سێرانو جارانو تەۋەنۍ
کە واتێشا نزیکو یەکو ئایاری بیینمێ، ئیتر ئانە ویما حازر کەرینمی پێ سێرانو تەۋەنۍ هەوارەبەرزەی. ئاماڎەکارییەکیچ بریتیبینی جە (هېڵە و کەرە) گلېرۆ کەردەی، خۊ زیاتەر نەبی. گوشت فرە دەگمەن بی، چوونکوم هەم دەسڕەس نەبی، هەمیچ عەمەلی نەبۍ پەی ئا ڕێ دوورو دریژېچە، گەرما و بوقو لویو تاڵیندوسی ئیحتیمالو تەلەف کەردێش کەرۍ، بەڵام هېڵە و کەرەکە فرە تەر عادەتو عەمەلی تەر بینۍ چەنی پیازە تەڕاو دوی، پەی تېکەڵکەردەیش چەنی وەرۋەکۍ ئۆ دیمو لاسەو حەمەکەی کە فرەو وەختی تاکو نیمە، یام ئاخرو مانگەو پەنجی مەنۍ.
هېڵېچ حەرچی دەگانە مشتەت نەکۆتێبیێنۍ نەبېنۍ، خۊ پېسەو ئیسەیە هېڵۍ مەسڵەحەی نەبېنۍ. یا ئانە هینی یانەو وېتا گلیری کەرینیۆ یان فڕکان فڕکان پەی ئی یانەو ئۆ یانەی.
کەسەکیچ ئانۍ بېنۍ کە نزیکېت بېنۍ و دانېتا پېوەرە گریېنۍ. منو کاک شەریف عادەتەن چەنی زاڕوڵاو مامو حەمذیم کاک دیاریو ماموسا دارای و مام نیازی، کاک کەمالو ماموسا بەختیاری و مام بایو (کاک بەهادینو مەتییم) مام ناجو (دوکتۆر ناجی)، جارجاریچ (دوکتۆر سەباح)و مەرحومو مام یونسو داوڎو لالۊیچم.
عادەتەن شەوۍ تاکو ساحبێ مەراقەبەتو ئاسمانو هەوای کەرېنمۍ، کە خوڎا کەرۊ ۋاران نەوارۊ، چوونکوم ۋارانەکە وەزعەکۍ تېکەدۍ، لۊ بەڵگەشانو بەرز بۍ، حەرپاسە تاڵیندوسو گژ و گیواوەکەی تەریچ، بېنی باعیسو تەڕ بېیەی پانتوڵاو هەڕو چڵپاوو ڕاکۍ.
جار دوە جارێو وەرو ۋارانی و تەۋەرگۍ و تەڕو تووشی و هۆرەترېشقا مەجبورۍ بېنمۍ سێرانەکێما کوڵکەرمێ پەی ڕیوڵەی و کیڵەکاو لالو ئۆلخەفەری و مام جافرو ئاڎییشا. ئیجا دلۍ کېڵیەنە یان بەرەو کېڵییەنە گۊش گېرە پەی خووڕەو وارانی و گرمەو هۆری و چەخماخا عاسمانی و هاژەو ئاوەو دەرەی و چەنی ناسورەی تاریکەو ئا دەساوەندەساو کەمەر قاڵاویەو پەشتەو وەزە سیاوۍ و هانەو تەی. جارجاریچ فڕکەفڕکو کەرگە سیاوا و مریچڵە شېخەڵیا، قاسپېوی دوورو ژەرەژا، چەنی دوکەڵو هېزمە تەڕا، فەزێکی زیاتەر زەریفتەرە کەرېنی.
گرد ساڵێو چی فەسڵە خەمگینەنە خېیاڵېم ملاوە پەی ئا زەمانو ماوا دڵگیرو خەمگینیە، پەی ئا مەملەکەتە بۍ ڕەکابەرو بۍ هامشانەیە، وە ئی شیعرەو (حاجی قادری)چمە مەیوە ویر، کە سنفو یەکی ناوەندییەنە وەرەم کەردېنە:
گوتم بەبەختی خەواڵو بەسە ئەتۆ بی خوا
لەخەو ھەستە زەمانە بچینەوە ئەو لا
گوڕەی بەھاریە ئێستێکە شاخو داخی وڵات
پڕە لەلالە و نەسرینو نەرگسی شەھلا
لەگرمەگرمی سەحابو لەھاژەی باران؛ باران
چیایە پڕ لە ھەرایەو نەواڵە پڕ لەسەدا
پڕە لەسەیلو لەگۆلاو کانی ڕووی زەمین
پڕە لەبەرقو بریقەی بروسکە جەوی سەما
شکۆفە درھەمی شاباشی بای وەعدە دەکا
لەشۆقی مقدەمی خمڵیوە داروبەردی چیا
من فرە سرووشتېم دیېنۍو تەی کەردېنۍ، زەرفېنۍ تەماشەشا وەشا، بەڵام ئا تامو لەزەتو وەرەچەم فەریحیەو، ئیڎەس و ئۆڎەساو دەسڕەسیەشا پېسەو کویساناو کەشو بەڵخەی و هۆرامانیشا نیا، چوونکوم یا ئانەنە سەختېنۍ و چڕۍو جەنگەڵېنۍ، یا مایی و کەمەرۍ بەرزېنۍ، مەجالو تەی کەردەی و لواڕانەیشا نېیا چەنە،
یام دڵگیرۍو وەرەچەم فەرېحۍ نېیەنۍ، حەر پاسە مەتاویچ بە هەوەسو وېت گرڎ لێوەنە بارگەو بنە بنیەی، وەرو نەبیەو هاناواو، وەرۋاۋاو وەیام بېیەی وردە مەل و موورە زەرەر بەخشاو هەوای ڕتوبەتداری.
فاروق سان ئەحمەد.[1]