گوندی گەرەوانی خواروو لە دۆڵاکۆی سەربە شارۆچکەی #ڕواندز#

=KTML_Bold=٭ ناوی گوندی گەرەوان=KTML_End=
بەپێی بۆچوونی کەسانی بەتەمەن و خوێندنەوار و شارەزا، لێکۆڵینەوە و لێکدانەوە جوگرافیاییەکان، ناوی گوندی گەرەوان، لە گەری یان گەلی و ئاو سەرچاوەی گرتووە، چونکە کەوتووەتە نێوان هەردووک گەری گەرەوان و گەری ژێری، کە ئاوێکی زۆر بەو گەریانەدا هاتۆتە خوار، بەپێی تێپەڕبوونی کات، (گەری و ئاو) بووەتە گەرەوان، لەلایەکی ترەوە کەوتووەتە نێوان دوو گەروو، واتا (زین)، گەروێ سەرزیخا و گەروێ چاکی، بۆیە بە پێی لێکدانەوەکان ناوی گەرەوان، لەو دوو گەرووە سەرچاوەی گرتووە، لێکدانەوەیەکی تر هەیە، کە ناوی گوندی گەرەوان، لە ناوی گوندی گەورە هاتبێت، چونکە گەرەوان لە ڕووی چڕی دانیشتووان لە کۆن و ئێستا، گەورەترین گوندی دۆلاکۆیە، بە تێپەڕ بوونی کات گوندی گەورە بووبێتە گوندی گەرەوان، بۆچوونێکی دیکەش هەیە، گوایە شوێنی دانیشتنی میر و سەردار و پیاوە گەورەکان بووە، دواتر لە شوێنی گەوران، بووەتە گوندی گەرەوان.

=KTML_Bold=٭ مێژووی درووست بوونی گوندی گەرەوان=KTML_End=
هیچ بەڵگەیەک لە بەر دەست نییە کە بیسەلمێنێ، گەرەوان لە کام ساڵ و زەمەن دامەزراوە، بە پێی گۆڕستان و ئاسارە دۆزراوەکانی گوندی گەرەوان بێت، مێژووی درووست بوونی بۆ کاتێکی زۆر دێرین دەگەڕێتەوە، پێ دەچێت ئاوەدانی لە دەوروبەری گەرەوانیش هەبووبێت، یاخود خەڵکی گوند لەکاتی هاویناندا، کە لەو شوێنانە مردوون هەر لەوێ نێژراون، چونکە گۆڕستانێک لای (بەردی بەردا ونسی) هەیە، بە ناوی (قەبری کوڕە هەندوو)، لە سێوەکیش گۆڕستانێک هەیە، کە سێوەک موڵکی ماڵی شێخی سەرانە، گۆڕستانێکی تریش لە چۆما هەیە، بە ناوی (چاکی زێلەویێ)، گۆڕستانێکی تر لە خوار گوند هەیە، پێی دەڵێن (چاکی گەری ژێری)چەند گۆڕستانێکی زۆر کۆنیش لەناو گوندی گەرەوان هەن، گۆڕی دوو پیاوچاک و ئەسحابەیەکیش لە گەرەوان هەن، کە مێژووەکەیان زۆر کۆنە، گۆڕی (مامۆستای پیرە) کە یەکێکە لە پیاوە ئایینی و ئیماندارەکانی گەرەوان، ئێستاش خەڵک سەردانی گۆڕی ئەو پیاو چاکانە دەکات.
بە پێی گێڕانەوەی دەما و دەم لە باب و باپیرانمانەوە، لە کۆنەوە، گەرەوان شار بووە، بەناوی شاری (زەنگوبات) ئێستاش لە باکووری گوندی گەرەوان شوێنێک هەیە پێی دەڵێن (زەنگ زەنگە) گوایە شارەکە لەوێ بووە، چونکە شوێنەواری ئاوەدانی پێوە دیاربووە، بەڵام بۆ پشتڕاستکردنەوە بەڵگەیەکی درووستی مێژوویی لەبەر دەست نییە، تەنیا لەناو گەری دوو جۆگای ئاو بەقسڵ و گێچ هەڵبەستراون، یەکیان بە ئاڕاستەی بەری تارینێ، هەتا جادە بۆ گەرەوانی سەرەوەش چوو، هەر بەکار دەهات بۆ کاری ئاودێری، بەڵام لە ئێستادا جۆگەیەکی کۆنکرێتی شوێنی گرتووەتەوە، تەنیا کەمێک شوێنەواری ماوە، جۆگەیەکی تر بە ئاڕاستەی بەری گوندی هەڵبەستراوە، بەڵام هیچ کەس لە بیری نییە کە ئەو جۆگەیە ئاوی پێدا ڕۆیشتبێت، بەڵام دەڵێن ئەو جۆگایە بە ناوەڕاستی گونددا تێپەڕیووە هەتا گەیشتۆتە قوڕەگۆ، لەوێش بە گردی مستەفا ئیسماعیلی دا پەریوەتەوە بۆ (زەنگ زەنگە)، بۆیە ئەگەرێکی زۆر هەیە، ئەوێ شاری بووبێ، لەلایەکی ترەوە پاشماوە و ئاسارێکی زۆر لە گردی تووشرێ دۆزراوەتەوە، بۆیە پێ دەچێ سەرەتای دامەزراندنی گوندی گەرەوان، یان بەشێک لە گوند لەوێ دامەزرابێت، چونکە دوو گۆڕستان و دوو پیاو چاکی لێن، پێیان دەڵێن (جۆتەچاکی پاش مزگەوتێ) ئەگەرێکی تریش هەیە ئەو گردە کۆشکی بەگ و میرەکانی گوندی گەرەوان بووبێت.

