خەندان: کاروان مەسعود
کرمانج عزەت قایمقامی شارۆچکەی #سۆران# ڕایگەیاند، کەمترین داهاتی مانگانە لەقەزاکەیان دوو ملیار دیناره و ئەگەر %30 ئه و پارەیە بخرێتە بەردەستیان دەتوانن کاری باش ئەنجام بدەن.
ئه و وتانەی قایمقامی سۆران ئەمڕۆ لەدانیشتی ژمارە 51 ئەنجوومەنی پاریزگای #هەولێر#دا هات، کە تایبەت بوو بەتاوتوێکردنی ڕەوشی شارۆچکەی سۆران.
کرمانج عزەت وتی شارۆچکەی سۆران تایبەتمەندی خۆی هەیە لە ڕووی گەشتیاری، بازرگانی، کشتوکاڵی، به و پێیەی لە %32ی ناوچەی گەشتیاری هەموو عێراق لە شارۆچکەی سۆرانە، لە ڕووبازرگانیشەوە هەرێمی کوردستان دەبەستێتەوە بە وڵاتی ئێران لە ڕێگەی مەرزی #حاجی ئۆمەران#ەوە کە ڕۆژانە ئاڵوگۆری بازرگانی لێوەدەکرێت.
وتیشی ئەگەرچی بەشێک لەداهاتی فەرمانگەکان ناگەرێتەوە بۆ ئێمە، وەک گومرگی حاجی ئۆمەران و ئەوقاف و ڕوشنبیر و لاوان و چەند شوێنێکی تر، کەمترین مانگ داهاتی ئێمە نزیکەی دوو ملیار دینارە، ئەگەر لە 30% ئه و داهاتە بخرێتە بەر دەستی ئێمە دەتوانین کار زۆر باشتر و جوانتر بۆ قەزاکەمان بکەین.
لەئێستا شارۆچکەی سۆران نزیکەی 206000 هەزار کەس دانیشتوانەکەیەتی، کە بەر لەساڵی 1991 دانیشتوانەکەی تەنها 5000 کەس بووە.
لە بەشێکی دیکەی قسەکانیدا کرمانج عزەت ئاماژەی بە گیروگرفت و کێشەکانی سنوری شارۆچکەی سۆران کرد، لەلایەن ئەندامانی ئەنجومەنی پارێزگای هەولێرەوه، چەندین پرسیار ئاراستەی قایمقامی شارۆچکەی سۆران و بەرێوەبەری فەرمانگەکانی کرا و ئەوانیش وەڵامیان دانەوە.
شارۆچکەی سۆران گەورەترین شارۆچکەی سنوری پارێزگای هەولێرە، دەکەوێتە باکوری ڕۆژهەڵاتی هەولێر نزیکەی 100کم لە سەنتەری هەولێرەوە دوورە.[1]
22-08-2017