ل سنوورێ #دهۆک# دەمێ کوڕەک کچەکێ دخوازیت وەک نەریتەک کچ گەلەک زێران ژ کوڕى دخوازیت، لێ گەلەک کوڕان پێچێنابیت زێران بکرن و کچ ژى ژبەر نەبوونا زێران شووناکەن و ژیێ وان مەزن دبیت.
گەلەک کێمن ئه و کچێن ل دهۆک ل دەمێ شووکرنێ کێمتر 150 گرامێن زێرى ژ کوڕان دخوازن، پترییا کچان ناڤبەرا 150 -300 گرامێ، زێرى دخوازن.
بەیار مەجید، 36 سالى بۆ دواڕۆژ گۆت:2 جار من کچەک خواستییە هەر جار گۆتییە من ژ 300 گرامێن زێرى کێمتر بۆ من بکرى شوو ب تەناکەم و دایکا وێ ژى قبوولناکەت کچاوێ ژ 300 گرامان کێمتر زێران بخوازیت و دبێژیتمن کچا خوە لسەر شارعان نەدیتییە.
ئێک ژ پرسیارێن ل دهۆک پترییا ژنان ل دەمێ هەر دەواتەکێ دکەن دبێژن: بۆکێ چەند زێر خواستینە؟ واتە خواستنا زێران ژ بنەمایێن سەرەکیێن شووکرنا کچانە.
ڤیان رەشید، 23 سالى بۆ دواڕۆژ گۆت:ئەم کچ شەرم ژ هەڤالێن خوە یێن کچ دکەین کێم زێران بخوازین و هەست دکەین بەهایێ مەیێ کێمە.
لدۆر هەمان مژار جڤاک ناس عەبدولرەحمان محسن، بۆ دواڕۆژ گۆت:ئەگەرێ سەرەکى یێ خواستنا گەلەک زێران ژ ئالیێ کچێن دهۆک ئەوە کو کچ وان زێران وەک گەرەنتى بۆ بەردەوامییا ژیانا هەڤژینیێ بکاردئینن دا کوڕ ل پاشەڕۆژێ نەشێت ب هێسانى بەردەت.
ناڤبۆرى خوەیاکر:دهۆک بۆ هەموو تشتان ژ باژارێن دى گرانتره، لەورا کچێن دهۆک زێدەتر زێران ژى ژ کچێن #هەولێر# و سلێمانى دخوازن، چاڤلێکرن ژى ئەگەرەکێ دیە، گەلەک جاران کورژى دبێژیت کچێ گەلەک زێران بخوازە پاشى دێ بخۆ فرۆشین و خانوویەکى یان پارچە ئەردەکى پێکرین.
زێر ئەگەرە کچ شوو نەکەن
بێریڤان جەبار، دەرۆنناس ل دهۆک بۆ دواڕۆژ زەلالکر:گەلەک ژ کچان تەکەزێ ل خواستنا گەلەک زێران دکەن، لەورا هەردەمێ کوڕان زێر بۆ نەکرین شووناکەن و ژیێ وان مەزن دبیت و نوکە ژمارا کچێن ژیێ وان مەزن ل دهۆک بەرەڤ بلندبوونێ دچیت.
ژمارەکا وان کچێن ژیێ وان مەزن ناڤێن خوە ل توورا گەشەپێدانى جڤاکى نڤیساندینە و مەهانە موووچەیێ حکومەتێ وەردگرن.
رزا نایف، رێڤەبەرێ تورا گەشەپێدانا جڤاکى ل پارێزگەها دهۆک بۆ دواڕۆژ گۆت:نوکە 200 کچێن ژیێ وان مەزن، ل دهۆک مووچەیێ حکومەتێ وەردگرن، لێ ژمارا کچێن ژیێ وان مەزن گەلەک زێدەترە و ناڤێن خوە نەنڤیساندینە یان ژى ل رێڤەبەریێن دى مووچە خۆرێن حکومە‌تێنە.
نوکە ل سنوورێ پارێزگەها دهۆک خەرجیێن کرینا زێران ژ ئالیێ کوران بۆ کچان ناڤبەرا 15-30 هزار دولارێن ئەمریکى دایە، ژبلى خەرجیێن دى یێن داوەتێ کو گەلەک جاران ئه و خەرجى ژى دگەهنە نێزیکى 10 هزار دولارن و تانوکە جڤاکێ دهۆک بگشتى نەبوویە هاریکار ڤان نەریتان و خەرجییان کێم بکەن.[1]
#29-10-2018#