=KTML_Bold=٭ لە ڕووی جوگرافیا=KTML_End=
گوندی گەرەوان کەوتووەتە باشووری ڕۆژهەڵاتی شارۆچکەی ڕواندز، (13) کیلۆمەتر لە مەڵبەندی شارۆچکەی ڕواندز دوورە، لە ڕۆژهەڵات چیای کارۆخ و لە ڕۆژاوا چیای پێبۆ و سەرچە و قۆپی مەڕەکێویان، لە باکووریش چیای هەندرێن و لە باشووریش چیای ڕەشان و ئاراسن، دواین گوندە لەسەر ڕێگای نێوان ڕواندز و #ڕانیە# بە ئاڕاستەی سایە و سێوەک.

=KTML_Bold=٭ سەرچاوەی ئاو و کانیاوەکان=KTML_End=
ئاوی سەرەکی هەردوو گوندی گەرەوانی خوارێ و سەرێ هاوبەشە تێکەڵاوییەکی زۆر لەنێوان ئەو دوو گوندەدا هەیە، دەڵێن لە کۆندا هەر دووک گەرەوان یەک گوند بووە، گەرەوانی سەرێ هاوینەهەوار بووە، دواتر بە پێی تێپەڕبوونی کات بووەتە گوند.
1 سەروچاوەی ڕوباری گوند، لە گەرەوانی سەرێ هەڵدەقوڵێت، لەنێوان هەردووک گەرەوان هاوبەشە.
2 کانی گەرمک
3 کانی زیخۆرە
4 قورەگۆ
5 کانی کەو
6- کانی مێرگۆرا

=KTML_Bold=٭ هاوینەهەوارەکان=KTML_End=
1 زین
2 بوزان
3 گەرەبناو
4 قەبرۆکە
5 بێڕێش
6 بن بەرد
7 کانیێ سێمەرا
8 پونگین
9 دۆبڕە

=KTML_Bold=٭ کوێستانەکان=KTML_End=
1 کارۆخ
2 کوڕکەوباڕ

=KTML_Bold=* دوو ئاشی ئاوێ لەناو گەری گەرەوان هەبوون=KTML_End=
1. هیی باوکی شێخ ساڵحی سەران بووە
2. هیی عەبدوڵڵای باپیرە گەورەی ڕحمان حسێن فەندی بووە

