ناونیشانی هۆنراوە: گەورەم شیعر هاتووم بۆلات
هۆنراوەنووس: #حەمە ئەحمەد جاف#

لەدوورەوە
لەدەروازە دەسکردەکەی سنوورەوە 
    بەچاوی پڕ
لەئەشکی سوێری سوورەوە  
دێم و لەگەڵ
دەنگی ئەڵاهولئەکبەڕی
بڵندگۆی مزگەوتی سوورەوە
لەچوارچراو..
دەرگای بداخ سوڵتانەوە
دێمە ناو دڵی  شارەوە
***
گەورەم شیعر
هاتووم بۆلات
لە دڵی دوو#چۆمان#ەوە
لەکوێستانی سپی سەنگ و
دوندی لەندی شێخانەوە
هاتووم بۆلات
لەگەڵ شیعرێکی هەژارو مام هێدی دا
دەستم دە ئاڵێنمە باڵات
هاتووم بۆلات
دەبمە زەنگی ڕقی پیرۆز
بۆ بێدادی
بۆ زیارەتی مەزاری
شێخولئیسلامی موکریان و
شاکناچەی #مەهاباد#ی
***
هاتووم ...
بۆ سێبەری شیعرو
سەیری سۆمای ،..
چاوی سوتاوی حەریق و
حوزنیی نیشتیمانێکی ون!
لەگەڵ شیعرێکی ڕۆمانسی
قوبادی جەلی زادەدا   
دەچمە خەڵوەتی تەهلیلەو
موناجاتی باوەشی ژن !
***
گەورەم شیعر
هاتوم بۆلات
لەگەڵ خۆما
باوەشێ کتێبی دانسقەی
حوزنی و گیوی موکریانی
زریانی ئەنوەرقادرو
گەردەلولی سپی لەتیف و
سەربازی ونی پەشێو و
هێلانەی نوغرۆی شۆڕش و
لاوکی #هەڵەبجە#ی ڕەفیق و
فەلسەفەی جوانی کەمال و
کەژاوەی گریانی شێرکۆم
لەنیشتیمانی
سێکوچکەی بابانەوە بۆ هێناوی
ئەفسوس گەورەم
نەمزانی لێرە نەماوی
٭٭٭٭
گەورەم شیعر
هاتووم بۆلات
نامەیەکم لە دڵمەوە
بۆهێناوی؟
هاتووم بۆلات ...
نامەیەکم لەودیو گۆیژەی مەنزڵمەوە
بۆ هێناوی؟
لێی نووسراوە:
تاکەی (هێمن) ؟
لەبێشکەی ئازارو زامی
ئەڕشیفی گیرفانەکانی پێشەوادا
پاڵدەکەوێ و....
ئاگای لەناڵەو هاواری کڕنووی سەیوانی
دیلان و پاییزی جاران نەماوەو..
دڵی لای خوڕەی شەرابی
(زامدار)ی مەعمەل قیڕنیە !!؟
کەنگێ هێمن ؟
لەگەڵ شیعرێکی لاچین و شیلاناوێ
دەگەڕێتەوە ناو دڵی
فرمێسکی چاوی چوارچرا و
نیشتیمانی ئاوازی شاروخ و ماملێ!
***
گەورەم شیعر
دەوەرەوەو جارێکی تر..
لەگەڵ هەژار
لەنەهزەوە
سەردەنەوە لەخەلانی و  ساحەی تەحریر
لە ڕاغیبە خاتونەوە
بچنەوە خزمەت ڕەسافی و..
جەواهیری و ئەحلام مەنسوور !
لە کەرخەوە
بەرەو سەعدون و کەڕادەو ئەبونەواس
بچنە خزمەت جەمیل سدقی
لەنیگای گەرمی گلێنەی ئەحلامەوە
  بچنەوە  باوەشی  شووشەی،..
شەرابی شەوانی  دیجلە و
دڵی کۆڕنیش!
٭٭٭٭
گەورەم شیعر..
هاتووم بۆلات....
نامەی  هێدی و
هەژارو هەڵمەت و شێرکۆم
بۆ هێناوی!؟
هاتووم بۆلات....
تاڵێ مووی پرچی دێوانەو....
