نیوە چڵ
#ڕەسوڵ سوڵتانی#

کتێبەکەی فڕێ دایە سەر مێزەکەی پێش خۆی. دەستی برد بۆ پەرداخە چایەکە. نیوە بوو. سارد ببۆوە. چیرۆکەکەشی هەر نیوە کردبوو. سێ، چوار ڕۆمانی نیوەچڵی لە پێش خۆی دانابوو. تاقەتی تەواوکردنی هیچ شتێکی نەبوو. گوتی، هەر شتێکی تەواوی بکەی، وەک ئەوە وایە کوشتبێتت. خۆی لەبەر یەک کێشاوە و باوێشکێکی دا. شنەبایەک لە پەنجەرەکەوە دەهاتە ژوورێ و پەردەکەی دەجووڵاند. ئەو هەروا لەجێی خۆی دانیشتبوو. دوودڵ بوو ئاخۆ چیرۆکەکە تەواو بکات یان نا. یەکەم چیرۆکی کتێبەکەی خوێندبووەوە و حەزی لێ بوو ئەو چیرۆکە خۆی نووسیبای. گوتی: حەسوودی تەنیا لەو کاتانەدا شتێکی باشە. چیرۆکی دووهەمی بەنیوەچڵی بەجێ هێشت و نیوە چایەکەی هەروا بە ساردی خواردەوە و هەستا چووە دەرێ. دوو دڵ بوو بچێ یان نەچێ. زۆر پیس خووی پێوە گرتبوو. سەرەتا وا نەبوو. ئەوەندە هێمن و لەسەرخۆ دەستی پێ کرد، کە ئاوڕی داوە هەتا قوڕقوڕۆچکەی ڕۆچووبوو. ئەو دەمی هاموشۆی مزگەوتی دەکرد، لە مەلای بیستبوو کە کوفر وەک ڕۆیشتنی مێروولەیەک وایە لە شەوێکی تاریکی ئەنگوستەچاودا کە بەسەر بەردێکی ڕەش دا بڕوات. گوتی، ئاوەڵڵا ئەو دەردە لەو مێروولەیە دەچێ، هەستی پێ ناکەیت هەتا هەموو گیانت دانەگرێ.
ئێستا ئەوە پتر لە مانگێکە نە دیتوویەتی و نە گوێی لە دەنگیشی بووە. لە ڕادیۆوە گوێی لە کارەساتێک ببوو. بەڵام هەواڵەکان ناوی ڕاستەقینەی کوژراوەکەیان نەدرکاندبوو. تەنانەت پیاوکوژەکەشیان لەقاو نەدابوو. هەر ئەوەندە گوتبوویان: دوێنێ شەوێ پیاوێک بە ناوی س.ج هەژدە فیشەکی لە سەری ژنەکەی خۆی داوە. ئیتر لەو ڕۆژەوە کە تەلەفۆنی ئەوی بۆ نەهاتووە، هەر پێی وایە ئەوە کوژراوە. خۆ ناشوێرێ بەلای ماڵیان دا بچێ. قەول وابوو ئەم ڕۆمانەی خۆی بەناوی ئەو بڵاو بکاتەوە. بەتایبەتی کە بەشێکی زۆری بەسەرهاتەکەی خۆیانی تێدا بوو. پێی گوتبوو، ئەم ڕۆمانەت بڵاو بکەیتەوە، هەردووکمان تێدا دەچین. بەڵام چش، با تێدا بچین، چییە. هەردووکیان چاویان لە چاوی یەکتر بڕیبوو و زەردەخەنەیەکیان نیشتبوووە سەر لێو.
