دەقی پەیامەکەی #قوباد تاڵەبانی#:
ساڵی 1975 کە سەرۆک #مام جەلال# و هەڤاڵانی دەستیان بەخەباتی نوێی کوردایەتی کردو یەکێتیی نیشتمانیی کوردستانیان دامەزراند، بەئامانجی ڕوونەوە هێڵە گشتییەکانی بیڕوڕای یەکێتییان داڕشت. ئەو کاتە، گفتوگۆی چڕی هەڤاڵانی دەستەی دامەزرێنەر بۆ ئەوە بوو کە یەکێتی بگاتە گەڵاڵەی ستراتیجێکی پێشکەوتنخواز و دیموکرات و کوردانە لەپێناو خزمەتکردنی گەلی کوردستان و ڕوبەڕووبوونەوەی ستەم و تاوانەکانی دەسەڵاتی عیراق، بەجۆرێک کە لە توانایدا بێت گەلی کوردستان لە نائومێدییەوە بگوازێتەوە بۆ سەردەمی نوێی و تێکۆشان، بەم هیوایەوە لە شەوەزەنگی نائومێدیدا چرای ئومێدی هەڵکرد.
سەرۆک مام جەلال لە نامیلکەی (یەکێتیی نیشتمانیی کوردستان بۆچی؟) کۆبەندی هیواو ئاواتەکان، پرسیارو وەڵامەکانی کردە ڕێنوێنی یەکێتییەکان و نامیلکەی گیرفانی پێشمەرگەو کادیران و ئەندامانی یەکێتی، هەر لەم نامیلکەیەدا شوناس و ئەرکی تێکۆشەرانی ناو یەکێتیشی دیاری کرد.
دیارە لە هەموو قۆناخێکی سیاسیدا، پرسیاری نوێ دێتە ئاراوەو وەڵامی یەکێتییانەش هەر دەبێ پڕ بەپێستی ئەرکەکانی هەلومەرجی نوێ بێت. قۆناخی تازەی کۆمەڵگەی کوردستان پێویستی بە پرسیاری تازەو وەڵامی تازەش هەیە.
لەهەموو وێستگەکانی کەمپینی هەڵبژاردنەکانی کوردستان و عیراق و بۆنەکانی تری جەماوەریدا، لەکاتی کۆبونەوەو گفتوگۆی هەڤاڵانەشم لەگەڵ کادیرو دڵسۆزانی یەکێتی، ڕووبەڕوی ئەم پرسیارانە دەبمەوە: یەکێتی چی پێیە بۆ دواڕۆژی کوردستان؟ پلان، ستراتیج و دیدگای چییە بۆ پرس و بابەتە هەمەجۆرەکان؟ ڕاستە یەکێتی مێژوویەکی پڕ شانازی و دەسکەوتی دیاری هەیە، کاروانێکی دورو درێژی شەهیدان و خەباتێکی هەمەلایەنی فیکری و سیاسی هەیە لە سەرخستنی پرسی ڕەوای گەلەکەماندا، سەرکردەی مەزنی وەک مام جەلالی پێشکەشی کوردستان کردوە، لە چەندین بواری سیاسی و کۆمەڵایەتی و کلتوریدا دەستپێشخەر بووە، بەڵام هێشتا پرسیاری زۆر ماون کە یەکێتی چی پێیە بۆ دوارۆژ و ئایندەی نەوەکانی داهاتوو؟ لەهەمان کاتدا لە واقعی ئێستادا کێشە ڕاستەقینەکانی بەردەم یەکێتی چییە و چۆن بتوانێ لە هەموو ئاستەکاندا دونیابینی خۆی نوێ بکاتەوه؟ یەکێتییەکان دەپرسن و هەقیشیانە، ئاخۆ ئیتر بە چ دڵنیایی و متمانەیەکەوە پڕۆژەی یەکێتی و ستراتیجمان بۆ (ئاشتی، دیموکراسی، مافی مرۆڤ و چارەی خۆنوسین) سەربخەن؟ پرسیارەکان کە لێمان دەکراو خۆشمان لەناوخۆمان تاوتۆی دەکەین، پرسیاری ڕاست و ڕەواو بەجێن. یەکێتییەکانیش ئەم پرسیارانە لە خۆیان دەکەن و بەدوای وەڵامدا دەگەڕێن کە هەم درێژەی ڕێگای تێکۆشانی چوار دەیەی ڕابڕدوو بێت و هەمیش ئاسۆی ڕوونی دواڕۆژی گەلەکەمان نیشان بدات. لەم پێناوەدا ئێمە دیالۆگ و دیداری چڕوپڕمان پێویستە بۆ ئەوەی پێکەوە بیر لە گەڵاڵەیەکی پڕو دەوڵەمەند و کاریگەر بکەینەوە. تا سەرەنجام شوناسی سیاسی و کۆمەڵایەتی یەکێتیش ڕونترو جیاوازییەکانی بەرچاوتر بێ بۆ هەمووان.
