ژ ڕەمزا دلبەرێ دیسا، ل من باتن ڤەژین دەردە
د لبسێ تارییێ ئیسا، خویا بوو ئەو سیەه چەردە
د لبسێ تاری و نوورێ، پەری ڕەنگێ سفەت حوورێ
ژ وادی ئەیمەنا توورێ، موقەددەس کر ل من عەردە
ژ نار و نوورێ تەقدیسێ، تەجەللا کر ل من دیسێ
ل سەر تەختێ خوە بەلقیسێ، هلانین بێ حجاب پەردە
حجاب و پەردە ئاڤێهتن، سەبا ڕەیحان هلاڤێهتن
ژ بورجان تیر پوڕ ڕێهتن، گهان من ڕاست و چەپ جەردە
کرم ئامانجێ مزراقان، د دل دا تیر چوون فاقان
ب جەللادێ خوە ئەو خاقان، دبێژت: هێژ تو خەنجەر دە
ب دەربێن خەنجەران کوشتین، ب خوونا سوهر لێ مشتین
د چینا سونبولێن قشتین، مە دل پوڕ مسک و ماوەردە
گولێن هەر مسکێ ئەزفەر لێ، عەبیر و عەنبەرێ تەڕ لێ
سەمایا سووسنان هەر لێ، ب زولفان ما تو ماوەر دە
ب سەر وان سونبولێن تاری، ب هەڤڕا بازی و یاری
ب جۆ دا خوون ببت جاری، ژ قەوسان گەزمەیان بەردە
ئەزم ئامانجێ وان تیران، ژ پەیکانان و سەرتیران
بوویم پوولاد ل بەر شیران، سەراسەر تێک مام گەردە
کو دلبەر هاتە ڤێ یۆلێ، ژ بەر پوڕ هن کەتن چۆلێ
ژ قەنجان گۆ ڕەڤا هۆلێ، ژ مەحبووبان برن نەردە
ژ قەدد و بەژن و بالایێ، ژ ڕەنگ و دێم و سیمایێ
تو ڕەنگی قەت خەبەر نایێ، د حوسنێ جەوهەرەک فەردە
ب خەمل و ڕەنگ و ڕەعنایی، ب مەحبووبی، ب زیبایی
ب ئەو حوسنا خودێ دایی، ژ گول ڕەنگان گولا زەردە
نەبات و شەککەرا لێڤێ، نەسیمێ وێ گول و سێڤێ
هلینت پەردەیا شێڤێ، شفایا هندەکی دەردە
ژ نەقش و سونعێ جەبباری، موتەررا توررەیا تاری
ل نوورێ مسکێ تاتاری، ل سەر وان خەمرییان بەردە
ل بەر ڕۆژێ ببت خێلی، بنێرم قامەتا عێلی
قەدیف و زەرکەشێ تێلی، زوباد و مسک و عەنبەر دە
ب سیماڤێ ب زێراڤێ، تو ڕۆژێ نەقشەکێ باڤێ
کو دا ئەرژەنگ ژ وێ ناڤێ، ل بەر ڕۆژێ نەبت پەردە
ئەگەر بەرقەک ژ وێ ڕۆژێ، ژ شەوقا عقد و بشکۆژێ
بدت قەلبی وەکی دۆژێ، ل بەر دۆژەه دبت بەردە
د مەیدانێ شرین غەنجان، بچەرخن مسلی شەترەنجان
تورابا بەر پییێ قەنجان، زوباد و عەنبەرین گەردە
دبت بێژن وی سولتانی، ب هەفت ئایاتێ فورقانی
ل مەحبووبان تو خاقانی، وەرە دەربێ ل قەیسەر دە
مەلا زانم ژ مەجزووبان، تنێ ناژی تو بێ خووبان
دەما دل دی ب مەحبووبان، ب شۆخ و شەنگ و ئەسمەر دە
دەما جەللاد بێن بازی، ب شیر و خەنجەرێن تازی
ل دەرگەه دا نەکی گازی، دەلال و نازپەروەردە
ئەمانەت دا ژ بێ هووشی، دوڕێن ناسوفتە نەفرووشی
مەلا زانم ژ مەدهووشی، تە دل بێ خواب و بێ خوەردە
#مەلای جزیری# [1]