دیدەنی تاران
دەزگای پەخش: فام
هەوکە دەمەو ئێوارەیە، بە فەرووغی فەرووخزادەوە لە خولگەی فیردەوسی، بە دیار فیردەوسیەوە ڕاوەستاوم، چاو لە شوێنپێی ژنە سوورپۆشەکە دەگێڕم، پێشترێ سەربردەی ئەوینی ئەو ژنەم بیستبوو، دەمێ بوو دیتنی جێژوانی وی لە دڵم بوو، شتێکم دایە پیرێژنێکی دەرۆزەکەر و پرسیم:
تۆ جێی ژنە سوورپۆشەکە پێدەزانی؟
سەری هەڵبڕی و بە چاوی کز و پەنجەی وردیلەی ئاماژەی بە شوێنێ کرد و بە هەناسەیەکی پڕ حەسرەتەوە گوتی:
هۆ لەوێ.
چووم، تەواوێ لە جێی ژنە سوورپۆشەکە ڕاوستام و شتێ لە فەرووغم بە دەنگ بۆ خۆم خوێندەوە.
ئێوەش ئەو ژنە سوورپۆشە ئەویندارە ئەمەکدارە دەناسن، ئەها، ئەو کچە دڵبەرەی بە کراسی سوورەوە بۆ ژوانی کوڕە دڵداری دێتە ئێرە، کوڕە لەو بەری جادەوە هێندە بە تاسەیە بۆ لە ئامێزگرتنی کچە، هۆشی لە سەر نامێنێ، چاوی هیچ نابینێ، مل لێدەنێ، لە ناوەندی جادە تڕومبێلێ ملی لێدەنێ و دەیکاتە گەشمردەی ژوان و ئەوین.
ئیدی کچە لەو ڕۆژەوە، لە دوای لە دەستدانی لاوکی دڵێ خۆی، سی چل ساڵێ، ڕۆژی جارێ بە جلکی سوورەوە، بەو جلکەی لەو ڕۆژی دوا ژوان پۆشیبووی، سەردانی ئەو شوێنەی کردووە و پەیمانی نوێکردۆتەوە.[1]