دەردی کوردم گرتووە، چ بکەم ئەمن؟
تەیری بەختم مردووە، چ بکەم ئەمن؟
یەک نەبوون و ڕێک نەبوون و لێک پسان
ژەهری دووریم چێشتووە، چ بکەم ئەمن؟
باری یەک جار زۆر گرانی قەومەکەم
ئەمنی یەک جار خستووە، چ بکەم ئەمن؟
ڕیسی چەند ساڵەم، تەشی ڕێسی زەمان
پێچەوانەی ڕستووە، چ بکەم ئەمن!
یەک نەبوونی دوو برای ئازا و نەبەز
ڕێی نەجاتی بەستووە، چ بکەم ئەمن؟
وا نەیاری بەدمەسەت بۆ ئەو دووە
سەد پلانی ڕشتووە، چ بکەم ئەمن؟
هۆنەری چەند ساڵەیی پیر، بەختەکەی،
هاتووە و لێی نوستووە، چ بکەم ئەمن؟
#سەید کامیل ئیمامی#