باخچێوە بېگەرد
نویستەی: میرزا ئۆلقاڎرو پاوەی
بەشۍ حەفتا و یەرەمە

میرزا ئۆلقاڎرو پاوەی، باس جە وەختو پېڎابېیەو پېخامئاوەرو ئیسلامی مەکەرۊن، کە مەلائېکۍخوڎای، چەنی بە عەتر و عەبیر، شتەنشا، بە پۊشاکی ڕەنگاوڕەنگ پۊشاشان، جە بانو کەعبەیۆ نوور واران، جە گەورەیی ئا زاتە موبارەکەیە.
بەعزێ، هەم ئیبریق، جەواهیر، بەکەف
یەکسەر، مەواتەن، بە من: لاتەخەف
بە عەتری عەبیر، غەسل، کەردشان
دەسدەس، ئیستەبرەق، مەلبووس پۊشاشان
جە قەسری بەیزا، بۊی بوخور، خېزا
جە من، هەم، عەرەق، کافوور، مەڕېزا
مەواتەم، ئەی کاش، عەبدولموتەلیب
حازر مەبیی، پەی، ئەی گرد عەجایېب
فریشتانی پاک، بوینان، وە چەم
گرد بدا، وە باڎ، کۊی خەرمانی خەم
قەسری دەر و ماڵ، نزیک، تا وە دوور
یەکسەر، تەمام گشت، بی یەک قەتعە نوور
جە بانی کەعبە، کۊ کۊ، نوور، وارا
مەلایک، سەف سەف، عەلەم، ونارا
وەقتێ محەمەد، کەفت، وە ڕووی دنیا
فەوری سوجدە بەرد، وە تای بۍ هەمتا
دەسش، بوڵند کەرد، دوعا، چن وانا
چەودما، بە حوکمی، دانای توانا
یەک دەسێ هەنی، پېڎا بیی جە غەیب
پۊشا، سەرتاپاش، وە دیبای بۍ عەیب
هۊرش گرد، بەرد، غەیب بیی، جە نەزەر
من واتم، هانا، ئەڵڵاهو ئەکبەر
دیسان نیدایێ، ئاما، وە قایېم
وات: بەراش، وە لای باباش؛ ئیبراهیم
نەزەر کەرد لېش، بە نوازەشی زەریف
تا، موششەڕەف بۊ، بە دینی حەنیف
تا، ئەهلی بوخار، بزانان، وە دەو
قەتعەن، کوفری شرک، جە زەمانەی ئەو.[1]