داستانۊحەیدەری و سنۊبەرۍ
بەشۍ چل و هەشتەمە
پیرەژەنەکۍ (دایە) جە گېڵنایۆ هەواڵەکا پەی حەیدەر بەگی بەردەوامەنە، کە یانەو سنۊبەرۍ گوزەریا و هامشیریەکەیش پەی ئاردە. باس جە ئاهەنگو وەشی و گورانیواتەی کەرۊن، چەنی حاڵ و وەزعو سنۊبەرۍ کە هامسەرگیری نابەدڵی چېش پەنەکەردېنە:
نیشتەبۍ زویر، خەمین و خەمبار
زار زار مەگرەوا، جە هېجرانی یار
چەودەم پاخوان، ئامان بە سەردا
هەریەک خوانی زەڕ، گرتەن جە سەردا
وە ئاهەنگی ساز، چەنی مەهوەشان
وە باڵای خاسش، کەردەن زەڕ ئەفشان
مەشغووڵ بین وە ئەمر مەششاتەگەریی
پەی جەلای جەمین هومەیلای پەریی
خوانی ئارایېش، چەنی کەشتی سەوز
نېیان بە حوزوور، ماهی دڵئەفرووز
ئەوەڵ، سیای حەی دوو فەرق کەردەن
بە عەتر و عەنبەر، سەندەڵ پەروەردەن
خەم دان، وە حیشمەت ئامان جە سەردا
مېقرازی کەردەن، بە ڕووی قەمەردا
کۊرپە حەیتەران، سیای قەترانی
کەردەن، سەراوېز، تەختی پېشانی
نم دان بە قەترەی مائلوەردەوە
ئەفشان بیی وە ناز، تەختی زەردەوە
ئەبرۊش بەو سورمەی ماویی جە لا دان
چوون قورسی قەمەر، نە خۊر هوەیدان
کېشاش وە دیڎەش سورمەی عەتاریی
ڕەما، جە سامش، ئاهووی تەتاریی
سورخابی فەرەنگ، چەنی سفیدئاب
ماڵان، بە گۊنای ماهی جەهانتاب
زەڕگەر پەی ئەفشان وە بوومی شەندەن
چند خاڵی ماویی، وە بوومش تەندەن
تەماشا بکەر، جە لای جەمینش
وە سورمەی کشمیر، بەستەن سەروینش
چەند دانە یاقووت ئەڵماسی گەوهەر
کەردەن وە سەروین، ماهی مونەوەر
ماهیچە کەردەن، گۊشوارانی ڕەنگ
داشان بەو نازار، شەیدای شۊخی شەنگ
باڵ وە باهووبەند، لەعلی بەدخشان
وە دەستوەنی دەست، مرواریی غەڵتان
وە پەنجەی بلوور جە گوڵ نازکتەر
جە دانەی ئەڵماس، کەردەن ئەنگوشتەر
یاقووت و ئەڵماس، مرواریی ئەحمەر
پېکان وە جەماڵ، ڕەعنای سنۊبەر
کەردشان وە باب، خاڵ و مینا هەم
چوون تووڵی لەولاو، لوول وەردەن بە هەم
چېش واچوون تەعریف کەمەرە و کەمەر
مەدرەوشا جە دوور چوون شەمسی خاوەر
[1]