مەگېڵناوە:
پاڎشێوە قەسرەکېشنە نیشتەبېرە، دەنگو کابرێوەش ئەژنی کە هەراڵەو ساوا کەرۍ.
عانێ دەلاقەو قەسرېوە تەماشەش کەرد، دیش پیەیوە دەگایی بارێوە ساویش نیەینۍ ئۆڵاخەکەیش و ملای ملۊ پەی بازاری،
پاڎشایچ دڵش شی وەنەو ساوەکاو بە وەزیروو دەرباریش وات:
(پەنج) لیرۍ دلۍ گەنجینەینە بەرەو چا ساوامە پەی بارە.
وەزیریچ پەنج لیریش بەردۍ و بە یاردی دەرەکەیش وات:
ئی (چوار) لیرەیە گېرەو ساوی بارە!
یاردی دەروو وەزیریچ چڕیش وەنەو فەرماندەو قەسرۍ و واتش:
ئی (یەرە) لیرەیە بەرە ساوی بارە!
فەرماندەو قەسرېچ چڕیش وەنەو ئەفسەرو دەروازەو قەسرۍ و واتش:
ئی (دوە) لیرەیە بەرەو چا ساوامە پەی بارە!
ئەفسەریچ چڕیش وەنەو سەروازی و واتش:
ئی (یەک) لیرەیە بەرەو چا ساوا بارە!
سەروازیچ ڕەما شۊنەو کابرای ساو ۋرەشیرەو یەخېش گېرتو واتش:
کابرای دەگایی، قوول و هوولوو چېشیتا؟
مەر بۍ خەبەرەنی ئېگە قەسرەو پاڎشاینە، پی دەنگە زلاتەو وەرموو عالاحەزرەتیت شېونان؟
ئانا پاڎشاما دەسورش دانا پەنە وزووت زیڼدان!
کابرای ساو ۋرەشیچ وېش وست ملو پاڵایا سەروازیرەو واتش:
بېجام کەردە سەرکار.
ئی باروو هەسەرۍ دەسڕەنجو ساڵێما، گردی بەرەو مەبەرەم پەی زیڼدانی!
سەروازیچ تایێ بارەکەیش بەرد پەی وېش، ئەو تاکەیچش بەرد پەی ئەفسەرەکەی و واتش:
ئانا بە لیرېوە نیمەو بارەکەیم سانا!
ئەفسەریچ ساوەکېش بەرڎۍ پەی فەرماندەو قەسرۍ و واتش:
ئانا دوۍ کیلوۍ ساوی بە دوۍ لیرۍ!
فەرماندەیچ ساوەکېش بەردۍ پەی یاردی دەروو وەزیری و واتش:
ئانا کیلوێ ساویم ئاردۍ بە یەرۍ لیرۍ!
یاردی دەروو وەزیریچ لوا پەی لاو وەزیری و واتش:
ئانا نیم کیلوو ساویم ئاردۍ بە چوار لیرۍ!
وەزیریچ پەنج ساوېش بەرڎۍ پەی شای و واتش:
ئانا پەنج ساوېم ئاردۍ بە پەنج لیرۍ!
پاۮشایچ وەروو وېشرە ئجیاش ئا خەڵکە ئینای چېرو دەسەڵاتوو ئاڎیینە وەختارێ باخەوانش یەک ساو مڎۊ بە لیرېوە وخەڵکەکەیچ لیرەشا لاوە بۍ هەمیەتارۍ و ساناش وەنە! تەمام دارێنۍ و خاستەر ئانەن ماڵیاتشا (باج) زیاڎ کەروو هەتا خەزانەو قەسرۍ پەڕتەر بۊ.
ئاخرسەر خەڵکەکە کەم دەس تەرۍ بیۍ و دزۍ و دزدەسەکېشا دەس لوا تەر و داراتەرۍ.[1]