مێخەکی سەرسنگی شەم و...
چەپکێ  نێرگزی پێدەشتی #شارەزوور#و...
گوڵێ لە دار ئەرخەوانی
سەرگڵکۆی  فایەق بێکەسی
دڵی سەیوانی #سلێمانی#م
بۆ هێناوی؟
٭٭٭٭
گەورەم شیعر..
هاتووم بۆلات
چڵێ شیعری تەسەوفی
بەرپشتێنی
خەڵوەتی حەزرەتی مەحوی و..
چنگێ لە گڕی نەورۆزو
نامەیەکم لە حاجی تۆفیق بەگەوە
بۆهێناوی؟
هەتاهەگبەیەک لە دەنگ و ...
شیعرێکی نوێ
بەرمەوە بۆ
گوێی گۆرانی و
سروودی ڕقی ڕاسان و
زەردەخەنەی نەورۆزی نوێ !!
٭٭٭
گەورەم شیعر..
هاتووم بۆلات
تا فێرم کەی
گوڵێ بۆ شیرین بنێرم
تا فێرم کەی
دڵم  بە ئەوین بسپێرم
هاتووم بۆلات
دەریایەک لە فرمێسکی سوور
بۆ تۆ ....
بۆ خۆم
بۆزامی دڵی کوردستان
، هەڵبڕێژم
هاتووم تاگوڵی سەربەستی
لە ژوور سەرتەوە بنێژم
٭٭٭
گەورەم شیعر
هاتووم بۆلات....
تابلۆیەک لە دەنگ و جوانی
شووشەیەک لە بۆن بوغوردی
قەبرستانی شێخ ئەحمەدو
سەیوانی دڵی سلێمانی
هەگبەیەک لە ئازارو سۆ
تاڤگەیەک لە شڵپەی دڵی،
دووئاوان و ...
زەڵم و سیروان و تانجەڕۆ
بدەمە دەست زرێبارو
ماسیە چاو زەیتوونیەکانی
گۆلی #ورمێ# و چۆمی سابڵاغ و
حەوزی سپی #بۆکان#ەوە
هاتووم بۆلات...
لەنیشتمانی قەتماغەی
دڵ پڕ لە خەم و ژانەوە!!!
٭٭٭٭٭
گەورەم شیعر
هاتووم بۆلات...
کڕنۆش بەرم
بۆ سێبەری کێلی باڵات
هاتووم بۆلات....
لە ژیان یاخی
لە عیشق و سۆزی دڵ یاخی
لە بۆنی سوورمەی گوڵ یاخی
هاتووم بۆلات....
تا لە تۆوە فێربم کە چۆن
بۆ جوانی چاوی ژیان بمرم !؟
فێربم کەچۆن
لەو ڕێیەدا بەرگە بگرم
٭٭٭٭
هاتووم بۆلات
بەدڵێکی پڕ لە ئازارو بۆسۆوە
هاتووم هەتا ....
ڕووخسەت لە تۆو  هەژارو قازی
بخوازم
دڵم دەمەتۆ بۆ شیعر
مام هەژاریش بۆ کوردستان
چوارچراش بۆ ڕقی پیرۆز
قازیش بۆکۆمارو نەورۆز
من بۆ ژیان و
پێشوازی
لەکەمەی گۆچانی شیعرو
تابلۆی تەمەن
هاتووم بۆلات
***
هاتووم ..هەتا
شیعروئیلقات
ئازادمکا
لە بێدەنگی و...
ڕزگارمکا لە تەنیایی !؟
هاتووم ئەدات
بمداتە دەستی پڕشنگی
ئەستێرەو خۆرو ڕۆشنایی!؟
هاتووم ..هەتا
لەگەڵ شنەی شیعری تۆدا
بۆ ژوانی ژیان وژن بژیم
هاتووم بۆلات
لەگەڵ قەتارێکی ماملێ و
شیعری هەژارو  هێدی دا
دەستم دە ئاڵێنمە باڵات
هاتووم بۆلات !
کڕنۆش ببەم 
بۆسێبەری کێلی باڵات
هاتووم بۆلات

حوزەیرانی 2014/ #مەهاباد# / ڕۆژهەڵاتی کوردستان [1]