عەبوولە
بەشەی یەرەمە
- خێربەی لالۊ ڕەشە، خاسنی دەنگوباست، چی دیارت نیا؟ عەجایبا ئامانی بازاڕ، مەوینوت فرە گوم دیارنی.
+ سڵامەتبی یاخوا، دیاربو چېشکەرو؟ بەخوڎا وەرو ئی کوڕی نەبېیێ مانگی جارێ نێنێ بازاڕ، وێڎ زانی ئی کوڕما بەخشییان جە گرڎ چیوێ دنیانەو قیامەتیچنە، مەیارو لاشەغەرش کەرو گجار بېتاقەتبۆ ماروش پەی بازاڕی ماچو با هەر وېش نەبۊ، زاڕۆڵێ مەخسەرەو لاقرتیێش پەنە کەرا، هەروېشبۆ کەراش فلیمو ئی بازاڕی، واچو چېش چەنی ئانەیچە هەر شوکرنا بە بەشەو خوڎای، گەهاس زیڼە زەلیل بېیێو بە دەسێ ئی دیمو ئەو دیمما کەرڎې.
- لالۊ ڕەشە ئەچی دنیانە هەر یۆما پەیوېش تەنگو چەڵەمێوە سەرە کەرڎەڼە، وەڵێ تۊنە پیێوەو کوڕێ ئامێ ئی چایخانە، پیاکە شانو شەوکەتنە دیاربێ دەوڵەمەنو سەروەتو سامانێ فرەش هەن، دەسش کەرد قسە کەرڎەی، قسێ گولێ، سەقەتێ، نەزان دۆ، دێنێت تەوەنێ تەوەنەکې لتە بې، مەخسەرە کەرڎەی بە عالەمی، ئجێش عالەم نانە وەرو ئاڎین، وېش قسێ کەرېو، جوابو وێچش دېوە، چەنی ئانەیچە ئا داخێ کوشێم وېش نەفاڕێوە بە هەزار عەرەسوێ، گۊشۆ بېنې کابرێوە واتش ئی کوڕشە پەوچی دایېم ئیناش چەنی نازۆ قسێ گولېو دڵئێشنێ کەرۊ، هەرچن قسێ کەرۊ ئی کوڕشە عارەقێ خەجاڵەتی بەرمڎۊنەو جېیاتی تاتەیش ئێڎ تەرېق بۊوە، چەمۆ بېنی ئاڎ هەر قسێ کەرېو ئېڎ سوختێش دېوەنە، زاناش بېدەنگ مەبۊ بەهانېش پێ وێستۆو زنیشرەو بەردشۆ پەی یانەی.
عەفان دەرەمەڕی.[1]