بەشانازییەکی زۆرەوە هەڤاڵانم لە مەکتەبی سیاسیی و ئەنجومەنی سەکردایەتی ئەم ئەر کەیان پێ سپاردم کە دیداری یەکێتی ساز بکەین و سیاسەت و دیدی یەکێتی لەم قۆناغە نوێیەدا دیاری بکەین لە هەموو بوارەکاندا، بەندەش داوادەکەم هەموو هەڤاڵانم هاوکار بن بۆ ئەوەی پێکەوە شان بدەینە بەر ئەم ئەرکە حزبییه و جێبەجێی بکەین .
(دیداری یەکێتی) کە بە پەرۆشییەوە دەستمان داوەتێ و مەبەستمانە لە فراوانترین و بەرزترین ئاستدا سەرپێی بخەین. لەم ڕوانگەوەیەوە دەبێتە دیداری خەمخۆری و هەوڵی یەکێتییانەیە بۆ نوێبونەوەو چاکسازی و بەهێزکردنی پێگەی یەکێتییە لە هەموو ئاستەکان.
هەڤاڵان! ڕاستە لە کۆنگرەی چوار کە ناوی (کۆنگرەی نوێبوونەوە)بوو، گۆڕانکاری و نووێبونەوە لە پێکهاتەو هەندێ لە کاراکتەرەکان کرا، بەڵام بەداخەوە لەبەر چەندین هۆ، کۆنگرەی چواریش نەبووە هۆی نوێبوونەوەیەکی جەوهەری و ڕاستەقینە لە فکر و دیدی سیاسیمان بۆ ئایندەو دواڕۆژی یەکێتی و وڵاتەکەمان. بۆیە پێویستە ئەم دیدارە نوێبوونەوەی جەوهەری و ڕاستەقینە بکاتە ئەرکی سەرەکی خۆی و پەرەی پێبدا، ئەم ئەرکەش بەلای منەوە چەند حیزبییە ئەوەندەش نیشتیمانی و ئەخلاقییە. چونکە بوونی یەکێتییەکی بەهێز گرەنتی پاراستنی ئازادییەکان و بەدیهێنانی خواستی کۆمەڵانی خەڵکە، کە ئەوەش نیشانەی وەفاو پێزانینە بۆ خەباتی شەهیدان و ئەوانەی لە ڕابڕدوی خەباتی یەکێتی و کوردایەتیدا ڕەنجیان داوەو ماندو بوون.
ئەم دیدارە بانگەوازێکی هەڤاڵانەو نیشتمانییانەیە بۆ تاوتوێ کردنی واقعی ئێستای یەکێتی و ناسنامەکەی، بۆ نوێکردنەوەی گوتاری سیاسی و کۆمەڵایەتی و گەشەپێدانییەتی، بۆ ئەوەی بەدیدگایەکی نوێوە ئامادەبێت ئەرکەکانی سەرشاشنی جێبەجێ بکا و سەرەنجام باشتر خزمەتی کۆمەڵانی خەڵک و خاکی کوردستان بکات، بۆ سبەینێیەکی باشتر کوردستانێکی ئاوەدان بۆ هەمووان، بێ جیاوازی، فەراهەم بکات.
لەم چواچێوەیەدا(دیداری یەکێتی) دەیەوێ چەندین تەوەری جێی بایەخی ئێستاو ئایندەی حزبەکەمان، پێداویستی و کێشەو پێشهاتەکانی کۆمەڵگەکەمان، ئەزموونی سیاسی گەلەکەمان تاوتوێ بکات، چونکە پێشهات و گۆڕانکارییەکانی کۆمەڵگا و سەردەم لە ئاستی کوردستان و دەرەوەشدا ئەم هەوڵ و کۆششە تازەیە دەخوازێت. پێویستمان بەوەیە لەهەموو سێکتەرەکاندا، دیدی نوێ و دەسپێشخەری یەکێتییانە بێنینە کایەوە.
چونکە بوونی یەکێتییەکی بەهێز گرەنتی پاراستنی ئازادییەکان و بەدیهێنانی خواستی کۆمەڵانی خەڵکە، کە ئەوەش نیشانەی وەفاو پێزانینە بۆ خەباتی شەهیدان و ئەوانەی لە ڕابڕدوی خەباتی یەکێتی و کوردایەتیدا ڕەنجیان داوەو ماندو بوون.
ئەم دیدارە بانگەوازێکی هەڤاڵانەو نیشتمانییانەیە بۆ تاوتوێ کردنی واقعی ئێستای یەکێتی و ناسنامەکەی، بۆ نوێکردنەوەی گوتاری سیاسی و کۆمەڵایەتی و گەشەپێدانییەتی، بۆ ئەوەی بە دیدگایەکی نوێوە ئامادەبێت ئەرکەکانی سەرشاشنی جێبەجێ بکا و سەرەنجام باشتر خزمەتی کۆمەڵانی خەڵک و خاکی کوردستان بکات، بۆ سبەینێیەکی باشتر کوردستانێکی ئاوەدان بۆ هەمووان، بێ جیاوازی، فەراهەم بکات.