=KTML_Bold=٭ ئەشکەوت و پەناگەکان لە کاتی شۆڕشەکاندا=KTML_End=
1 گەری گەرەوان کە لە چەند ئەشکەوتێک پێکهاتووە، کە ئەشکەوتێ پوشێ گەورەترینیانە،
2 گەری ژێریش بەهەمان شێوە لە چەند ئەشکەوتێک پێکهاتووە
3 دەروک ئەویش کۆمەڵێک ئەشکەوتن
4 ئەشکەوتێ سۆر
5 ئەشکەوتێ دەرەفرێ
6 زۆر جار لە کاتی بۆردومانەکاندا خەڵکی گەرەوان، ئاوارەی گەرەبناو و بوزان و کانیێ سێمەرا و بن بەرد، بووە و سوودیان لەو هەوارگانە بینیووە، شوێنێکی تر هەیە سرووشتییە، پێی دەڵێن زیندان، ئەوێش سوودی لێ بینراوە، چاڵە لە شێوەی زیندانە.
7- ئەشکەوتێ گۆڕێ پەستەکۆری، بەردی بەڕوو کەرێ، ڕەشکینە کۆگێ، دۆبڕە، پونگین، هەموویان بنکە و بارەگای شۆڕش بوون، لە ساڵانی (1979، 1978، 1977) لە کاتی خەباتی پارتیزانییدا.

=KTML_Bold=٭ بەرەبابەکانی گەرەوان=KTML_End=
1 ماڵە حاجی
2 ماڵە برسی
3 ماڵێ حەمەئاغا
4 ماڵێ وەسمان ئاغا
5 مام شێخەیی
6 ماڵە زەینەڵ
7 ماڵە شێخ و سولاق
8 ماڵە سۆفی حسێن
9- ماڵە چەک ڕەش
10- بەرەبابێ مریشکا
11 بەرەبابێ مشکی خۆرا

=KTML_Bold=٭ ژمارەی ماڵەکانی گوندی گەرەوان=KTML_End=
1- ساڵی 1950 (70) ماڵ بووە،
1- لە پێش ئەنفالەکان نزیکەی ( 120) ماڵ دەبوو،
2-لە ئێستاشدا2024 زیاتر لە ( 200) دەبێت،

=KTML_Bold=٭ خوێندنگەکانی گوندی گەرەوان=KTML_End=
بۆ یەکەم جار لە ساڵی (1969، 1968) لە گەرەوان قوتابخانە کرایەوە، لە تەنیشت (بەردی کاولان) لە حوجرەی فەقێيان دانراوە، يەکەم ماموستا ناوی (ماموستا جەليل) بوو، خەڵکی دەشتی #هەولێر# بوو، خوێندنەکەش بە کوردی بوو،
یەکەم پۆلی قوتانییەکان ژمارەيان (23) کەس بوو،
ساڵی (1970-1971) گوازرایەوە بۆ خانووی ماڵی (فەقێ ئەحمەدی)، لە بەری تارينێ، ماوەی سێ ساڵ لەوێ بووە،
ساڵی (1973-1974) قوتابخانەیەکی نوێ درووستکرا لەسەر موڵکی ماڵی (حاجی سەدر)، قوتابخانە لەوێ بنەجێ بوو، هەتا ئەنفالەکان، لەکاتی ئاوەدان کردنەوەی گوندی گەرەوان قوتابخانە لە گۆڕێ هێسترانێ بنیات نرایەوە، خۆشبەختانە ئێستا یەکێکە لە قوتابخانە باشەکان.

=KTML_Bold=* مزگەوت و حوجرەکان=KTML_End=
بەتەواوی ساڵی درووستکردنی مزگەوتی گوندی گەرەوان ڕوون نییە، بەڵام بە پێی لێکۆڵینەوەکان لەسەروو ساڵی 1960 بە هەردووک گوندی گەرەوانی ژێری و ژۆری واتا خوارێ و سەرێ، لە نزیک بەردی کاولا یەکەم مزگەوت درووستکراوە، یەکەم مامۆستای ئایینی گوندی گەرەوان (مەلا ئەبوبەکر) بووە، سەرەتا هیچ حوجرەیەکی نەبووە، بەڵام سەردەمی مامۆستا (مەلا مەندوح) بۆ ماوەیەک حوجرەیەکی دامەزراندووە، دواتر مزگەوتێکی تریش لە گەڕەکی (مام شێخان) درووستکراوە،

=KTML_Bold=ئەو مەلایانەی لە گوندی گەرەوان بوون=KTML_End=
1. مەلا ئەبوبەکر ئالانەی
2. مەلا مەندوح
3. مەلا حەمەدەمین ڕواندزی
4. مەلا تاهیر حەمەدەمین گەرەوەیی
5. مەلا خالید مەلەکی
6. مەلا حیسامەدین گەڵاڵی
7. مەلا عەزيز ئەحمەد هەمزە گەرەوەیی
8. مەلا حەمەدەمین شاوری

