#میرزای لوڕستانی#

شۊ نە ڕاگەشان بگېرشان عەنان
ئەڵبەت کە ئېد دین مەبان پەشیمان
بەو دەستۇر بەکر مەشوەرەت کەردش
ئەمیر زینەدین بە جا ئاوەردش
ئاما وەگوفتار ئەمیری ئەنام
واتش بوېیەران جە عوزر و گونام
وە دڵوازی نەرد کەردین چەنی مەم
ئامام نەو دەمدا وە زوبان قەسەم
مەبۊ وە خاتۇن بگېرۇش نەو جا
ھەم بیرۇن بارۊش ئەو نە قەعری چاﮪ
مەئزۇن بان بشان باوەرەش وەبەر
نیکاح کەم وەنەش سەوڵ نازپەروەر
یاران چۇن ئەژنین جە ئەسپ پیابین
بۇسان دەست و پای ئەمیر وە یەقین
جە نۊ سوار بی ئەمیر دەر زەمان
گردین بەرابەر ڕۇ وە شار نېیان
جەو دەم بفەرمۇد میرانە دەستۇر
بشۊ وە زیندان خاتۇن وە زەرۇر
باوەرۊ وە بەر ئەمیری غەمخوار
زۇ بە زۇ بشۊ نەگېرۊ قەرار
گۊشدەر وە خاتۇن نادرەی ساڵان
وېش ئارایش دا بشۊ وە زېندان
بەکر ھەم وە تاب شی نە خان و مان
واتش نۇری چەم ئەی مەلەک ڕېحان
میر ئەمرش کەردەن مەم باران وە بەر
مەشۊ وە زېندان خاتۇنی دوڵبەر
ئەر بشۊ وەسەر زیندان خاتۇ زین
مەم ڕۊحش پەرواز مەبۊ چۇن پەروین
چۇن بېراییم کەرد من جە ڕاگەی مەم
بشۊ وە باڵاش تۊ وەخاتر جەم
باوەرەش وە بەر نەو چاهی پڕ غەم
با نەبۊ تەسلیم وە زاری و ستەم
جەو پەی ھۊرېزا مەلەک بی ڕەوان
ھەمان ڕۇ ئاوەرد ئه و بە سۇی زیندان
خاتۇن ھەم نەو دەم ئاما دەر زەمان
دېیا کە مدران ئەو مەلەک ڕېحان
واتش ئەی دوختەر بۍ دین و ئیمان
چە کارت ھەندەن جە ئامای زیندان
وات وە کەنیزان ئی جادۇی زەمان
بە تاو و تەعجیل پەرېم بگېران
مەلەک چۇن شنەفت حەوللیاتی سەر
پەراکەندە کەرد نە ڕۇی دەشت و دەر
تا کەنیز وە کۊ حەوللی بین قەرار
مەلەک گورېزا فەراوان فەرار
خاتۇن چۇن ئاما وەسەیری زیندان
ئاوازکەرد وە مەم بینایی چەمان
جە غەم بوېیەرە وادەی نەشاتەن
ڕۊشنی زوڵمات ڕۇی سەر بەساتەن
ئاوازدا ئەمیر وە نیمە ئاواز
واتش ئەی عەزیز شۊخی سەرفەراز
تەسدیعت کېشان چۇنکە ئامانی
بەڵۍ قابزی ڕۊحم مەستانی
ئەمیر جەو بۊنەت فرستادەنان
تاکە ئەڕواحم بستانی ڕەوان
دۇ تا گېسۇیێ ڕېحانی پەل دېز
نە قەعر ئەو چا کەردش سەراوېز
حەلقەش حەلقاوېز وست نە حەلقەی لۇل
تارش باریکتەر جە تاری مەفتۇل
ھۊرکېشا وە بەر ئەو شەکەرین ڕاز
چۇن ڕۇی خاتۇن دی ڕۊحش کەرد پەرواز
بېزار بی جە عەیش جە زیندەگانی
گېیان کەرد وە فیدای حۇری ڕەزوانی
جوانیش جا ئاشت پەرۍ خاتۇ زین
ڕۊحش ئارام گېرت نە ڕەوزەی بەرین
ئەگەر ھەزار ساڵ بمانی وە کام
عاقبەت مەرگەن نەدارۊ ئەنجام
ئی دونیای فانی ھەر پاسە کەردەن
کەسێ جە سایەش وایە نەبەردەن
بشنەو جە خاتۇن نازداری دوڵدار
پارە پارە کەرد خاڵان جە ڕوخسار
بە پەنجەی بلۇر سەدەفی کردار
کەردش وە بەیداق زوڵفانی شامار
یەقەی قەناوېز پارەکەرد جە بیم
قورمز کەرد بەیان لەوحی سادەی سیم
باڵی توڕەی دېز گشت دا وە تاراج
سەیلی ھۇن ئاما پۊشا تەختەی عاج
بۊ نېیا وە بۊی شای عالی ئەعزەم
واتش سەد شەڵلا عومرم بېیا کەم
ھەر کەسێ تۊش وست نەی چاهی زیندان
جەرگش پارە بۊ وە تېغی بوڕان
ھەر تا زیندە بۊ ئاھش وەش نەبۊ
کامەرانی زەوق دونیای پېش نەبۊ
بەختش نگۇن بۊ سەرئاوېز جە غەم
غەرقی غەزەب بۊ یاوەر چەنی غەم
جە نۊ بوڵەند کەرد زایېڵەی زگار
واتش ھەمسەران بېیان ئەو دېیار
بڎېیان وە گەردش چەرخی ستەمکار
چ زوڵمێ پېم کەرد زاڵمی غەدار
ئی ستەمکاری وە کەس نەشېیەن
کۍ چۇن من دڵدار جوانەمەرگ دېیەن
وە فدای جوانیت شازادەی شاھان
پەرۍ خاڵی من تەی کەردی ڕاھان
کېشات ئەزیەتی بۍ سامان و سۇد
سۇدت شی وە باد مایەت بی نابۇد
دمای مەرگی تۊ دڵ وە کۍ دەرۇ
چە گۇنە بەی دەھر دڵ وەش بکەرۇ
شەرتم ئەو شەرتەن کام نەدیدەی دەور
غەریبی شاران وە جەور کوشتەی جەور
بشۇن ئەو مېیان دەیرییانی دەیر
حەرام بۊ جە من زەوق و شادی و سەیر
ئەر شا بزانۊ جە یەمەنی شار
نیلی بکەرۊ تاج چەنی تۊمار
فەترە مەدەرۊ مەیۊ بېقەرار
ھۇنت مەستانۊ جە ئەعدایان کار
بشنەو جە بەنگین یاری وەفاکېش
یاوا وە نەزد ئەو ئەمیری دلڕېش
وېش کېشا وە بۇڵ جە پا تا وە سەر
ئاوازش وېیەرد نە چەرخی ئەخزەر
ئەوەند دانە وېش بە تېغ و تەبەر
دەردەم ھۇن جە فەوق زامش دا ئەسەر
سەرنگۇن گنا وېنەی بېھۊشان
بی وە ھام نۊشین ئەھلی خامۊشان
[1]