یەکەم جار کە چاوی پێی کەوتبوو، لە دووکانێکی جلوبەرگ فرۆشتن دا بوو. ژنە جزدانەکەی لەسەر مێزەکە لەبیر دەچێت و کوڕێک دەیەوێ دەستی بداتێ، کەچی ئەو لێی دەستێنێتەوە و دەکەوێتە شوێن ژنەکە بەشکم بیگاتێ و جزدانەکەی بداتەوە. کە لە مۆڵەکە دەچێتە دەرێ، سەیر دەکا لە ئاپۆرای خەڵکەکەدا بزر بووە و ڕۆیشتووە. کە نایدۆزێتەوە، هەر لەوێ ڕادەوەستێ، بەو هیوایەی ژنە بۆ جزدانەکەی بگەڕێتەوە. سەعاتێکی زیاتر پێ دەچێ و ژنە بە پەشۆکاوی لە سەیارەیەکی بەرز دادەبەزێ. بەر لەوەی ژنە بگاتە بەر دەرگاکە، ئەو بە پیرییەوە دەچێ و دەڵێ: ببوورە خاتوون، ئەم جزدانە هیی جەنابتە، لەبیرت چووبوو. ژنە زۆری پێ خۆش دەبێ. ئەو پێی دەڵێ، پارەی نێو جزدانەکەت ورد بژمێرە تکایە، تا لێرەی. ژنە دەڵێ، نایەوێ، بەڵام پێویستە شیرینییەک، دیارییەکت بدەمێ و ئەویش هەر لێی قەبووڵ ناکا. ئیتر ژنە ژمارەی تەلەفۆنەکەی خۆی بۆ بەجێ دەهێڵێت و دەڵێ، هەر ئیشێکت بە ئێمە هەبوو، لە هەر شوێنێک دەتوانین یارمەتیت بدەین. پاش ڕۆیشتنی ژنەکە، بیر لەو قسەیەی دەکاتەوە. ئێمە. ئێمە یانی کێ؟ بۆ ئەوان کێن؟ جا من چ کارێکم بەوان دەبێ؟ ئەو شەوە پاش ئەوەی ناتوانێ تەنانەت ژێرکراسێکیش بکڕێ، دەچێتەوە ماڵەوە. هەر ئەم خانووەی وا ئێستا لێی هاتە دەرێ.
گوتی، ئەگەر (یەکە)م لە مۆبایلەکەم کردەوە، هەر وا تەلەفۆنێکی بۆ دەکەم، بزانم کێیە. هەر وا. منیش وەک هەموو نووسەرێکی دیکە فزوولم. حەز دەکەم سەر بە هەموو کونێک دا بکەم. بەڵام زۆری پێ چوو هەتا توانیی یەکەیەک بۆ مۆبایلەکەی بکڕێ و هەلی تەلەفۆنێکی بۆ بڕەخسێت. ئەو ڕۆژە پارەی چاپبوونی سێ وتاریان بۆ ناردبوو. ئەویش بەر لە هەموو شتێک گوتبووی، با جارێ بچم نانێکی باشی لێ بخۆم، دواییش تەلەفۆنەکەم پڕ دەکەمەوە و تەلەفۆنێکی بۆ دەکەم. دەمێک بوو حەزی لێ بوو بچێتە ئەو خواردنگە گەورەیەی هەمووان تاریفی تاموچێژی خواردنەکانیان دەکرد. کە وەژوور کەوت و گارسۆن بەپیرییەوە هاتن، سەری سووڕ ما، چما جێگە هەیە لێی دانیشێ. ڕێگەیان نیشان دا و بردیانە سەر مێزێک. سەیری کرد هەر ئەو بەتەنیا دانیشتووە. ئەوانی دیکە هەمووان دووکەس و سێ و چوار و پتریش... شوێنی بەتاڵی لێ نەمابوو. دانیشت و خەیاڵ هەڵیگرت. لەو دەمەدا دەنگێکی ناسک گوتی: ببوورە برا، دەکرێ لێرە دانیشم؟ پێی بە عەرزەوە وشک بوو، ئەوە خۆ هەر ئەو ژنەیە وا قەول وابوو تەلەفۆنێکی بۆ بکەمەوە. فەرموو دادە گیان، فەرموو. بەڵام خۆی لێ نەناس کرد. کەچی ژنە گوتی، ئەرێ کاکە تۆ نەبووی جزدانەکەمت ڕاگرتبوو تا بۆی هاتمەوە؟ ناسییەوە. گوتی باشت ناسیمەوە. لە نێو قسەکانیان دا گوتی، بۆیە تا ئێستا تەلەفۆنم بۆت نەکردووە، گوتم، نەکا پێت وابێ شتێکی گەورەم کردووە. دوای ئەوەش، هیچ گرفتێکی وام نەبووە، پێویستیم بە گەورەیی و هاوکاریتان بێت. ئەو شەوە پێکەوە نانەکەیان خوارد. ژنە بۆی گێڕاوە، کە هەموو شەوێ دێتە ئەم خواردنگەیە. دوای نانخواردنەکەش ژنە کە زانیبووی ئەو سەیارەی پێ نییە، گوتبووی، خۆم دەتگەیەنمەوە ماڵەوەت. لە ڕێگایە ژنە یەک پشوو قسەی بۆ کردبوو. گوتبووی، مێردەکەم، کابرایەکی ناوبەدەرەوەیە. ناوەکەیت پێ ناڵێم. پۆست و پلەیەکی زۆر بەرزیشی هەیە. باش نییە بزانی چ کارەیە. هەر ئەوەندە دەڵێم، من لە هیچم کەم نییە.
