باخچێوە بېگەرد

بەرهەمێ بە پېز و سەنگین و بە شەوقو (میرزا ئۆلقاڎرو پاوەی)، ئی بەرهەمە زادەو ژیوای دمایین ساڵەکا تەمەنو میرزا ئۆلقاڎرین، هینو سەردەمو گېڵایۆ یەکجاریی میرزاین پەی دنیاو خوڎاپەرەسی و زوهدی و تەقوای، بەرهەمێن بە تاق و تەنیا وېش پەی میرزا ئۆلقاڎری و پەی مەکتەبەو هۆرامانی و کوردەستانی مایەو شانازین.
بەرهەمێ توولانین، تاریخین، باس جە دەسەڵاتەکا زاتو هەقی کەرۊن، باس جە تەمامو سیفەتەکاش، دماتەر تۊمارو سەردەمو ئامای پېخامی پەی یەکەمین هۊرچنیاو خوڎای سەرو زەمینیۆ، باس جە ژیوای حەزرەتو ئاڎەمی سەلامو خوڎایش سەربۊ، دماتەر باس جە ژیوای بەشێ فرەو جە پېخامئاوەرەکا کەرۊن، تا مەیاوۊ بە سەروەختو خاتەمو پېخامئاوەرا(محمد_ص). دمایی ژیوای خەلیفەکاش، یارەرەکاش، پیاخاسەکاش کەرۊن.

باخچێوە بېگەرد
نویستەی: میرزا ئۆلقاڎرو پاوەی
بەشۊ یەکەمۍ
سەرەتا میرزا ئۆلقاڎر پېسە بەڼێوە وەردەمو خالقو ئاسمانی و زەمینینە مدران و کەوتەن تاریفدایش.
بە نامۍ بېچوون، فەردی ذولجەلال
جیهان ئافەرین، ڕوژ و ماهو ساڵ
یا حەیی بېچوون، پادشای ئەکبەر
قەدیم و قادر، حەی تەواناگەر
کەریم و کارساز، کەرەم فراوان
ڕەحیم و ڕەحمان، تەمام عالەمیان
بېڕەنگ، بېبەدەل، بېشەریک، بېکەس
زاتی بېزەواڵ، فەردی فەریادڕەس
حەللی موشکیلات، ئاشوفتە کاران
ئاگا جە عوسیان، گشت گوناهباران
دارای جیهاندار، دەهەندەی بېباک
ئافەریدەی جېنس، ئادەمی جە خاک
نگەهداری خەڵق، نەو تاقی گەردوون
ئوستادی ئەزەل، کار کون، فەیەکوون
دەهەندەی بېباک، دانای بېنیاز
میعماری دەوران، دنیای ڕۊشن ساز
تەنیای لا مەکان، فەردی بۍ نەزیر
بېدیڎەی، بېگۊش، سەمیع و بەسیر
گۊیای بېزوبان، ڕەهنمای خەلیل
قورئان و زەبوور، تەورات و ئینجیل
بېهەمتای ئەعزەم، واحیدی ئەحەد
تاقی لەم یەلید، هەم وە لەم یولەد.
[1]