هیزی جەمەوبېیەو ڕۊو گوڵپی لوا ڕاوە
نویستەی: #ئیبراهیم میکە عەلی#
پەنەم وەشا ڕاسەوڕاس دماو لوای ڕاوەو جەمەو بیەکەو هیزی دەگاو گوڵپی دەسوەشانەی دوەبارەو وېم واچوە بە دەسەو ڕاوەبەرو جەمەوبیەکەی و واچوشا پەنە: دەسێتا وەشێبا و مانێ نەبیدێ.
دمای دەسوەشانەیچم ئی چند سەرنج و وەرنیارایچمە وزوو ڕوە:
یوە: گر چالاکی و جوڵێوە هەکە بنیادم کەرۊنەش هەمیشە چند ڕوێوە وینیۆنە و عادەتیچا هەریۆ چا دیما سیماو وېشا برمانا، چا بارۆ گېرە جەمەوبیەکەو هیزیچ لېوە مایێ دڵوەشیی فرێوە جە بەشداربیەکاش و خەڵکو گوڵپی بیەبۊنە و لېوە تەریچۆ بڕێ وەشەسیێ ڕەخنەشابۊ سەرش و لۆقەتێش بدا وەنە.
ئانەیچە پەی ئانەی گېڵۆوە هەکە چالاکیەکە فرەدیم بېیەن و قەتیس نەبېیەن یەک ڕەونەقەنە.
دوێ: پېسەو گرد هەرمانێوە، ئی چالاکیچە مشۊم تۆشەبەرەو ئەزمونو دەسەو ڕاوەبەری دۆڵەمەنتەر کەرۊنە و پەی هەرمانا تەری تەجروبەش چەنە هۆرگېریۆ.
یەرێ: ئەشۆم دەسەی ڕاوەبەر پېسەو هەمیشەی ئیسەیچ سینەشا فراوان بۊنە و حەر چەنی پەنەشا وەشا ئېمەمانان دەسوەشیمان هەن پەیشا، ئەشۆم ڕەخنە و گلەیی و وەرنیارەکاو خەڵکی تەریچ بە سینەی وەرفراوانۆ هۆرگېرا.
چوار: من چێگۆ دەنگو وېم وزو پاڵو ئا دەنگیە هەکە وازۆ ساڵەی ئایندێ ئی جەمەوبېیەیە فاڕمێ بە هەمایش و جەمەوبېیەیېوە ئەدەبی و فەرهەنگیی سنوردار و مێمانێ تایبېش پەی چڕمێ و بواردەیمێ بە کەسە چەنەئامایەکاو دەگێکێچما زیاتەر دنیاوینییەکاشا وزا ڕوە و ئېمەیچ گۊششا پەی گېرمێ، بە تایبە گەنجە بەهرەدارەکێما و تێکەڵکەردەی ئەزمونو وەڵینا و دماینا.
پەنج: وەرنیارکەرو گرد چالاکیېوەنە دەسېوە میدیاهەرمانۍ ئەرکو ڕوپۊشکەردە میدیایی چالاکیەکەی گېرا دەس و دمای مونتاج کەردەیش نزیکتەرین وەختەنە ڕاو پەیجو دەگێوە دیمەنەکاو چالاکیەکەی وەڵاو کەراوە و پا هەنگامێچە ڕا چانەی گېریۆ چند کەسېوە بەمەبەستبۊ یان هاکۆ و پەی لایکا سیماو دەگاکێما گول وزا ڕوە.[1]