ساناڵۍ
بەشۍ یەرەمە
جا بازؽ چا ساناڵا و چا هەڕە دیوارا، پەی بەهازی سواقو دیوارەکەیو ساناڵەکؽ، ۋەرو ئانەیەە نەترەکۋ ، بڕؽ ورﮆە سمەریش کەرا تا نەتەقۊ، وەرگەو ئا گرﮆ گەرماو هامنو دەگؽ گؽرۊ، ئیتر گرﮆ کەس بە کەیفو وؽش ، ڕەنگبۆ (ڕەنگای) گرﮆ کەس ئا سمەراشە نەکەرۊ.
جا خاکو لاو ئؽمە فرە نامڎارو مەشهور بؽ چا مەنتیقەنە، کانە خاکەکؽما (گڵیجانە)کؽما بڕؽ یاگؽش فرە چەرمەو جوان بؽ، تامو گەچو ئیسەی دؽ، وەلؽ حەتا واچی پتەوبؽ دماو وشک بېیەیۋش، بڕؽ یاگؽچش خاکؽ زەردی جوانش بؽ ئەجۋ شوشؽ بؽ ، پەوچی گوڵپو من (ئاوی کەوسەرە و خاکی گەوهەرە، پڕ جە گوڵو نەسرینە)،
بەڵؽ ئؽمە دەسما هۋرگؽرت جە قاچ (پا) دایچەنەی، ئی جاریچە پی حاڵۋ من نەجاتم بی.
وەلؽ هاگاﮆار بؽنی ئەﮆا گېیانەم چەنی ڕەفؽقە ژەناو گەڕەکؽ، هەکە سەرەمڕە پؽوەرە بؽنؽ، پەی حەچیؽ بیؽ، چە جای بان ناوای بۋ، خۋ ژەنی هیوایەتشانە، نەک پەی بان ناوای پەی نیشتەیرەی و دەمەتەقؽ و غەیبەتە حەیاتەکەی، خۋ ئانە پەی پەرسەی مەپەرسە.
(باواز بارو چی باسیە، پاخوا پەنەما بزانا چؽوؽ قۋمیۋ)..وەلحاڵ.
هاگاﮆار بؽنؽ جەماعەتو ساوی کوچؽ مرﮆؽ تا لیتەکە کوچؽ وشک بۋوە، چەمم چۋوە بؽ گرﮆ دوؽ ژەنؽ وؽ حەنناو وؽشا دەسشا کەرﮆ ماڵایرەی هەڕو لیتەکەی، تا حەر چؽوؽ خراپؽ پیسؽ و ڕەقؽ و، تەوەنە ورﮆؽ و کڵۋسنؽ هەنؽ پۆ لیتەکەیۋ، پۋ خاکەکەیۋ، لاشا بەرا تا کاتو ساوی دەسشا نەگؽرۋ، جوانتەرو خاستەر ساوش بڎا.
گرﮆو بانو بانجؽڵەکەیشا ماڵارە، چؽوە ڕەقو پیسو خراپؽ و بؽ کەلکەکؽشا چەنە چنیؽ و پۋوە لابەرﮆ و کوچؽ مرﮆؽ و ئیسراحەتشا کەردو ئاوودوؽ چیای وەششا نووش کەرﮆ، خەریکبؽ لیتەکە ورﮆەورﮆە وشک بؽوە، پەوچی ئیتر کاتو ساویش ئاما بؽ، ئانەبؽ گرﮆو ژەنە ڕەفؽقاو ئەﮆؽم حەریۋ جامڵکؽوەشا تا نیمە ئاوی کەرﮆو حەریۋ هؽلەساوؽ (سیرەکۋڵؽوە)شا دەسۋ بؽ یۋ پاڵو یۊینە وەرەشا گؽرتە دەسشا کەرﮆ، بە ساو کەرڎەی لیتە پاکو جوانو تؽکدریاکەی، هەیتا هەیتا ئاویش پژکنؽنؽ وەنە، بە هیلەساوەکؽ (سیرە کۋڵەکؽ) ساوش دؽنؽ و ناوایش ناوؽنؽ، تا گرﮆ ژەنؽ وەرەو وؽش تەمامناش، ساوؽ جوان و بریقەدارشا دا، ئەجؽڎ جاما، ئیتر قەﮆی نیم ساتی مرﮆؽ دیارشۋ، دماتەر و هەمتەر ئامؽوە ساوؽ تەرشا دا، (دوەم ساو_ ڕەقەساو)، تا جوانتەر سواق دریۋ هیچ ترەکؽش چەنە نەمەنۋ، ساف و لوس و جوان بۊ (باوەڕ کەرﮆؽ جە چیمەنتۋی جوانتەر دؽ چەمۋ، ساوی دوەمیچشا (ڕەقەساو)، تەمامناو ئیتر داماگؽ گرﮆ مانؽبؽنؽ، دەسؽو قاچؽشا گۋتؽ بیؽبؽن، تۋ زانی کەیۋن خەریکؽنؽ.
