$ئیرۆ وەرن لێزم وەرن (ا)$
ئیرۆ وەرن لێزم وەرن؛ جیران و خەلقێ هێشەتێ
هوون ڕایەکێ ل من بکن؛ ئیرۆ قەوی گریا مە تێ
ئیرۆ قەوی م تێ گری؛ سوسن ل مێرگان غەیری
من حەیفا لێڤێن شەکری؛ ئێدی ڤەناخون شەربەتێ
ئەو لێڤ و لەعلین و شەکەر؛ ل وان کێمبوون دڕ و خەبەر
سەد ئاه و کۆڤان و کەسەر؛ حەیف عەین و لام چوون ژ هجرەتێ
حەیف عەین و لام ژێک بوون جودا؛ حوزن و گری یارەب تەدا
ئەم ڕازینە ب ئەمرێ خودا؛ هەرچی ژ دەرگاهێ تەتێ
هەرچی دکت ئەو میر دکت؛ خێر و شەران تەقدیر دکت
داغا ل قەلبان پیر دکت؛ سۆتم ب نارێ فرقەتێ
سۆتم ب پێتێ و ئاگری؛ ڤێ فانیێ ئەم ژێک کری
حەتا خۆشن ب کۆڤان مری؛ ڕۆژ هاتە چەرخا عادەتێ
عادەتا چەرخا عەوانە؛ وێ گەلەک مەحبوب ڕەڤانە
جان د ناڤ ئاخێ نهانە؛ فەلەکێ بێ مروەتێ
ئەی فەلەکا بێ (اعتبار)؛ من ب تە نینن قەت تو چار
تە گەلەک مەحبوب ڤەشارن؛ پاشی ڤان خال و خەتێ
سەد حەیف بۆ جووتێ سۆرگولا؛ مارێ مقیم کەت سەر ملا
وان پڕ د باغی وەسلا؛ نەدا ئێدی (دنب) ئولفەتێ
دپاشی وان وەردێ د گەش؛ سەد حەیف ل ڕەیحانێ د ڕەش
کێم بوون ژ وان بێهنێ د خوەش؛ نیشان و خالێ جەبهەتێ
نیشان و خالێ غولغولی؛ سەد حەیف ل زلفێ گولگولی
هاتن کو ڤی دۆستی هلی؛ هێژ نا گرن ژڤێ عبرەتێ
دپاشی وان خال و نشانان؛ قەت نەما بێن کم ڕیحانان
ژ مەختوم و ئێشان و ژانان؛ تیرەک ژ تیرا فرقەتێ
ئەڤ فراق تیرەک ب زەربە؛ ئێ کو دی ئەڤ داغ و دەربە
(دیما قیدە) مەختوم کەربە؛ شەڤ و ڕۆژان خەو نەتێ
شەڤ و ڕۆژا خەو لێ نینە؛ دائما شین و گرینە
ئاگر و پێت و نهینە؛ ما ب سەرێ کەس ئەڤ نەتێ
تیرەک دژوارە فراقە؛ هەر کەسێ دی ئەڤ فراقە
مەختوم و داغ و عراقە؛ د قەید و بەند و محنەتێ
گومبەتا تاری ستارە؛ موقبەرێ دۆست لێ ڤەشارە
تە ل من حەرام کر بهارە؛ چیچەک و بێهن ژ دۆرێ تەتێ
قەت نەما بێهن کم چ وەردا؛ چیچەکێ بێهن خوەش ل عەردا
پاشی مەحبوب کو ب دەردا؛ چیمەنا ژ دۆرا نەتێ
دگەر ئەز بخو خو ناس ناکم؛ ئەز وێ ئو تێمو دەیناکم
کو باوەر ژ عاشقان ناکم؛ دسۆژم نار و فرقەتێ
ڤێ فرقەتێ چ د گەل مە کر؛ مەحبوب وێ گرت و بەرزەکر
ژەو پاش مکسی هیڤی نە کر؛ مەشیابوو دار الغُربَتێ
غوربەت چییە کۆڤانییە؛ دبەر شەمال و ڕۆهنییە
سوحبەت کری گەل حورییە؛ زاڤائو بووکێن ئاخرەتێ
$ئیرۆ وەرن لێزم وەرن (ب)$
هوون وەرن، لێزم وەرن؛ جیران و خەلقێ هێشەتێ
هوون ڕایەکێ تەدبیر بکن؛ ئیرۆ قەوی گریا مە تێ
ئیرۆ قەوی تێتن گرین؛ سووسن ل مێرگا غەییرین
