو ژیانیشا هۊرچنا.
هیچ زاروڵێوە وەختێ جە ئەڎێ بۊ هیچ تاوانېش نېیا.
وەختوو ئانەی یاوان ئینسان جە وېش پەرسۊ: چی مشۊم چەنی یۊترینی خرابە ڪەرا و دنیای کەرا جەهەڼەم پەی وېچشا و دیگەرانی.
ئا کەسێچە تاوان ڪەرا و بە هەر شێوازێ خەڵکی فەوتنا مەبۊ چەمەڕوانی ئانەی با خەڵک چەم پۊشی کەرۊ و بەخشۆشا
مەبۊ تەماهەرمانۍ ئا بریندارو و دڵ مەڕیایەکا با جە تاوانەکاشا بە ئاسانی ویەرا ...
پدر کشتی تخم کینە کاشتی
پدر کشتە ڕا کە بود آشتی
قسێ جە فیشەکا فرەتەر خەڵکشا کۊشتەن...
بڕیارێ و بۍ وەفایی وبۊختانی ناڕەوێ , هەڵمەت دای پەی خەڵکی بی تاوانی و شانە هاڵی کەردەی جە چېرو باروو وەرپرسایەتی ( شانە خالی کردن زیر بار مسئولیت ) جە تۆپ و تەیارەی , جەنگ , بومەلەزی و لافاوی , خەڵکشا فرەتەر ڪەردن قۆربانی .
وەختێ زانیاری و زانست ( علوم انسانی) جە کۊمەڵگاێوەنە لاوازبۊ , ....
وەەختارێ سیستمێ پەروەردەی ( آموزش) درۆس و حەسابیما نەبۊ , ئاکامەکېش کۊشتەی خەڵکی بۍ گۆناحیا , نەک بە فیشەکی و باتۆم , بەڵکوو بە قسێ و بە کردەوە.[1]