سەرنجێ سەرو شیعرەکاو (ڕەئوف محموودپوور) ى
بەشۍ: یەکەمە
نویستەی: #سوهەیب فاروق#
یۆ جە پێناسەکاو (ڕیالیزم) ینە ئامان کە ماچۊ: (ڕیالیزم جام ئاوێنەو ژیواین) یانى شاعیر دلێ ژیوایشنە چېش ڕوە مڎۆ دلێ شیعرەکاشنە ڕەنگ مڎۊۋە، یام مشۊم ڕەنگ بڎۆوە، یام باواچمێ وەڵتەر شاعېر دەس وزۆ وەڵێ وەرۋینی کەرۊ، چېوێ وزۆ ڕوە وماچۊش، تاکو دماتەرنە ڕوەمڎۆ. ئەها ( شېرکۆبێکەس) ۋاچۍ: (هە ڵە بجە ئە چێ بۊ بەغا) تادماتەرنە لواو، وەروینیەکەش ڕاسبەرشى. شاعیر جە گردکەسى زیاتە مشۊم دوور وینتەرو ورد وینتەربۊ، وردوین پەى مەسەلەکاو زوانى و، وێنە ى شیعرى و، کە لیمە ى و ڕستەو نۆعیەتو بە هەرمانە ئاوردە یشا، ... تاد دوور ۋین پېسە ناواخنی پېسە گوتارەی شېعریۍ، وەروو ئانەى شیعرەى زیڼێ درۆسەبۆ.
پەنەم پاسەن کە (ڕەوف) تاوانش هەر زوو ئینەى کەرۊ، ئاڎ هەر زوو زاناش کە ئیتر وەسفو وەسفکەردەى دماییش ئامان، لاونایۆ ئینە بە مانا تەقلیدیە کۆنە سوویێکېشا، ئیتر مشۊم ئارۊیى بى، ئارۊیانە ویرۆکەردە یت، ژیوایت، وانایۆیت، نویستەیت، بەرهەم بارى .
ئاڎ هەر زوو زاناش دنیا شامى شەریفە نېیەنەو، تەرسەو گومبیەى زوانەکەیش و ئەدەبەکەیش دڵشنەبۍ، پەوکاى بە هۆرامى نویستشو تازەیچش نویست، ئاخر تاکو وەڵێ ئاڎى کێ زانێ، کێ پەیش لوێ (گەچ و تەختە هۊرپڕا) ، (هەسارە وەرمش زڕیۆ) ، ئاخر قۆناغو یەکەمو گوزەرناو تەرسێ، وێستەیۆو هەستکەردەى بەتەرسەکێن، ئاڎ هەر زوو زاناش بە تەرسەکێ و دیەشۆ، کە دەقگېرتەى پى نەریتە باوەیەو، پى شیعرە باوێ و پى ڕەسمە شیعریە و زوانە شیعریە باوەیە، شېعرەى بەرەو گەناى بەرۆو دماجارنە مەشوولێ مڎاشنە.ئانەش وست ڕوە کە مشۊم جۆهەری تازە زوانى تازەش بۊ، وەردەنگو ئیسەى مشۊ بەى زوانو ئیسەى وانۆوە و وەرمى تازە وینۆ.
شاعیر پېسە شارەزاێوە تەمامى هەرمانەش سەرو شوناسو هۆرامیى بیەى کەردێنە، پېوەڼی بەینو شوناسی و زوانیش وستێنە ڕوە، کۊمەڵى هەرمانێ تازێش دێنى ملو زوانەکە یشرە کە، هۊرگیرو ویرى تازەى و ئارۊیانەینێ.
(خاڵێ سەدامى) پەرسام ئەرۍ جوان ئانە چەمېت چى سوورێنێ؟ چڕوچەمت چى چاڵ چاڵا؟ واتش: خاڵێ سەدامیەنێ بە شیمیایى پە یش کوانا.
ئەچى کوڵیلە شیعرێنە تەعبیر جە شوناسێوە تایبەتو تاکێوە هۆرامى کەرۊ، پېسە نموونێوە زیڼەى، پەى ئاکارەساتا کە ملو ئېمەى هۆرامیرە ئامێنێ، فرە کەم وزاوەرو باسی و فۆکسشا سەرۆ کریۆ، کە یاگێ داخیچنە دلێ بەشە سۆرانیەکەینە هە م پېسە جوگرافیاى و هەم پېسە زوانى تاویێنێوە نەمەنێنێ. ئاڎ دەسشا وزۆ سەر (ئەرۍ جوان) کریۆ، واتێوە ڕەمزیەبۊ کە مەبەست جە هۆرامانین یانى (ئەرۍ هە ورامان) ئاخر ئېمەى هە ورامیچ خۊ فرێما بە شیمیایى و بە ئە نفال دلېنە شیە یمێ .... و هیچ . بەس ئاڎ پى کوڵیلە شیعرێ و بە هۆرامیانە سۆراخشاکەرۊ و داخەکاشا منویسۆوە، یانى تاو واچوو دلێ کۆسەکایچمانە گېڵۆ شۆنەو شوناسى تێکە ڵبیە و گومبېیەیمارە. ئینە ئتر پەى نەوەى تازەى پێویسش بە فاڕیاى زوانى و، فاڕیاى ویرۆکەردەى وفاڕیاى وەرمە ئینسانیەکایچا، چوونکوم نەوەى تازە ئینا چېروو نۆعاونۆعتەرین هەڕەشانە، هەڕەشێ نەمەنەى زوانى و، چۆڵبیەى لادەگایەکاو نەمەنەى دڼە کلتووریە کاو...تاد.[1]