ژنە ئەو شەوە بە وردی باسی مێردەکەی بۆ کردبوو. کە چۆن لە حوکمەتەکەی پێشوودا هەموو شەوێ ماڵەکەی بووەتە مۆڵگە و مەکۆی ئەو پیاوانەی سەری سەد پیاویان بە دینارێک دەفرۆشت. چۆن بە دەم خواردنەوەی ڤۆدکا و وێسکییەوە قاقایان کێشابوو و باسی چۆنێتیی ئەشکەنجەدانی پێشمەرگەیەکیان دەکرد و چۆن لە سەرەمەرگ دا هەردوو چاویان دەرهێنابوو. گوتبووی، ئەو شەوە حەزم دەکرد ژەهرێک بکەمە خواردنەکەیانەوە و هەمووان بمرن، بەڵام هەرچی کردم نەمدەزانی دواتر چیم بەسەر دێ. بەتایبەتی کە باسی ئەو کچە کوردەیان دەکرد وا بە هەشت کەسان لاقەیان کردبوو و دواتر دابوویانە دەست هەموو بەندییەکان.
ئەویش گوتبووی، ئەو شتانەم بۆ بگێڕەوە، دەمەوێ بیانکەمە چیرۆکێک. قەولت پێ دەدەم نە ناوی خۆت دێنم و نە ناوی مێردەکەشت. من چیرۆکنووسم. پێویست ناکا لەو گێڕانەوانەدا ناوی کەس بێنم. ئیتر ژنە کە بیستبووی ئەم چیرۆکنووسە، یەکسەر پرێسکەی دڵی خۆی بۆ کردبۆوە. گوتبووی:
پاش ئەوەی حوکمەتەکەش نەما، ئێمە ترسمان لێ نیشت و گوتمان، تەواو، تۆڵەمان لێ دەکرێتەوە. ماوەی دوو ساڵان خۆمان بزر کرد. دواتر لە هەرا و پشێوییەکەدا هاتینەوە و خۆمان خستە ماڵی خزمێکمانەوە و تکای بۆ کردین. باش بوو وا ڕێکەوت لە تەپوتۆزەکەدا شتەکان دیزەبەدەرخۆنە کران. بەڵام من ئەو ڕۆژانەم هەرگیز لەبیر ناچێتەوە. ئێستاش کە مێردەکەم وا پۆستەکەی بەرزە، هەر ئاگای لە من نییە. مانگێ جارێک لەگەڵ سکرتێرەکەیدا سەفەری خاریج دەکا. سکرتێرەکەی کچۆڵەیەکی هەژدە ساڵانەیە، کە دێتەوەش دیسان خۆی بە کاروبارانەوە سەرقاڵ دەکا و بە منیش دەڵێ، لە چیت کەمە؟ چیت دەوێ بۆتی دەکەم و بڕۆ چیت پێ خۆشە بیکڕە. مێردەکەم پێی وایە هەموو شتێک هەر زێڕ و جلوبەرگە بۆ ژن.
