Payîz hat..
Sibehê rabûm, çavên min li wê dara serqot ket, dara rûçilimisî, dara tazî û westiyayî ku êdî qelîşekên rûyê kûr bûbûn. Darê şehek di destan de û porê xwe yê zerî henekirî hêdî hêdî dadiweşand. Milet di ber re derbas dibûn û bixwe re dikirin vinevin, ji ber ku dar êdî tazî bûbû. Erê, gelek gotinên çort ji devê wane genî bêhn dida, ku hemû kolan bi bêhnê belav bûbû. Lê dara westiyayî, êşiyayî, êdî bîbikên çavên wê zuha bûbû ji giriyê, mecûbûre ku êşên xwe, kulên xwe, derdên xwe û bîranînên xwe li vî bajarê biweşîne û berê xwe bide zivistanên qerisî, berê xwe bide li wan çol û beyarên ji berfê qeşa girtî, da ku bikaribe xwe ji berfa spî bişo. Şeha darê li ber çiqilke wê ket, ew çiqil şekst û xwîn jî jê nehat, ji ber ku êdî zuha bûbû. Ji nişkêve bayekî kurr hat, darê vê re kire xuşînî û hemû pelên zerî hişkbûyî ji sîng û bera xwe daweşandin, xuya bû ku dar diqêriya, diêşiya, dinaliya û dikewkriya ku çawa ew pelên ku ewqas rojine xwedî dike, niha jî ji guliyên xwe bi êşanî dirûçikîne. ma qey darê nikaribû barê van êşan rabikra?!.. Dar çima îro di werza xatiexwestina xwe de diêşe.. diêşe.. diêşeee. Ma darê nizanibû ku tekoşîna ji germahiya zêde weşandina êşê jî heye?!..
A niha pel jî çûn.. tenê neviyên darê, çiqilên serqot ji dara birîndar û westiyayî mane. Ez zanim wê niha bûdemçî jî were û dîsa serê wan çiqilan birîn bike, dîsa dê birînên darê ji nû ve vebin. Hîna ne bes e, min dît ku çawa ji sînga darê kurmên reş û qelew derdikevin ku hemû sepeta darê reş dikir, darê çiqasî rehên xwe berdabû kûrahiya axê jî, lê jan dida jan, birînên xwe bi axê derman dikir. Dema ku ez çûm li ber dara westiyayî seknîm, min dît hemû pelên Zerî hişk êdî ji dest darê çûne û li hemû kolanan belav bûne. Êdî ew pel ne ayîdî wê darê bûn. her ku ba û bahozên payîzê bilintir dibû ew pelên ji erdê belavbûyî ji darê dûr diketin û riya xwe jî wenda dikirin. Dema ku min destê xwe xwarî erdê kir û peleke zer rakir, min dît ku dîsa bayekî qebe hat û dîsa dar qêriya pelên û di sîng û bera wê de mabûn jî hemû bi carekê ji xwe rûçikandin.[1]