دەمەتەقێوە سەرو ڕۊمانەو چنارەی
بەشۍ: دەهەمە
لک دایوەنە و لکۆ کەردەی:
چی ڕوٙمانیٛنە چڼە یاگیوٙ ڕاوی پەی دروسکەرده و کیٛشمەکیٛش و خوڵقناو فەزایوٙ هەیجانییە لکیٛ وزوٙ دلیٛ داستانەکا و دماییچ بە شیٛویٛوە ژیرانە بەبیٛ ئانەی جە هەیجانو داستانیٛ کەم بوٙوە لکەکاما پەی کەروٙوە، مەرگو پەروانەی، گیریای ئەنوەری، یانەنشین بیه و ئیستوار مەحمودی و دەساودەس کەرده و وڵکلەی، هەرکام پەی ویٛشا کیٛشمەکیٛشیٛوە زیهنی، عاتفی و تەنانەت فیزیکی مارا شوٙنه و ویٛشارە.
شەخسییەت پەردازی یان دابەشکەرده و دەورو نەقشی بەینو کەسەکانە:
ڕاوی کاراکتەریٛ متەنەوعیٛش بەکار بەردیٛنیٛ کە هەرکام پەی ویٛشا متاوا با بە پاڵەوانو ئا چیروٙکا کە دەورش چنە وینا، دەورو نەقشی مەوازی یان هامشان کاریٛش کەردەن کە نەتاوی بە ئاسانی کاراکتەری سەرەکی دەسنیشان بکەری، دەسپنەکەرده و ڕوٙمانەکەینە پاسە ئیحساس کەری کە پەروانە کاراکتەری سەرەکییە بوٙ و تاکو ئاخر چەنی ڕوەداوەکا بلوٙ وەرۆ، بەڵام ناگا بە مەردەیش دەورش تەمامیوٙ ئیتر زەینەت پەی ئەنوەری ملوٙ، هەرپاسە ئیستوار مەحمودی و بەتوول خانمە کە سەرتاسەرو ڕوٙمانەکەیەنە ڕوٙڵی کارا وینا، بەڵام ئه و ئانەی مشوٙ ڕاوی ولکلەش بە پاڵەوانو ڕوٙمانەکەی دیاری کەردەبوٙ، چوونکوم بە دریٛژایی ڕوٙمانەکەی پەیما بەرگنوٙ گردو ئا ڕوەداوانە کە باس کریاو ڕوە مڎا بەجوٙریٛو جە جوٙرەکا ئینای خزمەتو وڵکلەینە کە دماتەر بە (فەرهاد) نامیٛ بەرکەروٙ.
پارادوٙکس: بەپیٛچەوانەوە شیٛعریٛ پارادوٙکس یان تەناقوز دلیٛ هونەرو ڕومان نویسەینە خاڵی لاوازا، چوون نمەرکریوٙ هامزەمان توٙ دویٛ شەخسییەتی جیاواز یان دویٛ چیٛویٛ جیاواز بی، ڕاوی بەبیٛ مەقسەڎ بڕیٛ یاگیٛ تووشوو ئی تەناقوزیە بېیەن پەی نموونەی:
ل (174) ماچوٙ: ئەنوەر نەوەشخانه و ئەرتەشیەنە بیٛ،
بەڵام شوٙنیشەرە ماچوٙ: سەرداری براش فرە هەوڵشدا چارەنویسش بزانوٙ، بەڵام هیچش دەس نەکەوت؟
ل (21) ماچوٙ پەروانە بە ئەژنیه و نامیٛو ئەنوەری موچرکیٛو ئاما لەششەرەو کەوتە دلیٛ خېیاڵا؟ خەیالیٛ وېیەردەی دووری، خیاڵو عەشق و وەشەویسی ئەنوەری.
کەچی (ل23) ماچوٙ: پەروانە چا زەمانە هیچ سوٙز و ئیحساسیٛوەش نەبیٛ پەی ئەنوەری، ئی وردەکارییە مشیوٙم وەرو چەما گیریا ئەگینا ڕەوایەتەکیٛ ڕەوایی ویٛشا جە دەس مڎان.
ڕەفعەت مورادی.[1]