ڕەفېقو قافڵەی و شەریکو دزیەن
قافڵە، ئیسە نەمەنەن، ئیسە سەردەمو تەکنولوجیای و مەکینەی و ئامرازەکا ئاما و لوایەن، بەڵام جاران خەڵک بە پێ و بە وڵاخ کاروانش بەردەن، چن کەسێ بە چن بارۍ وڵاخاوە جمێنېرە، بارو کاڵای و واردەمەنیشان بەردەن پەی مەملەکەتێ تەری، چن شەو و ڕۋۍ ڕاشا پیمێنە تاکو یاوێنی مەنزڵە، دمایی چۆسەریچۆ بە عەینو تەرزۍ ئا پەنەۋازیېشا بارۍ کەردېنۍ هەکە لاو وېشاوە نەبیېنۍ، گېڵێنێ پەی مەنزڵەو وېشان، پەی نموونەی جە هۆرامانۆ بارە ۋەزی و هەڵووچېشا بەردېنۍ پەی گەرمەسېری، چاگەیچۆ بارە (خەلە و نۋەی و میژۋۍ و نەخۆشەرشا) ئاردەن پەی هۆرامانی.
ئا کاروانۍ فرەو جارا ڕانە توشو تەرسۍ بیېنێ و چج جارێ چەتا ڕووتی کەردېنێ. جاری چامنە بېیەن هەر دلۍ قافڵەکەینە کەسێ هەواڵش دان بە دز و چەتەکاو وەختو جمارەی کاروانەکەیشان پەنە واتېنی، دمایی جە تاڵانیەکەی بەششا دان.
ئانەیچە بېیەن بە ئیدیۆمێ پەی ئا جۊرە کەسا کە دوەڕۋېنی و پېسە واتەنشا جە تەڕی موەراو جە وشکی مووسا.[1]