هۆگر کەمال
وتەبێژی پۆلیسی دارستان و ژینگەی پارێزگای سلێمانی ڕایدەگەیەنێت کە هێزەکانیان توانیویانە لەماوەی 24 کاتژمێری ڕابردوودا لە ناوچەکانی پێنجوێن و قەرەداغ 28 کەس دەستگیربکەن، کە سەرقاڵی ڕاوی ئاژەڵ و باڵندەی کێوی بوون.
عەقید هێمن کەمەرخان، وتەبێژی بەڕێوەبەرایەتی پۆلیسی دارستان و ژینگەی پارێزگای سلێمانی، بە خەندانی ڕاگەیاند: لە کاتێکدا ئێمەوە وەک پۆلیسی دارستان و ژینگەی سلێمانی، داواکارین لە هاوڵاتیانی پارێزگای سلێمانی له و ناوچانەی بەفر دایپۆشیووە، ئه و خواردنانەی لە خۆیان زیاد دەبێت لە سەربانی ماڵەکانیان دایبنێن یاخود لە نزیکی کەژ و کێوەکان دایبنێن، بۆئەوەی ئاژەڵ و باڵندەکان لەناو نەچن، بەڵام بەداخەوە بەشێک لە هاوڵاتیان ڕاوی ئاژەڵ و باڵندەی کێوی دەکەن.
وتیشی: "لە 24 کاتژمێری ڕابردوودا هێزەکانی پۆلیسی دارستان و ژینگەی پێنجوێن توانیویانە 22 هاوڵاتی سەرپێچیکار دەستگیر بکەن، کە سەرقاڵی ڕاوی ئاژەڵ و باڵندەی کێوی بوون".
عەقید هێمن ئاماژەی بەوەشدا کە هێزەکانی پۆلیسی دارستانی پێنجوێن لەکاتی دەستگیرکردنی ئه و سەرپێچیکارانە، دەستیشیان گرتووە بەسەر هەشت چەکی جۆری (تاپڕ) و یەک چەکی کڵاشینکۆف و یەک چەکی جۆری (بادی)، ئەمە جگەلەوەی دەستیشیانگرتووە بەسەر 11 سمۆرەدا کە بەشێکیان سەربڕاو بوون".
وتەبێژی پۆلیسی دارستان و ژینگەی سلێمانی، ئەوەشی خستەڕوو کە "لەلایەکی دیکەشەوە هێزەکانی بەشی پۆلیسی دارستان و ژینگەی قەرەداغ لە چەند دەرچوونێکیان بۆ گوندەکانی سنورەکەیان توانیان شەش هاوڵاتی سەرپێچیکار دەستگیر بکەن، کە سەرقاڵی ڕاوی ئاژەڵ و باڵندەی کێوی بوون".
باسی لەوەشکرد کە لەکاتی دەستگیرکردنی ئه و سەرپێچیکارانەدا دەستیشگیراوە بەسەر هەموو ئه و کەرەستانەی بۆ ڕاوکردن بەکاریانهێناوە.
کەمەرخان ڕونیشیکردەوە: "سەرجەم ئه و کەسانەی دەستگیرکراون ڕووبەڕووی یاسا دەکرێنەوە بۆئەوەی سزای یاسایی وەربگرن".
- 12-01-2015