بیسوینێ

وېرەگانو سەیێ مجیێنېرە یاوێنێ پەشتەو هەزارانی، بەحاڵ عەوڎاڵان زەردەش پۆوە مەنەن، ئجۆ حاجینو کەشیڎەش بەستەن، ئەڎام ئیناو لاو ئاویرگێنەو چاشتیش نیێنەسەرو چڵۆسکێ ورخېزنۆ، خوا خوڎامابێ قوڵێ بوڎۆنەو وەرقوڵێ کەرمۍ یان باباحوجێما پەی کەرۊ، هۊشما بیسوێنێ سەرو قاولەمەکەیش بەرزکەردۆو هاڵاوێ ناست بزانمێ چېشینەنە، تاتەیچم پاڵش دابێ کۊڵەکێ کەپرەکێوەو قاچش وستەبۍ سەرو قاچیرە، تاتەم فرە چەقبێ ڕانېش لکێبێنێ یۆترینیرەو وەرو وېشرە ئی گۊرانیێ واچۍ
باباحەیرانۍ تەپەکەت شێویۊ
مادام نمازی دەرەویان پێویۊ
پڕێنە ورئێستۆو ماچۊ پیای بێغیرەت وەرگێ وەراش خاسا، مانگە مانگەو دوانزە مانگەینە، باردێ تەوەرزینەکەی چەنی ئا جەواڵا چەنی ئا وەرێسەو تەنگیە بابلمێ وەروە جاڵەکێنە بارێ وەروە بەربارمێ و هەر نۊعێتا کەردەن ئۍ شەو چەوسەرۆ یاوندێشرە خورماڵ دەیدێش بە گەنمێ، دماو ئانەی وەروەما ورکېشتۆ سەرو خاس تەنگوتیلەش داو پۆژناشرە، هیشتای هەسارەکەو ڕۊی نەزیابێ ورش ئێزنایمێ، دوێ براڵێ بێنمێ دە دوانزە ساڵێ یۊ تاقیلێ سەرەماوەبۍو فرە پۊشتێ نەبۍنمێ، وەروەکېش کەردە بارو هەرە لاتەکێماو کونیشکڵێوە پەڕ بە وەروەو دۊ چەنی تۆرەکێ ئاڵفی نیاش ناوبارو هەرەکێ، ماچۊ بەرڎۍش یانەو لالۊ ڕەشەی خورماڵ واچە کوڕێ فڵانە کەسینمێ و هەوارۆ ئی وەروېما ئاردێنە فاڕۆشۆ بەگەنمێ پەیتا، خوڕیما هەرلێ هەرلایێ سەرەچېرایو پلێ بېیېنۍ نەمێنمێ کلکش وەرو ئینەی ڕوەرە نەلۆ، هەیتا هەیتا واچۍنمێ کلە کلە تاوېش لابڎۆنەو وەروەکێ نەڎۆ تەوەنا، قەمچو وەزا وەستیمێرەو ئامایمێ لاو مەردەی، هەرلێ گۊشێش قوتێ کەردېوە، بەحەیاتم نەڎیەبێم گۊشێ قوتێ کەرۊ هەرچن وچەما وەنە کەردە یاگێ وېشنە نەجمێ و ئەجۍ سینیش کەردێنە، عەیب نەبۊ گەڵێش دڕیێرەو نەما گمێزکەردەی، من پینەیم نەزانابێ دمای واتشا ئانە پاڵنگش دیەن، دماو ماوێ کەوتە لاڕاو خوڕیەما وەنە سەرو هەسانېرە وەستیمێرە دلێ وەنا، هیشتای دۆسو دژمن تاقی نەکریېوە، دەنگو ناڵەو هەسەرێ ئاما داش لامارەو نازاناما کێن، وردە وردەی وەستیمێرە لاما نەڎا دەگا، چاڵەو مۆمیایرە ئامایمێ سەرو سوویای، وەرکەوتەبێ قۆپی قەرەڎاغی، دلێدەم یەکپارچە سەوز کەرۍ، تەختەبەخە پەڕبێ کەپرێ، بانی دۆڵاوان ترازیایمێ لیشکەو وەرەتاوی کېشتش بارەوەروېرە، قەسم ئانەبۍ بەدەس وەرو ڕۊجیاری گېرو، واتم وەشڵەی پلولێ ئانەتەر بەرزەبیێ ۋەرو ئانەیەە دێر وەرکەوتێ، ئامایمێرە زیارەتو هۆرامیا چۆڕەش ئاما، گورج خوڕیەما وەنەو پانامو نیشانەی تاتەیم دایېمێ یانەو لالۊ ڕەشەیما دیۆ، دماو خێرئامای و وەشیو تشی، بیسوینێ بارە وەروەکەما وستو لالۊ ڕەشە قێڕناش هێی وەروە بەگەنمێ، هەرچی پڕو پیرەژەنو خورماڵیبێ مجیاملمارەو وەروەشا کەردە گۊشەپڕچنێ، هەرکەس ئێ پەیوەروێ بەزیاڎەوە گەنمێ ئارێ، تاکو ئی حەلو فەسڵە کریا کونیشکڵەکەنە نانو دوېما وارد، هەرچیێچش مەنەبۍ ورما گېرت پەی ڕېما، لالۊ ڕەشە ماچۊ کوڕەکا یەک بار هەسەر گەنمێم پەی کۊ کەردێندێ، چېش ماچدۍ؟ ملدۍ یان چېگە نیشدێ؟ ناوەڵا ملمێ وەرو شەرا بەردەی مەیارمێ چێ بیمێ، گەنمێش کەردێ جەواڵاو بارش پەی بار کەردیمێ، ئیسەر پېسە ئەوسەری نەبۍ خەمو تاویایماوە نەبۍ، لوایمێ چاڵەو دارا براڵە وچکلەکەم ماچۊ کاکە؛ فەرەنجیەکەم جیا ئاستەن ئشۆم گېڵوشۆ پەی، واتم مەگېڵۆ فەرەنجیو چېشی نە پەراوێزش پۆوە مەنەن نەگۊشێ، هەرچنەم پەنەوات گۊشش نەدارانینەو براڵە گېڵاوە، منیچ هەرۍم خوڕیەوەنەو هەیتا هەیتا دیێنێ پەی براڵەی تایاوانێ بلچەکێ سەی ڕەزای، ئیتر جەچەم گومبی ۋەرو ئانەیەە هەرلەکێ فرە عەزیەتش نەبۊ تەمو سوویایرە نەلانێ و ڕاو حەملەگەچیم گېرتەوەر، بەهەر نۊعێبی ڕاگارە وەستانیرە دەگاو لوانێ یاگەکەپر یانەفەتەل، گەنمێم ورڕێتێ مڎیەو دوێ کاڵەکی دلێ جەواڵەکانە خلێ بیێ، گەنمێم پەخشانو هەیوانێ کەردێ، زیانیرە جبەر تۆرەکەو هەرلێم کېشتو وەرێسێ دەسەکەرۍنێ دیانی پەی سەرو ڕاگای مڎیەو براڵە زیاوە، وەشیێنە ئیمانو شایەتێم ئارد، ئاما لکانە گۆلێ ئننە ئاویش واردە ئجێ کونیشکڵەن، واتم کۆن فەرەنجیەکە ئاردتۆ؟ ماچۊ نەوەڵا لالۊ ڕەشەی وات زڕیەتێ کەردنەو بەرشی، تاوېرەگا گېڵی شۊنیشرە مەوێزیشۆ، منیچ ۋەرو ئانەیەە شەوەم نێپۊرە ئامانێ، منیچ واتم ئەر لالۊ ڕەشەت چەنە ئاگادار کەردێ پامان و زامان پەیت پارێزنێ، دماو ئانەیە هەرلێما وستە ڕاو بەنۆبە سوارێش بېیەیمێ تایاوایمێ ڕاسەکەل، یۊ جەکاڵەکەکاما بەر ئاردو کاردیما نەبۍ پەنە، کېشتما تەوەنېرەو تەقاوە دەسما کەرد کاڵەک واردەی، کوپێما گرد تامو کاڵەکیشا گېرتەبێ و گرد تۆمەکێ لکێبێنێ چوڕچەممارە، وەستیمێرە هەوار ئەڎام کەپرەنە زیاوە باوشێش کەردۆ ئجێ باوشە پەی پلولێ کەرۊوە، هەردویما تن فشارایمێشو کوپېش لێستیمێ، تمەس چن ماچەکێ پەی وەشەویسی بېیېنۍ ئانەیچ پەی تامو کاڵەکەکەیبېیەن، واتما ئەی کۆن تاتەم؟ ئەڎام ماچۊ تاتەو چېشی ئارۊ هەر ورکەشبێ واچۍ هەرەکێ کەوتێنەو ئیسە هاڵی مەیاوە، بەڵام ڕۊسلێ ئاماوە واتش بێخەمێبیدێ دلێ وەنا دیێم بارەکەشا تنوتۆڵبێو وەشبێ، تاتەیم وات چېشتا کەرد؟ گەنمێتا ئاردێ؟ واتم ئەرۍ بارێ گەنمێ پاکێو پوختێ ئجۆ مرۊچا ئاردێنێ، ئەر بڕوایچ مەکەری ئینە کاڵەکو خورماڵینو لالۊ ڕەشەی بەسەوقاتی نیان دلێ بارەکەیما.
ئاشەوە مانیاو مەکەتێ زوو وەرمما کەوتپۆورە، سەعبێ ورئێستیمێ، مڎیەیمێ تاتەما نیا، پەرساما کۆن؟ ئەڎام ماچۊ وەشیێ گەنمانە ئۍ شەو وەرمش نەکەوتەن پۊرەو لواوە پەی دەگێ تەماشەو گەنما.
عەفان دەرەمەڕی.[1]