بەپێی پێشنیاری کۆمەڵێک پەرلەمانتار، پرۆژە یاسای کردنی سرودی ئەی ڕەقیب بە سرودی نیشتمانی هەرێمی کوردستان دراوەتە پەرلەمانو بڕیارە کە پەرلەمان خوێندنەوەی بۆبکاتو پەسەندی بکات. لە پێشنیارەکەدا هاتوە کە سرودەکە لە گشت بۆنە فەرمیەکاندا لێبدرێتو دەبێ هەموو بەشداربوانی ئەو بۆنانە لەبەر سرودەکە هەستنو بەپێچەوانەوە بە 500000 دینار سزا دەدرێن. هەروەها پێشنیاریش دەکات کە دەبێ سەرجەم هۆیەکانی ڕاگەیاندن لە هەرێم(بیستراو وبینراو) لەسەرەتاو کۆتایی بەرنامەکانیدا ئەو سرودە لێبدەن!
ئەم پرۆژە یاسایە، بێجگەلەوەی کە ئاڵوگۆڕە کۆمەڵایەتیو سیاسیو فەرهەنگیەکانو خاسیەتی چینایەتیبوونی کۆمەڵگاو بەرژەوەندیە ئابوریو سیاسیە جیاوازەکانی خەڵکی کوردستان و گەشەی ڕەوتی ئازادیخوازیو بەها مرۆڤدۆستانەکانی پەردەپۆشکردوە کە لەکاتی دەرچوونی ئەو سرودەوە تا ئێستا ڕویانداوە، هاوکات دەیەوێ بیرو ئایدیۆلۆژیای بزوتنەوەیەکی سیاسی کە بزوتنەوەی ناسیۆنالیزمی کوردە بەسەر سەرجەم کۆمەڵگای کوردستانو ڕەوتو بزوتنەوە سیاسی و فکریە جۆرواجۆرەکانی کوردستاندا داسەپێنێ. ئەم هەوڵەش لەچوارچێوەی ئەو هەنگاوە سیاسیانەی بۆرژوازی کورددا جێگای دەبێتەوە کە دەیەوێ کۆمەڵگای هاوچەرخی کوردستان بە فکرو خورافات و بەهاو نەریتو کەلتورو سیاسەتی بۆرژوا ناسیۆنالیستی کوردەوە گیرۆدەبکاتو بە یاسا هەموو دەرگاکان لەبەردەم بزوتنەوەو ڕەوتە فکریو سیاسیو کۆمەڵایەتیەکانی کوردستان و بەتایبەتی بزوتنەوەو ڕەوتە سیاسیو فکریەکانی چینی کرێکارو ئازادیخوازیو پێشکەوتنخوازیو مرۆڤدۆستیدا دابخات.
ئەم پرۆژە یاسایە ئەگەر پەسەندبکرێو جێبەجێ بکرێت، ئیتر جێگایەک بۆ ئازادی بیروراو فکرو ویژدانو هەڵسوڕانی سیاسی ڕەخنەگرانە لە ناسیۆنالیزمی کوردو کوردایەتی نامێنێتەوە. دانانی سزا بۆ کەسانێک کەلە لە بۆنە گشتیەکاندا لەبەر ئەو سرودە ناسیۆنالیستیە هەڵنەستنو سەپاندنی لێدانی سرودەکە بەسەر دەزگاو کەناڵەکانی ڕاگەیاندندا، هەمان نەریتی ڕژێمە سەرکوتگەریەکانی عێراقو ناوچەکەیە کەئامانجەکەی سەرکوتو بێدەنگکردنی سەرجەم دەنگە جیاوازو نارازیەکانە لە دەسەڵات، تا لەورێگایەوە بۆ هەتا هەتایە دەسەلاتی نایەکسانی خۆیان بەسەر خەڵکی کوردستاندا کە زۆربەی زۆریان کرێکارو زەحمەتکێشن، بهێڵنەوەو ڕێگاش لەهەرجۆرە پێشرەویەکی کۆمەڵایەتیو فکریو سیاسی بگرن لەبەرژەوەندی چینی کرێکارو یەکسانیخوازیو ئازادیخوازی. ئەم پرۆژە یاسایە هاوکات پێناسەیەکی بەزۆرداسەپێنراو بەسەر هاوڵاتیانی غەیرەکوردی کوردستاندا دەسەپێنێو دەبێتە کەرەستەیەکی پەرەدان بە جیاکاریو دورەپەرێزیو ڕکابەری نەتەوەیی لەنێوان هاوڵاتیانی کوردستاندا.
ئەم پرۆژە یاسایە پێچەوانەی ئاوات و ئومێدە ڕاستەقینەکانی خەڵکی کوردستانە بۆ ئازادیو یەکسانیو پێشکەوتنی کۆمەڵایەتیو زەمینەی فکریو سیاسیو کۆمەڵایەتی تەریک کەوتنەوەو دابڕانی کۆمەڵگای کوردستان لە گەشەو پێشرەویەکانی کۆمەڵگای مرۆڤایەتی. بۆیە ئەم پرۆژە یاسایە نەک نابێت پەسەندبکریت، بەڵکو دەبێت لەلایەن ئازادیخوازانی کوردستانەوە بەرپەرچ بدرێتەوە.
حزبی کۆمۆنیستی کرێکاریی کوردستان
12-12-2014
Denna post har skrivits in (کوردیی ناوەڕاست) språk, klicka på ikonen
![](https://www.kurdipedia.org/images/flags/ku.png)
för att öppna objektet på originalspråket!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Denna post har tittat 12,076 gånger
Skriv din kommentar om den här artikeln !