=KTML_Bold=٭ مێژووی گەرەوان لە شۆڕشەکاندا=KTML_End=
بەهۆی هەڵکەوتەی جوگرافیای، کە گەرەوان لە گوندەکانی تری دۆڵاکۆ دوور ترە لە مەڵبەندی شارۆچکەی ڕواندز، بۆیە گەرەوان هەمیشە بنکە و بارەگای شۆڕشەکان بووە، هۆکارێکی تر بۆ دەستنیشان کردنی گەرەوان وەک بارەگای سەرەکی شۆڕش، دڵسۆزی و قارەمانییەتی خەڵکی ئەو گوندە بووە، چونکە زۆربەی گەنج و پیاوە هەڵکەوتووەکانی گەرەوان پێشمەرگە بوون، گوندی گەرەوان یەکێکە لە گوندە هەرە شۆڕشگێرەکانی کوردستان، چەندین پێشمەرگە و فەرماندەی لە ڕێگای ئازادی گەل و نیشتمان بەخشیووە، لە گەرەوان ماڵی وا هەیە، (2-3) شەهیدی سەنگەریان هەیە، گەرەوان خاوەنی زۆرترین ژمارەی شەهیدە لە پێشمەرگە و فەرماندە قارەمانەکانی دۆڵاکۆ.
(ڕەسوڵ وەسمان ئاغا) یەکێک بووە لە سەرکردە ئازا و بوێرەکانی میر نشینی #سۆران#، کە ڕۆڵێکی باڵای هەبووە لە شەڕەکاندا، خەڵکی گەرەوان لە شەرەکانی هەندرێن بەشداریان کردووە، لە تێکشکاندنی ڕووسەکان، کە ئەوکات (پێیان گوتوون حروس)، دوو چەکی جامبێزاریشیان لە ڕووسەکان گرتووە، لە شۆڕشی ئەیلولیشدا زۆرێک لە خەڵکی گەرەوان پێشمەگە بوون، ڕۆڵی قارەمانانەیان هەبووە، بارەگای (عوسمان حوجرانی) لە گەرەوان بووە، لە سەرەتای شۆڕشی نوێشدا وەک یەکەم گوندی ناوچەکە بەشداریان لە هەڵگیرسانەوەی شۆڕشی نوێ دا کردووە، یەکەم پێشمەرگەی مەفرەزە سەرەتایەکان خەڵکی گەرەوانە، بەناوی (عەبدولڕەحمان کەزیانی)، دواتر بەهۆی پەرەسەندنی شۆڕش و دامەزراندنی تیپەکان، بارەگای تیپی (12)ی سۆران لە گوندی گەرەوان دامەزرا، لە شەڕەکانی بەرگری کردن لە دۆڵاکۆ و چالاکی جۆراوجۆر، خەڵکی گوندی گەرەوان ڕۆڵی بنچینەییان هەبووە.
گوندی گەرەوان چەندین جار کەوتووەتە بەر هێرشی دڕندانەی داگیرکەرانی کورد، لە مانگی 11ی ساڵی1976 ڕژێمی #بەعس# بە پشتیووانی لیوای یەک و (ئەمن)ی ڕواندز، هێرشێکی کردە سەر گوندی گەرەوان، بە مەبەستی گرتنی کەسوکاری پێشمەرگە، بۆ ڕێگری کردن لە هەڵگیرسانەوەی شۆڕشی نوێ، لەوێشەوە مەبەستی بوو بەرەو گەرەوانی سەرێ هەنگاو بنێت، ئەوجا بۆ دۆڵی مەلەکان، بەڵام بە گەیشتنی بەرایی سەربازی بۆ ناو گەری گەرەوان، چوار پێشمەرگەی قارەمانی ئەوێ ڕۆژێ، بەناوەکانی (حەمەئاغا، عەبدولڕەحمان کەزیانی، شەهید مستەفا حەسەن، شەهید ڕەسوڵ حەمەد ئاغا)، (دڵشاد سۆفی محەمەد یش لەو دەمەدا بە دەمانچەیەکی چواردەخۆر و عیتادێکی زۆری بڕنۆ، دەگاتە لایان و لەگەڵ ئەو چوار قارەمانە ڕۆڵی خۆی دەبینێت، پێشیان بە سوپای بێشووماری بەعس گرتوو، شەڕێکی قوورس دەستی پێ کرد، دواتر چەند پێشمەرگەیەکی تری قارەمان لە گەرەوانی سەرێ و مەلەکان و سەران و بنمێردە، خۆیان گەیاندە شەڕەکە، هەندێک لە خەڵکی گەرەوان کە لە پێشمەرگەکانی سەردەمی شۆڕشی ئەیلول بوون، واتا شارەزایی شەڕ و جەنگاوەرێکی ئازا بوون، بە هیمەتی خودی خەڵکی تێکۆشەری ناو گوندی گەرەوان، گەورەترین داستانی قارەمانێتیان تۆمار کرد، کە نزیکەی 70 سەرباز و پلەداری ڕژێم کوژران، دەستکەوتێکی زۆریش کەوتە دەست هێزی پێشمەرگە و خەڵکی گەرەوان، بۆ یەکەم جار (شەهید مستەفا حەسەن) چەکێکی (بی کەی سی) گرت، ئەو داستانەش بە خوێنی دوو برای خەڵکی گەرەوان تۆمار کرا، کە ڕۆڵی پێشمەرگەیان دەبینی، بە ناوەکانی (مستەفا عەزيز و ڕەمەزان عەزیز)، شەهید ڕەسوڵیش بریندار بووە، مخابن ئەو داستانە مێژوویە هەتا ئێستا لە هیچ لاپەڕەیەکی مێژووی شۆڕشی نوێ دا تۆمارنەکراوە.
لە بەهاری ساڵی 1977 دوای تۆپبارانێکی سەخت و چڕ، دوژمن هێرشی کردەوە بۆ گرتنی گوندی گەرەوان، لەو دەمەدا چەند مەفرەزەیەک لە پێشمەرگەکانی ناوچەکە بەرگریان دەکرد، دوای چەند ڕۆژێک شەڕ و بەرگریی، لەبەر نا هاوسەنگی هێزەکە و کەمی تەقەمەنی، ڕژێم توانی گوندی گەرەوان کۆنترۆڵ بکات.
لە (24-05-1985)گوندی گەرەوان کەوتە بەر هێرشێکی ئاسمانی فڕۆکەکانی ڕژێمی بەعس، لەئەنجامدا 12 کەس شەهید بوون، کە پێنج کەسیان ئەندامی خێزانی ماڵی (سۆفی محەمەد) بوون، چەندین جاری تر لەبەر تۆپ و تەیارە خەڵکی گەرەوان ئاوارە و دەربەدەری ئەشکەوتەکان بووە، لە ئەنفالەکانی ساڵی 1988، دوای سێ مانگ هێرش و پەلاماری ڕژێم و بەرگریکردنی هێزی پێشمەرگە و بەرگری میللی، دوژمن نەیتوانی گوندی گەرەوان داگیر بکات، تاکوو پێشمەرگە بەیەکجاری پاشەکشێی نەکرد، گوندی گەرەوان هەر بەدەست پێشمەرگەوە بوو، دواتر گەرەوانیش وەک سەرجەم گوندەکانی تری کوردستان تەختی زەوی کراو بوو بە خۆڵەمێش.

