بەیتا بلبلی
شاخێ دوویێ
ب دەستوری خودێ
بازى بان دکه: بلبلۆ ،هەی بلبلۆ
حەیڤانۆ سوتی دلۆ
تویێ ل ناڤ باغێ گولا ، حەزرەت گولۆ !
* * *
بلبلۆ طەیرێ مانێ
عەزیزێ مەها گولانێ
میر ته دخوازت ، وەره بچینه دیوانێ
* * *
بازی با دکەتێ : بلبلۆ دل دەروێشۆ
من خەتا ته ئینا پێش سلێمان پێغەمبەرۆ
مەزنێ طەیرا ل ته دکەت تەفتێشۆ
* * *
بازی با دکەتێ : بلبلۆ دل کۆڤانە
میر سلێمان و مەزنێ طەیرا ل سەر ته گرتی جۆڤانە
کەرەمکه ، من خەتاته یا ئینایی ژ با وانه
* * *
بازی گۆ : من خەتاتە وا ێینایی ژ با میرە
دێ تە ژ ڤان جیا کەم ئێقسیرە
* * *
بلبل دبێ : ب وی کەم رەحمانی
من دڤێت تو رحامن بکێشی ژ ڤی جانی
ب ساخی ئەز نه چمه با میر سلێمانی
* * *
بلبل دبێ : ب وە کەم ، نا بت فنێ
تو چەند بکەی گۆتنێ
ناچمه نک میرێ بن حوکمێ ژنێ
* * *
بازی د بێ : بلبلۆ ! تو طەیرەکی ژ وان رەفا
بەس گەفا بده سەر گەفا
دێ تە ئێقسیر کەم ب هەردوو کەفا
دێ تە بەم ژ ڤان جیا ژ ڤان تەرەفا
* * *
بازی ، بلبل گرت و بره
بلبل ب بایی را دەت خەبەره
ئیمانەت گولامنا سۆر و زەرە
* * *
بازی بلبل گرت و دبەته
بلبل دەنگ دکەته ب تاقەته
گولا ئەز ب هزرەته
بلا نه ب شکفت قەت و قەته
* * *
بازی ، بلبل گرت و د ئینا
بلبل ب بایی را دەنگ هلتینا
بەختێ تەمە گولا من یا سۆر و سپی نە وەرینا
* * *
بازی، گول گرت و ئانی
ل با سلێمان پێغەمبەر دانی
هەی بلبلۆ دل رەحمانی
من عاف ل سەر ته دانی
* * *
ئەز بێژم طۆطه
هنجى مۆلا مەلەکا برن جۆتە
پیشی گایێ جۆتە
* * *
وا دبێژت طۆطه
هنجی مۆلا مەلەکا برین مێلاکە
شەڤێت گران خەوێ ناکە
* * *
وا دبێژت کەوە
هنجی مۆلا مەلەکا برین ل جەوە
شەڤێت گران ناکەت خەوە
* * *
وا دبێژت کەوینە
هنجی مۆلا مەلەکا دلبرینە
شەڤێت گران خەو لێ نینە
* * *
وا دبێژت رەشۆلە
میرم ئەون ؛ ئەڤە نە فکرە و نە فێتە
ته ئەڤ طەیرنە کرنە قەیدێدە
* * *
وه دبێژت شالولە : ژ طەیرا ئه و طەیرەکی ب نوره
میرۆ بدە دەستورە
رێیا بلبل قەییە دورە
* * *
وه دبێژت عەندەلیبە
هنجیێ راگرت دلێ غەریبا
دێ لبەر (شاباقێ ) هەبتتن نەسیبە
* * *
بلبل طێیرەکی ب ناموسە
ل ناڤ طەیرا بوه ناموسه
بلبل چۆ حزرەتا هندی تاووسه
ئەم د کێمن خودێ یێ تەمامە. [1]