1. شەمامە: مېۋېۋی بۊ وەش و گولانە ھەن، چە خېزانۊ کاڵەکی ھەن، ۋاچۊ (شەمامە)ی چە بنەڕەتەنە ۋاچېۋە عەرەبییە ھەنە و بە ۋاتاو (بۊوەش)ی مێۋ.
ۋەرو بۊ وەشیی و خنجیلانەییش چە ئەدەبیاتی کورڎینە یارە و مەمۍ یارۍ بە شەمامە ۋېنێ کریێنۍ. چا بارۆ ھەم ھۊنیێ و ھەم گۊرانییەیچ ھەنە (شەمامەو خاڵ خاڵ، شەمام شلکی، ناردۇمە بۆ شاڵ، بۊ سەر مەمکی ...) دېیارتەرین ۋېناکەرڎەی مەمۍ یارېنۍ بە شەمامە...
شەمامە: نامۍ گرڎینۍ ڕەگەز نېرۍ، نامۊ مېۋېۋی بۊ وەشی ھامنانەینە.
شەمامە: تاک-نامۍ.
نمۇنە: شەمامە مېۋېۋی بۊ وەش ھەن.
شەمامەکە: تاک-نامۍ گرڎینۍ ڕەگەز نېرۍ ئەژناسیێ
نمۇنە: شەمامەکە بۊ یانەکەیش وەشە کەرڎېنە.
شەمامۍ: کۊ-نامۍ.
نمۇنە: شەمامۍ پېسەو جارا فرۍ نېیەنۍ.
شەمامەکۍ: کۊ-نامۍ گرڎینۍ ئەژناسیێ
نمۇنە: شەمامەکۍ گرڎ خرابیێنۍ.
شەمامێ/ شەمامېۋ: تاک-نامۍ گرڎینۍ ڕەگەز نېرۍ نەژناسیێ
سەرنج: جېیاۋازی کەرڎەی مېیانو شەمامە پېسەو نامۍ گرڎینۊ مېۋەی و شەمامە پېسەو نامۍ تایبەتۍ ژەنانۍ بەس بە جۊرو ۋاتەی ۋاچەکا کریۊ، ۋاتا جېیاۋازی فشارو سەرو دەنگەکا، کە درېژکەرڎەی دەنگېۋو ۋاچەکېن.
شەمامە: نامۍ گرڎینۊ مېۋەی، دمایین پیتۊ نامەکۍ [ە] درېکریۊۋە.
شەمامە: نامۍ تاییبەتۍ ژەنانۍ، پیتۍ چوارەمۊ [ا] نامەکۍ درېکریۊۋە.
2. شەمامە: نامۍ تایبەتۍ ژەنانۍ.
نمۇنە: شەمامە کناچېۋە زەریفە ھەنە.
شەمامۍ: کۊمەڵېۋ ژەنی شەمام نامۍ دەسنېشاننەکریێ؛ ئا ژەنۍ کە نامېشا شەمامە ھەنە.
نمۇنە: شەمامۍ گرڎ زەریفۍ هەنۍ (شەمام نامۍ گرڎ زەریفۍ ھەنۍ).
شەمامەکۍ کۊمەڵېۋ ژەنی شەمام نامۍ دەسنېشانەکریێ.
نمۇنە: شەمامەکۍ گرڎ ئازێ هەنۍ.
سەرنج: جېیاۋازی کەرڎەی مېیانو شەمامە پېسەو نامۍ تایبەتۍ ژەنانۍ و شەمامە پېسەو نامۍ گرڎینۊ مېۋەی بەس بە جۊرو ۋاتەی ۋاچەکۍ کریۊ، ۋاتا جېیاۋازی فشارو سەرو دەنگەکا، کە درېژکەرڎەی دەنگېۋو ۋاچەکېن.
شەمامە نامۍ تاییبەتۍ ژەنانۍ، پیتۍ چوارەمۊ [ا] نامەکۍ درېکریۊۋە.
شەمامە نامۍ گرڎینۊ مېۋەی، دمایین پیتۊ نامەکۍ [ە] درېکریۊۋە.
[1]