چەمش بەرنماردۍ، ڕیشش تاشدۍ
نویستەی: #ئیبراهیم میکە عەلی#
مەگېڵناوە، مریچڵێوە نیازش بۍ بلۊ سەرو هانەکڵېوە ئاوی وەرۊوە، چڼ زاڕۊڵێوە سەرو هانەکڵەکەیۆ نیشتېبېنېرە، مریچڵەکۍ تەرسا زاڕۊڵەکۍ وەرو نەفامیشا دەسش وەنە بشانا، پەوچی مردا هەتا ئاڎۍ لوێ و دمای ئاڎییشایچ کابرێوە بەتەمەن و سەروسیما دار، ڕیشێوە چەرمەش ئاستەبېوە و ئاما ئاویش واردۆ و سەیەو درەختەکا سەرو هانەکڵەکەینە نیشتەرە.
تەژنای زۊرش ئاردەبۍ پەی مریچڵەکۍ و ناچارە بېیە مل بنیۊ ڕوەو هانەکڵەکەی پەی ئاو واردەیۆ، لەیەکشداوە: بە پاو سەر و سیمایشەرە چانەی مەشۊ کابرای ڕیش چەرمە پېیا خراپ بۊنەو دەسش وەنە شانۊ.
هەکە مریچڵەکۍ لوا سەرو ئاوەکۍ، کابرا تەۋەنېۋەش پەی شانا و چەمش کۊرە کەردە.
لوا پەی لاو حاکمو وەختیۆ داڎو وېش کەردش، کابرای ڕیش چەرمەشا ئارد، دماو پەرس و جۊی، بەرکەوت کابرا تاوانبارا و حاکم بڕیارشدا حەقە جە کابرای بسانا و چەمێوەش بەربارا.
وەڵۍ ئانەینە حوکمەکەی بەرا ڕاوە، مریچڵەکۍ ئاماوە جواب و واتش: قوربان چەمش بەر نماردۍ، ڕیشش تاشدۍ.
حاکم پەرساش ئەو مریچڵەکۍ: مەرامت چېشا چا داوێتە؟!
مریچڵەۍ وات: قوربان من ڕیشە چەرمە و سیما مەکینەکەیش خەڵەتنانۍ و ئەجیام پیێوە فامیڎەن و زەرەرم نمەڎۊ وەنە، پەوچی ماچو ڕیشش تاشدۍ ۋەرو ئانەیە کەسیتەر پېسەو من بە ڕیش و سیما درۊزنەکەیش نەخەڵەتیۊ.[1]