داستانۊ حەیدەری و سنۊبەرۍ
بەشۍ حەفتاهەمە
دمای ئانەی حەیدەر و سنۊبەرە یاوێ ئەسفەهان، دمای خېرئامای و ئیسراحەتی، حەیدەر واتش: مەشۊم من بلوو خزمەتو شا عەباسی، وېش فاڕاو، جە سنۊبەرۍ خوڎاحافېزیش کەرد، وەختێ یاوا لاو شا عەباسی، سوجدەش پەی شاهەنشای بەرد، ئاڎییچ دمای خېرئامای، واتش: موشتاقەنا سنۊبەری وینوون، حەیدەر بەگ بە پەلە پەی یانەی گېڵاوە پەی شۊنەو سنۊبەرۍ:
حەیدەر بەگ، پۊشا، بەرگی دیوانی
یاوا وە پابۊس، عەباسی سانی
لوا بە تەعزیم، بۊسا ڕووی زەمین
کەردش شوکرانەی، جیهان ئافەرین
شا، وات: ئەی حەیدەر، شېری یا ڕووبا
واتش: هەر شېرم، ئەلحەمدولیلا
شا وات: ئافەرین، ئەی شېری سەروەر
بەڵام موشتاقم، بە دېیەن، دولبەر
زوو باوەر پەرێم، دیڎەم نە ڕاشەن
دایېم ئېنتېزار، بەژن و باڵاشەن
حەیدەر بەگ، ناچار سوجدەی زەمین بەرد
ڕەوانەی ڕا بۍ، کېشا ئاهی سەرد
لوا بە یانە وات: ئەی سنۊبەر
تەڵەبکارتەن، پادشای سەفدەر
هۊرېزە بشین، وە لای شاهەنشا
سنۊبەر واتش: ئەلحوکمولیللا
هۊرېزان وە پا، خورشیدی تابان
بە عەزمی پابۊس، پادشای ئێران
پۊشا وە باڵاش، جامەی تەمام زەڕ
بېکا تەدارەک، جوققە جەواهەر
ماهیچە کەردەن، گۊشوارە نە گۊش
وستەن حەمایېل، وە بانی لیمۊش
تیتەی کۊتەرمە دا وە پیشانی
بیی وە هام قەرین، حۊریی ڕېزوانی
باڵ وە باهووبەند، دانەی جەواهېر
مەدرەوشا جە دوور، چوون شۊڵەی ئایېر
شخڵی کشمیری، کېشا وە سەردا
پەخشش کەرد وەبان، قورسی قەمەردا
حەیدەر تەماشای ئەندامش مەکەرد
مەکېشا وە تاو، هەناسانی سەرد
سنۊبەر واتش: ئەی یاری یاوەر
غەمگین مەنیشە، پەنا بە داوەر
هەرچی جە تەقدیر، ئەزەڵ وېیەردەن
هەر ئانە مەبۊ، کرداری کەردەن
سنۊبەر تەسکین، حەیدەر بەگ مەدا
حەیدەر بەگ مەوات، پەنا بە ئەڵڵا
تا یاوان بە قەسر، جامەڕېز، زەڕکار
چەنی حەیدەر بەگ، ماهی جەهاندار
لوان وە خزمەت، سوجدەی زەمین بەرد
سەنای شەهەنشای، ئێران زەمین کەرد
[1]