لاچەمېوی گولانە سەرو کتېبوو (ژیان لە بازنەی ڕووداوەکاندا)
بەشۊ: دوەمۍ
ئی کتېبە نزیکوو (500) پەلێن و بە واتەو نویسەری ئینە تەنیا بەرگی یۆوەما و قەرار پاسنەنە کە چن بەرگێتەریچ بەیا شۊنیشەرە.
کەسایەتی ئەسڵی و سەرەکی ئی کتېبیە کەسېوا بە نامۍ (جووتیاری) کە نامۍوە دیاری کریێ نویسەری وېشەنە و ئۆ ئانەیە مشۊ نویسەر پەی ئاسان کاری و ئەوەگېڵنای بابەتەکا هۆرش چنیەبۊ. ئی کەسەبۊ بە (یەرەم کەسی تاک) کە، هەنگام بە هەنگام ئینا چەنی نویسەری وهەر جە سەرەتاو زارۆڵەیی و جوانیۆ تاکو ئیسەشە، هەرچیش دیەن و هەرچیش ئەژنېیەن، گردی پەی نویسەری ئەپاسە کە بېیەن گېڵنۆوە.
دماتەر سەرو کەسایەتی جووتیاری فرە قسێ کەرمۍ و دلێ گردو بەشەکانە ئیناما چەنی.
دەس پەنەکەردەی:
هەر جە (وەڵینەو) کتېبەکەیەنە و دەسپەنەکەردەیشەنە، نویسەرهەس و ئێحساسێوی وەش مدۆ بە وەردەنگەکاش و سەلێقێوی ژیرانە بە هەرمانە مارۆ. شۆنەو دوێ پەلارە پەی ئەژناساو دەشتەو زەهاوی، ڕازەو وەشەو (زەڕینە خاتوونێ) دەس پەنە کەرۊ و وانەر هەرچا ئەوەڵۆ وېش حازر کەرۊ پەی نموونەو ئی جۊرە حەکایەتا کە بێجگەم ئانەیە لەزەتشا چەنە بەرمێ، زانیاریێ و سەرچەمۍ عالێما پەنە مژناسنا.
هەر پاسە کە پەلێ کتېبەکەی مدەیمێوە و ملمێ وەرۆ، وەختێو مېیاومێ سەرو هەر بەشێوی، یەک یا چن حەکایەتێ و ڕازێ وەشێما پەی نموونە مارۆوە، ئی ئەوەگېڵیایە هەم کەرۊ بە تامەچاشتوو باسەکەی و هەمیچ پەی ئەنەیاوای خاستەروو کرۆکوو بابەتەکەیا.
دلێ گەروو ئی پەلانە، باسوو هەر دەگایوە و شار و شارۆچکێوی کە کریۆ، وەڵێ گرد چېویەنە ۋېیەردەی ویەریینوو (تاریخ) و ئا یاگێ هەر جە هەزار ساڵێ چېوەڵ گېرەش پەنە تاکو ئیسەشە، گنۆ وەروو چەما وانەری و ئانە کە چا ماوە درێژ و توولانېیەنە سەرو مەخلۆقەکەیشەرە ئامان، شی کریۊوە و ئەپاسە کە قۆمیان باس کریۆ.
پەی ئی بەشەیە نویسەر جە سەرچەمۍ دۆڵەمەندێ و باوەر پەنەکریێ بەهرە هۊر گېرۆ و نامۍ گردو سەرچەمەکا پەی پارێزنای ئسووڵوو دەمۆکراسی و دذان ئەرەنیای و ئێحترام بە قانوونوو (نویسەی و نویسەرا) منویسۆ و نامۍشا جە چېرپەلەکانە مارۆ.
جە لاپەڕەو (21) و (22) یەنە ویەرینوو شاروو سەرپوڵ زەهاوی و بەیاننامەو زەهاوی بە وردی شی کەرۊوە و وزۆشا وەروو دەسو وەردەنگی.
ڕەزا بەهمەنی.[1]