داستانو حەیدەری و سنۊبەرۍ
بەشۍ دوەمە
داستان نویس بەردەوامەن جە موناجاتی چەنی زاتو هەقی، تاریفۍ گۆرەییش و تەواناییش و بەخشندەییش کوتاشان نمێ.
شاهان، سەرداران، ئەمیران، خاسان
داران، نەداران، هەرتۊ، مەشناسان
گرد بەندەی زەلیل، سەناخوانی تۊن
ئومېدوار بە لوتف، بۍ پایانی تۊن
زەڕاتی عالەم، نە فەرمانی تۊن
گردین، خۊشەچین، زەڕە خوانی تۊن
نیشاتی لەتیف، فەسڵی بەهاران
مەبۊ، وە توڕە، پەرێ گوڵزاران
مەوزان وە ڕووی خاک، فەرشی خەنجەریی
وە فەرموودەی وېت، پەی سنعەتگەری
بەڵام، ئەی مەعبوود، کەرەم بۍ شمار
یا، دانای بۍ عەیب، سڕپۊش و سەتتار
بە نامۍ شەریف ئیسمی عەزیمت
بەو تای بۍ هەمتا، زاتی قەدیمت
بەو عەرشی عەزیم، پایەش فریشتەن
چاربار بە زاتی، قودرەت، سرووشتەن
بە تەوحیدی زات، گردین مەلەکووت
مەشغووڵەن بە ئەمر، دانای لایەمووت
بە فرقەی سوار، عەرزەی لا مەکان
بە شەوقی پا بۊس، بە عەرشت ئامان
تا، پەردەی حیجاب، یاونای زاتش
خەتمولمورسەلین، کەردی خەڵاتش
مەجموول و مەهبووت، یەتیمش وانای
حەبیبی یەزدان، عەزیمش زانای
بە قورئان، کېشای چەندین عەلامەت
کەردی بە شەفیع، فەردای قیامەت
بە شای شەهیدان، ئەولادی ئەتهار
سەر و گیان، نە ڕای دین کەردەن، نە سار
بە ئەستابی پاک، فرقەی ئەنساری
بە موهاجران، جە زەید، فراریی
بە ئەولیاهان، پاکی، بۍ نەزیر
بە زکری(یاهوو)، شېخانی کەبیر
ئەی بەندە زەلیل، عاسی و ڕوو سیا
بە ڕووسیاهیی، ئامان نە دەرگا
ئەرسەد، کە عاسیی، هەم شەرمەسارم
گونای فراوان، بییەن وە بارم
هەرچی تۊ فەرمات، بەجا، ناوەردم
فرە تەرکی قەوڵ، کەلیمات کەردم
هیچ هەققم نەکەرد، سیوای جە ناهەق
تا، واتن، پەنەم، کافری موتڵەق
بە کافری وېم، کەردەنم ئیقرار
فریاڕەسیم کەر، غەفوور و غەفار.[1]