منیچ واتم بخوا نمازوو هەنگامە بنەیدؽ، نمازوو بلدؽوە، ئی نیمەڕوە دەعوەت و ئؽمەندؽ.
تاتەم برنجؽ خڕی جوانش جە هەڵەبجۋ ئاردەبؽ، ئا واڵؽمە نیابؽ سەر، نانوەرﮆؽ و دماتەر تەشریف بەرﮆؽ، یاخوا لاشەتا ساقو سڵامەت بۋ، یاخوا جە قۋمی و هامسایی نەگندؽو خوا شمە بازۋ پەی ئؽمە.
هؽلەساوەکؽ و تەوەنەو هەسانی عاﮆەتەن لاو ئؽمۋ یەرؽ دەرؽما لاوە نزیکؽ بؽنؽ، ژەنی و پیؽ حەر کاتو ساتؽ بەحەرسەبەبؽ ڕاشا کەوتؽ ئا دەرا، چاگە بە کەیفو وؽشا تەوەنەکا هۋرچنؽنؽ هەکە بە کەلک ئامؽنؽ ، هەم پەی هؽلەساوی هەم پەی هەسانی پەی تیژ کەرڎەی (کاردؽ، دارؽ، کەرەمتو، تەوەرداس، مەتؽ، خنجەرە ... فرؽتەریچ)، دەرەکؽما:
1- (دەرەو بەرمەڕای ئیتر حەر جە دەربەلؽوە دەسپەنەکەرؽ حەتا وەرو بەرەو مەڕا (لاوداری).
2- دەرەو خڕی هەکە مەشهور بؽ بە دەرەو بېیارؽ ئاﮆیچ جە نزیکو دەگاو خارگؽڵانؽوە دەسپەنە کەرؽ، تا پەشتەو گۋمەلارؽ ئانە گرﮆ زەمینؽ گوڵپیانؽ، چاگە حەر دوە نەوع تەوەنەکا دەسوزؽنی.
3- حەر پاسە دەرەو باخەکۋنی ئیتر ئانە دەگاو ئؽمەرە وەزؽرە وار حەر جە کانە تەوەنەکاو وەرانوەرو هەنارەکۋڵەیۆ حەتا یاوؽرە و لوؽرە دەرەو بەر مەڕای چاگە تؽکەڵ بؽوە چەنی دەرەکەو وەرومەڕا، ئیتر بەتایبە ئی دەرەو باخەکۋنیە وەرو دەسیمانە بؽ سەرەمڕە پۋرەشەرە ئؽنمؽو لوؽنمؽ، بە درؽژی دەرەکەی ، پەوچی حەر تەوەنؽ ساف و جوانە و وەش دەسەو پەڕ مشتە بیؽ، هۋرش چنؽنمؽ پەی ساوی و سواقی یام پەی هەسانی.
باتا ئؽگە وەسؽ بۋ، منیچ وؽتا زاندؽ ئینە حەمیشە بەشەمەنە، حەر چؽوؽ بۋ، ئادەی کوڕو تاتەیش، ئادەی کوڕو ئەﮆؽش،
ئادەی کوڕو لالوش، ئادەی کوڕو مامۊیش، عاقیبەت ڕوؽ داخیؽ ئی ئادەیانە، سەرەو وؽم ورگؽرو.
منیچ ئامانؽ هیچشا نەﮆانؽ.
بەڵؽ تاتەم پاسکیلؽ یەرە تایەش پەی سانانؽ.
بەهەواو فؽنکو سەحەرو سەر سەعبو هانە لیمۋی، ساڵەکاو حەوتای ویەرﮆەی.
هیدایەت گوڵپی.[1]