=KTML_Bold=* ئەنجوومەنی گوندی گەرەوان=KTML_End=
ساڵی 1982 لە پڕۆسەیەکی دیموکراسی سنوورداردا، لەناو مزگەوتی گەرەوان بۆ یەکەم جار ئەنجوومەنی گوند هەڵبژێردرا، کە پێکهاتبوو لەم بەڕێزانە...
1. وەستا سڵێمان ئەحمەد
2. حاجی کەریم ڕەسوڵ حسێن
3. سۆفی جەبار محەمەد عەلی
4. مەلا عەزيز ئەحمەد هەمزە
5. حاجی کەریم سەعید عەزيز

=KTML_Bold=* شەهیدانی گوندی گەرەوان=KTML_End=
1. شەهیدانی شۆڕشی ئەیلول (6)
2. شەهیدانی شۆڕشی نوێ (57)
3. شەهیدانی شۆڕشی گوڵان (3)
4. شەهیدانی هاووڵاتی (27)
5. کۆی گشتی (93) شەهید...

٭ بە تێکڕای ژمارەی هێزەکانی پێشمەرگە و هێزەکانی ناوخۆ و زیندانیانی سیاسی و کەمئەندامانی سەنگەر و خانەنشینانی شاخ، بە هەموو لایەنەکان، لە دەوروبەری 400 کەس دەبێ.

=KTML_Bold=٭ سەرچاوەی داهاتی گوند=KTML_End=
لە ڕووی بازرگانیشەوە گەرەوان ناوەندێک بووە، بۆ گوندەکانی (سەران، بنمێردە، گەرەوانی سەرێ، دۆڵی مەلەکان) بگرە دۆڵی خانەقا و خۆشناوەتیش.

=KTML_Bold=داهاتی گوندی گەرەوان بریتی بوو لە=KTML_End=
1 کاری ئاژەڵداری
2 ڕەز و باخ
3 کشتوکاڵ
4 لە ئێستاشدا داهاتی سەرەکی مووچەخۆری حکومەتە،

=KTML_Bold=* خزمەتگوزارییەکانی بۆ گەرەوان.=KTML_End=
1.لە ساڵی (1967) بۆ یەکەم جار جادەیەکی خۆڵ هاتە گەرەوان، ئێستاش ئاساری لە زیخینە گەرەوان ماوە،
2. ساڵی (1977) جادەی قيڕ بۆ گەرەوان هات، تاکوو شەڕی ئێران و ئێراق دەستی پێ کرد، ئەو جادەیە ئیشی تێدا دەکرا بەئاڕاستەی شارۆچکەی ڕانیە، لە هاوینەهەواری کۆگێ وەستا، ساڵی 1995 جارێکی تر کاری تێدا کرایەوە، ئێستا بەستراوەتەوە بە شارۆچکەی ڕانییە، بەڵام جادەیەکی خۆڵی ناخۆشە، گەر ئەو جادەیە قیر بکرێت نێوانی ڕانیە و ڕواندز زۆر نزیک دەبێتەوە.
3. ساڵی 1968 مامۆستا مەلا تاهیر، لەسەر ئەرکی خەڵکی گوند بە 180 بۆری ئاوی خواردنەوەی لە گەرەوانی سەرێ بۆ گەرەوانی خوارێ ڕاکێشاوە،
4. بۆ یەکەم جار (جەبار شێخ) (تەسجيل)ی هێنایە گەرەوان.
5. بۆ یەکەم جار (عەبدولڕەحمان کەزیانی) کارەبای مۆلیدە و تەلەفیزیۆنی هێنایە گەرەوان.
* لە ساڵی1991 دەست کرا بە ئاوەدان کردنەوەی گوند، (حاجی کەریم ئاغا ) یەکەم کەس بوو دەستی کرد بە ئاوەدانکردنەوەی گوندی گەرەوان.

=KTML_Bold=* ئەو خزمەتگوزاریانەی لە ئێستادا بۆ گەرەوان کراوە=KTML_End=
1. کارەبای نیشتمانی
2. جادەی قیر
3. تۆڕی ئاوی خواردنەوەی ماڵان
4. تۆڕی مۆبایلی کۆڕەک
5. تۆڕی ئەنتەرنێتی فاستلینک
6. دوو مزگەوت و دوو هۆڵی پرسە
7. بنکەی تەندرووستی
8. قوتابخانەی سەرەتایی تاکوو ئامادەیی
9. باخچەی ساوایان (ڕەوزە)
10. شورای گۆڕستانەکان
11. جۆگای ئاودێری
12. یاریگایەکی تۆپی پێ

لەگەڵ ڕێزی پەیجی دۆڵاکۆ ڕواندز
=KTML_Bold=تێبینی=KTML_End=/ زۆر سوپاسی هەموو ئەو بەڕێزانە دەکەین کە لە ئامادەکردنی ئەو بابەتە هاوکارمان بوون، زیاتر لە شەش مانگ سەرقاڵی کارکردن بووین لەو ڕاپۆرتە مێژوویە، هیوادارین سوودێکی هەبێت بۆ نەوەی ئێستا، خزمەتێک بێت بۆ دەڤەرەکەمان، لە کەم و کوورتیمان ببورن...
ئامادەکار: حەسەن ئەحمەد قادر (Hassan Ahmed)
[1]