گەرچی ڕۆژێکی وەک یەکی مەی بە ڕۆژی جیهانی کرێکار ناسراوە بەڵام بە دڵنیاییەوە لە ئێران بە هۆی شێوازی دەسەڵاتدارێتی و هەروەها ئه و هەموو قەیران و ئاڵۆزییەی کە لە ناخی کۆمەڵگەی ئێراندا پەنگی خواردووەتەوە و ئاستی بژێوی زۆرینەی کۆمەڵگەی ئێران دابەزییوە و لەم نێوەندەشدا چینی کرێکار و زەحمەتکێشی وڵات تووشی نەهامەتی زۆرتر بووەتەوە، بە تایبەت کە بە هۆی سیاسەتە هەڵەکانی کۆماری ئیسلامی ئێران، لە بوواری ئابووریدا ژیانی هاووڵاتیانی بەره و لێواری هەرەس هێنان پاڵ پێوە ناوه و هەر ڕۆژ دەبینین و دەبیستین کە کرێکاران ناچار بوون لە بەر وەرنەگرتنی چەند مانگەی حەق دەستی مانگانەیان یان کەم بوونی حەقدەستی مانگانەکەیان مان بگرن یان ئەوەی کە لە کار وەدەر نراون و بێکار کراون.
دیاردەی بێکاری و وەدەرنانی کرێکاران لە سەر کار لە لایەن کۆماری ئیسلامی ئێران وەک هۆکاری سەرەکی ئه و دۆخە نالەبارە و هەروەها خاوەنکارەکانەوە بووەتە دیاردەیەکی ڕۆژانە سەرەڕای ئەوەی کە نە گەرەنتی گیان و سەلامەتی جەستەیی و ڕۆحیان دەکریت و نە بەرپرسیارێتیش لە سەلامەتی و دەوا و دەرمانی کرێکاران وە ئەستۆی خۆ دەگرن و تەنانەت پێدانی حەقدەستی کەمی مانگانە بە نیوە و ناتەواویش ناتوانێت تیمارکەر و سارێژکەری ئازارەکانیان بێت بەلام ئەوەی کە گرینگە مانگرتنی کرێکاران بەرامبەر به و باردۆخەیە کە توانیویانە بە گژی ئه و شێوە هەڵسووکەتە دا بچنەوە و لە نەبوونی ڕێکخراوێکی تایبەت بە پاراستنی مافی کرێکاران لە ئێراندا توانیویانە ئازایانە و چاونەترسانە پێداگری بکەن لە سەر مافی ڕەوای خۆیان و له و ڕێگەیەش دا خاوەن چەندین قوربانی و زیندانیە کە هەنووکەش لە بەندیخانەکانی حکومەتدا بەرپەرچی سیاسەتی هەڵەی دەسەڵاتداران و زۆرەملێی خاوەنکارەکان دەدەنەوە.
گەرچی دۆخی کرێکاران لە ئێراندا بە گشتی نالەبارە بەڵام ئه و ناخۆشی و نالەبارییە بۆ کرێکاری کورد چەندین بەرابەرە و ڕەوشی کۆڵبەرانی کورد لە خراپترین دۆخی خۆیدایە و لە ئێستاشدا کۆماری ئیسلامی ئێران دەروازە کۆڵبەرییەکانی لە خەڵکی هەژار و کۆڵبەر داخستووە و بەو بۆنەوە لە شارە سنوورییەکان کۆڵبەران و کرێکارانی سنوور مانیان گرتووە و داوای مافی خۆیان دەکەن. نەتەنیا ستەم لە چینی کرێکار جەستە و دەرونی کرێکاری کوردی بریندار کردووە بەڵکو ستەمی نەتەوایەتی و لە پشت گوێ خستنی مافی ڕەوای ئینسانی تاکی کورد له و کۆمەڵگەیە و لە بن دەسەلاتی کۆماری ئیسلامیدا، هەست و نەستی تووشی ئازار و ئەشکەنجە کردووه، ژیانی لێیان تاڵ کردووە بەڵام ئەوە تاکی ئازادیخوازی کورد و کرێکاری کوردە تا کو ئێستە و لە ژێر ئه و گوشارانەدا بەردەوام هەوڵی ڕزگاری و بەردەوامی خەباتی نەپساوەی نەتەوەیی و چین و توێژەکانی خۆی درێژەداوە تایبەت کە هەم نەتەوەی کورد و هەم چینی کرێکاری کورد لە هەردوو سەنگەری نەتەوایەتی و کرێکاریدا خەباتی بەردەوامیان هەبووە و له و ڕێگایەیشدا خاوەن سەدان قوربانی و شەهید و بەندی و بێسەروشوێن کراوە و لێرەوە وەک یەکێتیی دیموکراتی کوردستان ڕۆژی جیهانی کرێکاران لە چینی کرێکاری کورد پیرۆز دەکەین و بەڵێنییان پێدەدەین هاوخەباتیمان و بەردەوام بوونمان لە داکۆکی کردن لە مافە ڕوەاکانی نەتەوەکەمان و چینی کرێکار تا سەرەنجامی گەیشتن بە ئامانج وەک ئەرکی ژیانی سیاسی و کۆمەڵایەتی و کلتووری خۆمانی بزانین.
بە هیوای ئازادی و یەکسانی
یەکێتیی دیموکراتی کوردستان
10/2/1397ی هەتاوی
#30-04-2018#
Denna post har skrivits in (کوردیی ناوەڕاست) språk, klicka på ikonen
![](https://www.kurdipedia.org/images/flags/ku.png)
för att öppna objektet på originalspråket!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Denna post har tittat 2,493 gånger
Skriv din kommentar om den här artikeln !