سەد حەیفە لێڤێن شەککرین؛ ئێدی ڤەناخون شەربەتێ
لێڤێن د لەعلین و شەکەر؛ کێم بوون ژ وان دورر و خەبەر
سەد ئاه و کۆڤان و کەسەر؛ کو عەلی چوویە هجرەتێ
حەیفە عەلی ژێ بوو جودا؛ حوزن و گرین دیسا تە دا
ئەم ڕازینە ب ئەمرێ خودا؛ هەرچی ژ دەرگاهێ تە تێ
هەرچی دکت ئەو میر دکت؛ خەیر و شەڕان تەقدیر دکت
داغا د قەلبان پوڕ دکت؛ سۆتم ب نارێ فرقەتێ
سۆتم ب پێتا ئاگری؛ ڤێ فانیێ ئەم ژ هەڤ کری
هندی خۆشە کول مام دلی؛ دۆست چوویە چەرخا عادەتێ
دۆست چوو چەرخا عادەت ئەمان؛ وان گەلەکی مەحبووب ڕەڤان
جان وی د نێڤ ئاخێ نهان؛ ئەی فەلەکێ بێ مۆهلەتێ
فەلەکا بێ ئیعتباری؛ پاشی وان چاڤێن خوماری
من ب تە نینن چو یاری؛ پاشی خالا جەبهەتێ
پاشی وان خال و نیشانا؛ قەت نەما بێهنا ڕەیحانا
ژ محنەت و ئێشان و ژانا؛ تێ ژ نارێ فرقەتێ
فرقەتا وی هەر ب زەربە؛ دائما ئێشان و کەربە
ئێ کو دێ زانی چ حەربە؛ من ژ خەوفا خەو نە تێ
من شەڤان خەو لێ تونینە؛ ب ئاگەه و ئێشا نەهینە
دائما تێتن گرینە؛ قەت ل سەر کەس ئەو نە تێ
کوورتکا کوورە و سارە؛ مەقبەرا تێدە کو مارە
تە ل من حەڕماندی یارە؛ چیچەکا کی دەست کەتێ
چیچەکا کانی و ئاڤ لێ؛ سووسنا دائیم خوناڤ لێ
هەردەما نێچیر و ڕاڤ لێ؛ دێ تەمام کی سوحبەتێ
ئەی فەلەکێ بێ وەفایێ؛ تە چڕە موهلەت نەدایێ
یار د نێڤ ئاخێ نهایێ؛ تو ب مەحبووبا کەتێ
نازک و مەحبووب جوانەک؛ قامەت و بەژن و زراڤەک
کُلُّ شَيء دبن کو هالەک؛ ژ غەیری شاهێ قودرەتێ
ژ غەیری وی جان دێ وەفا بن؛ ئەم هەمی ئاخ و تورابن
من ب چاڤان دی موخابن؛ چوونە مالا زولمەتێ
زولمەتا تاری و کوورە؛ مەقبەرا ناڤ لێ قوبوورە
ژ هاینان یاران و دوورە؛ قەبر بەندا فرقەتێ
مەقبەرا مەحبووب د نێڤە؛ من موقیم چاڤ مان ب ڕێڤە
چڕە یەک نایێ ژ وێڤە؛ دین کرم ڤێ حیکمەتێ
دین بووم د حوکمێ ذوالجَلال؛ ئەو لاوکێ ب حوسن و جەمال
سەد حەیفە کو زوو چوو ژ مال؛ ڕەیحان و وەردا قامەتێ
رەیحان و وەردا فلفلی؛ من دینە زولفێن کاکلی
هاتی کوڕیم ژ دەست بری؛ دا ئەم بگێڕن عبرەتێ
من حەیف ل جووتێ سۆرگولا؛ زولفێ موقیم ل سەر ملا
دانینە نێڤ ئاخ و سەلا؛ ئێدی بگێڕم ئولفەتێ
من حەیف ل ڕەیحانێ د ڕەش؛ کا سۆرگول و وەردێن د گەش
کێم بوون ژ وان بهنێ د خوەش؛ نیشان و خالا جەبهەتێ
نیشان و خالا فلفلی؛ من حەیف ل زولفێن کاکلی
هاتی لاوک ژ دەست بری؛ هێژ ناکرن ئەم عبرەتێ
میر محێ شاعرێ پاکە؛ هەرکەسی ڕوح بوو ژ ماکە
هەمییان دێ ئەو فەناکە؛ ئەوێ شاهێ قودرەتێ
#فەقێ تەیران# [1]