سەر ددت ئابێ کەوسەرێ، زەمزەمەیێ سەمایێ زولف
سایە نومایە خاوەرێ، سدرەیێ مونتەهایێ زولف
سایە نومایێ جەبهەتێ، نەقش و خەتێ ژ قودرەتێ
نوقتە و حەرف و جەزمە تێ، بال و پەڕێن هومایێ زولف
بال و پەڕێن سفەت هوما، سایە ل جەبهەتێ نوما
خەمری و زولف چوونە سەما، یەک ب یەک ئەو ل بایێ زولف
نەترک و بەلگ و شەترییان، ڕەقسە ژ ڕەنگێ خەمرییان
باز و عوقاب و قومرییان، سەیرە سەحەر ب تایێ زولف
هەر مە ژ بورجێ سونبولە، پەنجە د سینە و دلە
دوور و دراز و موشکلە، قسسەیێ ماجەرایێ زولف
بەستنە زولف دەر کەمین، حەلقە ب حەلقە چین ب چین
یەغمە دکن دلان نهین، نینە یەقین خەتایێ زولف
ڕۆم و عەرەب ژ هەر تەرەف، جەنگ و سەواشە وان ب خەف
هندی و زەنگی سەف ب سەف، هاتنە بەر لوایێ زولف
هەر دەم و هەر سەعەت ژ نوو، پێتە د سینە نار و دوو
سەبر و قەرارێ من ژ کوو، عاشق و موبتەلایێ زولف
زولفێ سیاهێ بێ وەفا، قەت مە نەدی ژ وێ سەفا
کوشتمە ئەز ب سەد جەفا، ئاه ژ دەست جەفایێ زولف
زۆر و فەقیر و موبتەلا، زاهد و سووفی و مەلا
کوشتنە ئەو ب سەد بەلا، کەس نەکەڤت بەلایێ زولف!
#مەلای جزیری# [1]