لەم چواچێوەیەدا(دیداری یەکێتی) دەیەوێ چەندین تەوەری جێی بایەخی ئێستاو ئایندەی حزبەکەمان، پێداویستی و کێشەو پێشهاتەکانی کۆمەڵگەکەمان، ئەزموونی سیاسی گەلەکەمان تاوتوێ بکات، چونکە پێشهات و گۆڕانکارییەکانی کۆمەڵگا و سەردەم لە ئاستی کوردستان و دەرەوەشدا ئەم هەوڵ و کۆششە تازەیە دەخوازێت. پێویستمان بەوەیە لەهەموو سێکتەرەکاندا، دیدی نوێ و دەسپێشخەری یەکێتییانە بێنینە کایەوە.
هەڤاڵان! با ڕاشکاو بین و بەکراوەیی قسە بکەین، ئێمەی یەکێتی دەمێکە تووشی چەندین کێشەو گرفتی هەمەجۆر بوینەتەوە، کە زۆر جار باجی قورسمان لەسەری داوە، ئەگەر بۆ داهاتوش بەجدی و دڵسۆزانە هەوڵی چارەسەرو تێپەڕاندنیان نەدەین، دوور نییە توشی کێشەو گرفتی گەورەتر نەبین. جگە لەوەش دۆخی تازەی کۆمەڵگاو هەلومەرجی ئابوری و سیاسی وکۆمەڵایەتی نوێ، پرسیارو کێشەو ئەرک و پێداویستی نوێی هێناوەتە کایەوە، کە وا دەخوازێ دوودڵ نەبین لە گفتوگۆو ڕاگۆڕینەوە بۆ دەستنیشانکردنی کەموکوڕیەکان و دۆزینەوەی چارەسەرەکان. بۆیە پێمان وایە دیالۆگ و گفتوگۆیەکی ڕاشکاوانەی هەڤاڵانی یەکێتیی لەنێوخۆمان، هەم گیانی هەڤاڵێتیمان گەرموگوڕ دەکاتەوە و هەمیش جوانترین و بە کەڵکترین بیروباوەڕەکان دەخاتە خزمەت دەسپێکردنەوەیەکی نوێی تێکۆشانمان.
هەڤاڵان! ئەم وتارە بۆ ناساندنی سروشتی دیدارەکەو لەهەمان کاتدا داواکارییەکە لە هەمو و هەڤاڵانمان لە ناوەوەو دەرەوەی وڵات بۆ ئەوەی بەشدارێکی کارا بن لە دەوڵەمەندکردنی و سەرەنجام لە گەشەپێدان و نوێکردنەوەی گوتاری سیاسیی و فیکری یەکێتی لە دەیەی سێیەمی ئەم سەدەیەدا: سەدەی بیست و یەک.
هەڵبەت زیاتر لە پەنجەرەیەک و پتر لە ڕێوشوێنێکی کراوە هەیە تا بیروڕاکان لە خزمەت دیدارەکە گەڵاڵە دەبن و پێکەوە بیربکەینەوە بۆ خزمەتی دیدو ستراتیجی نوێی یەکێتی.
بەو ئامانجە، پیرۆزانەوە هیوادارین ڕێوشوێنی پێویست بگرینە بەر بۆ ئەوەی دیداری یەکێتی ببێتە دیداری گشت یەکێتییەکان.
هەڤاڵانی خۆشەویست
فەرمون لەم وتارەوە هەڵمەتێکی فراوان دەسپێبکەین، پێکەوە کەسوکاری سەربەرزی شەهیدان، پێشمەرگە وتێکۆشەرانی حزبایەتی و خەباتی پیشەیی و دیموکراتی خوێنکاران و لاوان، کچان و کوڕانی ئایندەخواز، ڕۆشنبیران و نوسەران و ئەکادیمیانی ئەندام و دۆستی یەکێتی، کەسایەتییە ئایینی وئابوریناس و وەر زشوانی خەمخۆری کوردستان، کارێک بکەین دیدارەکە بکەینە بۆنەیەک بۆ جۆشدانەوەی حزبایەتی ڕاستەقینە لە پێناوی ئامانجە دوورمەوداکانی حزبەکەی مام دا. دەمەوێت هەموو هەڤاڵان بەشدار بن لە دیاریکردنی سیاسەت و دیدی یەکێتی.
هەروەها لەم وتارەوە دەمەوێت سەکۆی دیداری یەکێتیتان پێ بناسێنم. جگە لە کۆڕو کۆبونەوەکانمان، ئەم سەکۆیەش دەکە ینە پردێکی پەیوەندی نێوانمان و زۆرترین دیدو پڕۆژەو بۆچونەکان کۆکەینەوە و ئامادەی بکەین بۆ ڕۆژی دیداری یەکێتی کە لە ئایندەیەکی نزیکدا کات و شوێنەکەی دیاری دەکرێن.
سایتی دیداری یەکێتی
تا ڕۆژی دیداری یەکێتیی، بە هیوای دیدار... بۆ پێشەوە
قوباد تاڵەبانی
سەرپەرشتیاری مەکتەبی سکرتارییەتی سەرۆک مام جەلال[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!