#دواڕۆژ#، #دهۆک#
گەلەک ئاوارەیێن مەسیحی یێن ژ دەشتا #موسل# ژبەر #داعش# رەڤی بوون و خوە گەهاندبوون پارێزگەهێن دهۆک و #هەولێر،# نوکە ڤەدگەرن جهێن خوە و ل دهۆک بتنێ 30 خێزان ماینە د کەمپەکێ دا، لێ ل هەولێر نێزیکی 120 هزار ئاوارە نە ڤەگەریانە مالێن خوە.
ژمارەیا مەزن یا ئاوارەیێن مەسیحی روونشتڤانێن تلسقۆف و باشیک بوون کو گەلەک ژ ئاوارەیێن باشیک و دەوروربەران بەرێ خوە دابوون دهۆک، لێ ل گۆرەی گۆتنێن بەرپرسێ راگەهاندنا بۆردێ کاروبارێن مرۆڤایەتی ل پارێزگەها دهۆک، پتریا ئاوارەیێن مەسیحی ل مالێن ناسیارێن خوە ئاکنجی ب بوون.
سالم سەعید، بەرپرسێ راگەهاندنا بۆردێ کاروبارێن مرۆڤایەتی ل پارێزگەها دهۆک گۆت ژی نوکە ل پارێزگەها دهۆک بتنێ کەمپا گوندێ داودیێ یا مەسیحیانە کو دکەڤیتە ناحیا بامەرنێ سەر ب قەزا ئامێدیێ و 30 مال لێنە.
ژ ئالیەکێ دیڤە دەربارەی ژمارا ئاواەریێن مەسیحی یێن نوکە ل هەولێر، ئەنۆ جەوهەر، بەرپرسێ ئاوارەیێن مەسیحی ل عەنکاوا بۆ دواڕۆژ گۆت تا نوکە 120 هزار کەسێن مەسیحی ژ کلدانی و سریانی و ئاشۆریان ل هەولێرن.
ئەنۆ جەوهەر خوەیاکر ڤەگەریانا مەسیحیان بۆ وان دەڤەرێن کو حەشدا شەعبی و سوپایێ ئیراقێ لێنە، گەلەک کێمە، لێ ڤەگەریانا ئاوارەیان بۆ تلسقۆف زێدەبوویە و تانکو 600 خێزان ڤەگەریانە مالێن خوە.
لدۆر رەوشا ئەمنی یا دەڤەرێن مەسیحیان یێن ل ژێر کۆنترۆلا هێزێن پێشمەرگەیان، لیوا شەفیق چاوشین فەرماندەیێ لیوا 112 یا هێزێن پێشمەرگەیان ل ناحیا باشیک بۆ دواڕۆژ گۆت رەوشا ئەمنی نوکە گەلەک یا باشە، هەر ژ دەمێ باشیک کەڤتیە دەستێ هێزێن پێشمەرگەیان چو روودانێن ئەمنی یان دزیان و کۆشتنێ چێنەبووینە.
ناڤبۆری ئاشکەراکر نوکە دناڤ باشیک دا بتنێ هێزێن پێشمەرگەیان یێن سەر ب وەزارەتا پێشمەرگە و یەکەیێن 70 و 80 هەنە، ل سەر چیای ژی هێزەکا لەشکەری یا ترکیا هەیە، لێ ژمارا وان ناهێت زانین.
ژئالیێ خوە ڤە زەنون یونس، رێڤەبەرێ ناحیا باشیک، بۆ دواڕۆژ، زەلالکر نێزیکی 500 خێزانێن مەسیحیان ڤەگەریاینە باشیک و 11 بیرێن ئاڤێ بۆ وان هاتینە کۆلان و کارەبا ژی دەمەکێ کێمە گەهشتیە ناحیێ، سالا بهێت ژی دەوام دێ ل قوتابخانەیان ژی یا ئاساییی بیت.
10-06-2017