شاعیر و ڕۆژنامەنووس، بەڕێوەبەری نووسینی ڕۆژنامەی #ڕیا تازە# لە یەریڤان پایتەختی ئەرمەنستان. وەک کوردێکی ئێزیدی زیاتر لە هەموو کوردێک شانازی بە کوردبوونی خۆی و وڵاتەکەی کوردستان دەکات، زۆر دژی ئەو کەسانەیە کە دەڵین ئێزیدی کورد نین، پێی وایە ئەگەر ئێزیدی کورد نەبن، ناتوانن هیچ نەتەوەیەکی دیکە بن، چونکە ئێزیدی دینە و نەتەوە نییە.
ڕۆژنامەی ڕیا تازە کە لە ساڵی 1930 ەوە لە وڵاتی ئەرمەنستان بڵاو دەبێتەوە و هەتا ئێستاش پەکی نەکەوتووە و هەر بەردەوامە لە بڵاوکردنەوە، ئێستا هەر مانگێک دوو ژمارەی لێ بڵاو دەکرێتەوە. بەم پێیە ڕیا تازە بە تەمەنترین ڕۆژنامەی کوردییە کە بۆ ماوەی نزیک بە 90 ساڵە بڵاو دەبێتەوە.
دەرچوونی ئەم ڕۆژنامەیە بۆ ئەم ماوە درێژە ڕۆلێکی گەورەی گێڕاوە لە گەشەپێدانی زمانی کوردی و پێگەیاندنی نەوەیەکی کوردی خوێندەوار بە زمانی کوردی لە وڵاتی ئەرمەنستان و ناوچەی قەوقاز.
لە ئەرمەنستان 21 گوندی کورد هەیە، نزیک بە 45 هەزار کەس دەبن و زۆرینەیان کوردی ئێزیدین.
کوردەکانی ئەم هەرێمە بە کوردییەکی کرمانجیی باکووری زۆر ڕەوان و پەتی قسە دەکەن، سەرەڕای دووریان لە کوردستان بۆ ئەو ماوە درێژە کەچی کوردییەکەیان بە دەگمەن نەبێت وشەیەکی ئەرمەنی یان ڕووسی تێدا نییە.
لە گوندە کوردنشینەکان هەر هەفتەی دوو سەعات زمان و ئەدەبیاتی کوردی دەخوێنن. ئەم مافی خوێندنە بە زمانی کوردی لە ساڵی 1923 لە سەردەمی حوکمڕانی سۆڤیەت دەستی پێ کردووە و هەتا ئێستاش ئەو مافەیان هەیە و بە کوردی دەخوێنن. لە سەرەتادا واتە لە ساڵانی سییەکان چلەکانی سەدەی بیستەم هەتا قۆناغی حەوت هەموو دەرسەکان بە کوردی بووە و بە هەموو بابەتێکیش بووە، واتە فیزیا و کیمیا و هەندەسە و جەبر و جوگرافیا و مێژوو بە کوردی خوێندراوە، بەڵام دواتر کەم دەبێتەوە و ئێستا تەنیا دوو سەعاتە و دوو کتێب دەخوێندرێ کە ئەویش زمان و مێژووی ئەدەبیاتی کوردییە
Denna post har skrivits in (کوردیی ناوەڕاست) språk, klicka på ikonen
för att öppna objektet på originalspråket!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Denna post har tittat 1,941 gånger
Skriv din kommentar om den här artikeln !