#ئەلفابێتی ھۆرامی و چڼ سەرنجېۋ#
نۋیستەی: ئاکۊ مارانی
ۋەڵاکریای دوەم: جولای 2021
بەشۍ یا ڼزەمە
ئەلفابێتېۋ، کە (ئارام شەکیبایی) بەکاربەرڎەن
بەداخۆ سەربارو ئانەی کە من چە حۆت ساڵی ۋېیەرڎەنە چڼ جارېۋ کۊششمکەرڎەن چنی بەڕێز (ئارام شەکیبایی) پېسەو درۊسکەرو یەکەمین کیبۆردۍ ھۆرامیۍ پەیۋەڼیگیرۇ. بەتایبەت پەی ئانەی کە جېیاتی ئانەی من ساڵۊ 2012 کیبۆردېۋە تەرە درۊسە کەرۇ، تاکو کیبۆردەکۊ ئاڎی تەسەلتەرە کەرمۍ و بۊ بە بنەما و فرە کیبۆردی درۊس نەبۊ. ھەڵبەتە من بە ھەمان ئیمەیل ئادرەس پەی ئاڎی پەیام کېیاستەن، کە ئاڎی سەرو وێب-بلاگەیەیشۆ نۋیستەن و دمایین پەیامو من سەرەتاو ۋەھارو ئۍ ساڵی بۍ (2019). بەڵام تاکو ئیسە من ھیچ وەڵامېۋ بە من نەیاۋانۆ و چە یاۋای پەیامەکاو وېم بە ئاڎی بە ئا ئیمەیل ئادرەسەیشە گومانم ھەن. ۋەرو ئانەی چېگەنە ئاماژەو من گلەییکەرڎەی نېیا، بەڵکو خەموارڎەیا بە نەبېیەی و درۊس نەبېیەی پەیۋەڼیەکەی.
تاکو ئا یاگۍ چە ۋیرو منەنە مەنەبۊ، بەڕێز (شەکیبایی) چە ڕۊشنکەرڎەکەو وېشەنە، بە ئانەیە ئاماژەشدابۍ، کە پیتۊ (ۊ) ھېمانە پەی دەنگېۋی ھامبەشی مېیانو (زۋانی ھۆرامی) و (زۋانی کەلھوڕی)، کە ھەمان دەنگا چە ۋاچەکا ( لۊ، نۊ، چۊ، خۊ، بۊ، تۊ، سۊ، ڕۊ، کۊ، دۊ، کۊت، سۊت، شۊت، ملۊ، مشیۊ، گرەۋۊ، شېۋیۊ، لېۋیۊ، ...تد) ھەن. ھەر پاسە پېتۍ دوەمە (ڎ)، کە ھەمان پېتەنە چە سەردەمو (سەیدی ھۆرامی) تاکو ئارۊ ھەنە و بەکاربریۊ و تاکو ڕادېۋی فرە یاگەگیرە بېیېنە، پەی دەنگېۋو زۋانی ھۆرامی بەکاربەرڎېنە، کە دەنگش چە دەنگو (د) جېیاۋازا.
گرفتېۋ کە ئەلفابێتەکەو بەڕێز ئارام شەکیبایی بېش، ئانە بۍ، کە نەتاۋۍ بە گرڎو پەنەۋازییەکا نۋیستەی ھۆرامی وەڵام بڎ‌ۋە، دەنگو (نگ: ڼ ŋ: پەڼە، گڼ ) و دەنگو (ې-ۍ | ᴉ: نېرە ، مېڵە، هېڵۍ، وەشڵۍ ) و دەنگو (ۉ |ṿ: ۋەر ، ۋەز ، ئاۋەز) ھېماسازیی نەکریێبېنۍ. بەڵام چنی ئانەیچە ھەنگامۍ یەکەمە و بنەڕەتییە بۍ، پەی دیجیتاڵیزەکەرڎەی نۋیستەی ھۆرامی و ئاسانکاریی پەی نۋیسەرا و چە ئانەیچە گرنگتەر ئانە بۍ، کە مەرزو ئێرانی و عیراقیش بڕیەبۍ و وېش چە دنیا گولانەکەو ڕیزبەڼی کیبۆردۍ فارسیۍ و عەرەبیۍ ڕزگارکەرڎەبۍ، تاکو ھۆرامی-زۋانەکۍ ھەر یاگېۋو دنیایەنە با، بە ئاسانی بتاۋا سەرو دەزگاشاۋە، کە بە فرەیی کیبۆردۍ لاتینییەشا سەرۆ ھەنە، بە ئاسانی بە ھەمان ڕیزبەڼی فرەو پیتە لاتینییەکا، بە ئەلفابێتی ھۆرامی بنۋیسا.
---------------------------------------------------------------------------------
* دەنگە تاییبەتەکۍ زۋانی هۆرامی، پیتە و نمۇنەی دەنگیی و نۋیستەیی:
- ڎ: ئەڎا: دەنگ https://t.me/Ferhengu.Zvani.Horami/6322
- ۋ: ۋاران: دەنگ https://t.me/Ferhengu.Zvani.Horami/6328
- ڼ: مەڼ: دەنگ https://t.me/Ferhengu.Zvani.Horami/6324
- ۊ: لۊ: دەنگ https://t.me/Ferhengu.Zvani.Horami/6326
- ې ۍ: دەنگ https://t.me/Ferhengu.Zvani.Horami/6330
- ﯗ = و: (مﯘ)
لینکو گرڎو پیتەکا ئەلفابێتو زۋانی ھۆرامی
https://t.me/Ferhengu.Zvani.Horami/7588
** پەی ئەۋەوەنەی پەراۋېزەکا، ئەرک نەبۊ، سەرو لینکو پەڕچنەکەی کلیک کەرڎۍ
[1]