دوو مانگ بوو هەروا هاموشۆی دەکرد. شەوانە لەگەڵ خۆی دەیبردەوە ماڵەوە. بە دەرگاکەی پشتەوەیاندا دەیبردە ژوورێ. دەیگوت، دەرگاکەی پێشەوەمان کامێرای لەسەرە. ئاگات لێ بێ بە ڕۆژ نەیە ئەم دەوروبەرە، نەکا چەکدارەکان، ئەوانەی مێردەکەم دەپارێزن بت بینن. یەکەم جار کە چووبووە ماڵەکەیان، سەعاتێک هەر سەیری دارودیواری ناوەوەی خانووەکەی کردبوو. گوتبووی، حەز دەکەم ئیجازەم بدەی سەرێک بە هەموو ژوورەکان دا بکەم. ئاخر من نووسەرم و حەزم لە فزوولییە. کە لەسەر تەختی خەوەکە ڕاکشابوو، تەزوویەک لە گیانی گەڕابوو. ژنە هەستی پێ کردبوو. گوتبووی، وەڵا خەوی سەر ئەم تەختەخەوانە زۆر خۆشە، بەڵام ئاخر پیاو لەسەر تەختەخەوی ئاوا بنوێ، بڵێی ئیتر بتوانێ چیرۆک بنووسێ؟ شەوانە چیرۆکەکانی خۆی بۆ دەخوێندەوە. سەرەتاکان، ژنە نەیدەهێشت دەست بۆ کتێب بەرێ. دەیگوت، من تاقەتی کتێب و شتم نییە. بەڵام حەفتەیەک دواتر، وردە وردە وای خوو بە چیرۆک و ڕۆمانەکانەوە گرتبوو، دەتگوت لە منداڵییەوە خەریکی خوێندنەوەیە. ئەمجارەیان ئەو کتێبەکەی لێ وەردەگرت و دەیگوت، بێنە با من بۆتی بخوێنمەوە. لەو ماوەیەدا دوو کتێبی خۆی چاپ ببوون. لە یەکیان دا باسی بەسەرهاتەکەی خۆی کردبوو. ژنە ترسابوو و گوتبووی: بۆ وات کردووە؟ نەکا خوێندەوارێک بیخوێنێتەوە و لە ڕۆژنامەیەک دا شتێکی لەسەر بنووسێ. هەر خێراش دڵخۆشیی دابۆوە و گوتبووی: کوڕە دەی، خۆ ئەوانەی ئێمە کتێب و شت ناخوێننەوە. دەڵێن هەرچی پارەی پێوە نەبێ پووشێک ناهێنێ.
وەبیری هاتەوە شەوێکیان، لە گەرمەی باوەشیدا، ژنە دەستی کردبوو بە گریان. ئەویش گوتبووی، چییە؟ خۆ بە زۆری نەهاتووم، خۆت منت فێری ئێرە کردووە. ژنە گوتبووی: ئەوە دەڵێی چی، من بیر لە شتێکی دیکە دەکەمەوە. بڕوات بێ من سووک نیم. من سۆزانی نیم. خۆشمم زۆر خۆش دەوێ. بەڵام چ بکەم، مێردەکەم ئەوەندەی لە وڵاتانە و لەوێ خۆش ڕایدەبوێرێ، کە دێتەوە ئێرەیش ئەوە لەبەر سکرتێرەکەی ئاگای لە من نییە.
ئێوارەیەکیان، وایان دانابوو پێکەوە بچنە پارکەکەی دەرەوەی شار. زۆریش دەترسان نەکا یەکێک پێکەوە بیانبینێ. دوو دڵ بوون بچن یان نەچن. ژنە گوتبووی: بمان بینن، هەردووکمان تێ دا دەچین. ئەویش لە وەڵام دا گوتبووی، من هیچم نییە لەدەستی بدەم. ئەو ئێوارەیە زۆر چاوەڕوان ببوو. هەر نەهاتبوو. تەلەفۆنیشی بۆ نەکردبوو. لە چاوەڕوانیی هاتنیدا زیاتر لە سەد جاران ئەمسەرئەوسەری شەقامەکەی کردبوو. ئیتر کە هیوا بڕاو ببوو، گەڕابۆوە ژوورەکەی خۆی و گوێی لە دەنگی ڕادیۆکە دەبێ و هەواڵی کوژرانی ژنێک دەخوێنێتەوە. ژنێک کە پیاوەکەی کوشتوویەتی. سبەینێ ڕۆژنامەکان بە وردی بەدوای باسەکەدا چووبوون. بەڵام کابرا گوتبووی، وردەکاریی ئەم ڕووداوە لە هەر ڕۆژنامە و ڕادیو و تڕەماشێک بڵاو بێتەوە، چاوی دەردێنم. ئیتر بێدەنگەی لێ کرابوو.
لە پاش ئەوە، تاقەتی تەواوکردنی هیچ شتێکی نەما. هەرچی دەکەوتە بەردەستی، بە نیوەچڵی بەجێی دەهێشت و پێی وابوو، تەواوکردنی هەر شتێک، واتە کوشتنی ئەو شتە.[1]